Nambase 14:12-43

¹²Nambame yanyi renge peyapala wambu dupwa pyaro. Dopa pirunupape nambame emba rakange kyawa inginyi pyambwaronopa rara enenge andake ingyuo dee porainya renge doko palyuo simbwaramopa rara wamba paleyami dupwa isa palyuo kararami, leya.

¹³Dopa leyamo dokopa Mosese baame Kamongo lamaiyuo, Embame embena porai renge dokome yuu Isipi dokona karo wambu dupwa nyuo lanyuo epee. Embena wambu dupwa kando embame yulu piinyi doko Isipi range dupwame seraminyi dokopa

¹⁴nakamame wambu yuu dakena palenge dupwa lamairami. Kamongo emba namwa keta epo karenge doko wambu dapwame soo otelyaminyi. Embena kopa doko namwa kareyama dokona epo siyamo dokopa emba epo panee. Dee korakama namwa penge dokopa emba wambo pao kopa rau londe ingyuo dee kukwa dokopa emba isare ingyuo pao pingi doko silyaminyi.

¹⁵Epapu embame embena wambu dupwa pyao kumakare ramo doko wambu rara wakale dupwame emba pilini doko sepala dopa lao,

¹⁶Kamongo dokome yuu mairu lalu lao leyamo dokona kapa pyuo wambu dupwa lanyuo epa nara ingyapyasa yuu muiyane dokona nakama pyao kumapya, larami.

¹⁷Dokona lao epapu Kamongo ateŋa leto. Embena porai doko namwa lasaka pyuo emba piruŋu lalu lao leeneli pyuo piri. Emba dopa lao,

¹⁸Namba Kamongo, doko waiya lao imbwa nao wambu dupwa ama mona reto yaki nyii nao koo pyuo mata jilyaminyipape kame sakamingi. Nakamana endangi rakangepe koo pingi dokona nambame ikinyipi wanengepe apusingi kauwangepe dupwa koo keta palyuo pyao randa mairu. Randa maiyuo nakamame para pyao wane manjo manjo paraminyi dupwa randa maiyuo piru, lee.

¹⁹Embena mona retenge doko kamame wakasa alowa pii nange leene dokome embame wambu dapwa yuu Isipi yaki nyuo epeyaminyi dokona piso pao dakepa nakamana koo dupwa nyuo kame sakaminyili pyuo kame sakamipi, leya.

²⁰Kamongome isingi lao, Embame namba piso silinyili pyuo nambame wambu dupwana koo nyuo kame sakamiru, leya.

²¹Dopa pirunupape namba lete karo nambana yanga paupau lenge renge doko yuu dakena pano silyamo dokona kinyi lengenyili pyuo lalu lao lao,

²²Wambu dapwana mendemepe yuu dokona sukusa pao pali nara. Nakama nambana yanga paupau lenge renge dokome epo kendale piyasa kandeyaminyi dokope dee yuu Isipi dokonape yuu muiyane dokonape yulu mendeme pii nange dupwa piyunu kandeyami. Kandeyaminyipape nakamame nambana maka nange renge doko makande pipa pyuo nambana pii warombo see napala kamba leyami.

²³Nambame nakamana rora ambasu dupwa yuu doko mairu lao lalu lao leyo dokona nakama paa narami. Nakamame namba mata jilyaminyi dupwana mendemepe yuu dokona kapa pao kara nara.

²⁴Dopa piramopape nambana kendemande akali Kelepe banya mona wakale palyuo karo namba yaki nyii nange dokona baa yuu waa kando kandala peyamo dokona nambame baa lanyuo paro. Dokopa yuu dokona yuu angi lama lama dupwana Amaleke wambupi Kenane wambupi dupwa epapu palaminyi banya para pyaramo dupwana ingyara.

²⁵Dokona rakya nakama dee kapu kyuo yuu muiyane dokona ipwa kota pete Kone lenge doko kanda kanda parami.

²⁶Kamongome Mosese Eronepa lamaiyuo lao,

²⁷Yuu gii akipare nembo wambu koo pingi dapwame namba kando mumu lao kararamisi? Doo mumu letaminyi dasipa yakana namba silyu.

²⁸Dokona epapu nakambame nakama dopa lao isingi lamaiyuo, Namba Kamongo dopa leto. Nambame kinyi kinyi lalu lao lao, Mende pyakapili lao piso siminyili pyuo nakama keta pyakaro, leto.

²⁹Nakama kumaraminyi dokopa nakamana yanenge kaoma dupwa yuu muiyane dokona muu raleya lao nembarami. Namba kando mumu lao karaminyi dokona nakama ee kana akalisa lama pasi dupwana mendalimipi yuu dokona paa narami.

³⁰Nakama yuu dokona pao palirami lao lalu lao leyonopape nakama mendemepe pali naraminyipa akali Kelepe Josuapa iki yuu dokona pao palirambi.

³¹Nakamame namwana wane wanake dupwa karapusi pyao nyerami lao leyami. Dopa leyaminyipape nakamame yuu doko rae mai nao paa narama leyaminyi dokona nambame wane wanakepe dupwa lanyuo paronopa nakama rangena yuu ingyara.

³²Nakama yuu muiyane dakena kumarami.

³³Nakamame namba epe kanda nao mata joo kareyaminyi dokona nakamana wane wanakepe dupwa randa nao ee kana akalisa kisima dusipana yuu muiyane dakena ralo papyuo kararami. Dopa pyuo papyuo karo pao nakama peparae kumaraminyipa wane wanakepe dupwa yuu dokona parami.

³⁴Nakamame koo piyaminyi dokona ee kana akalisa kisima randa nao kararami. Yuu doko yuu gii akalisa kisima nembo kando papyuo kareyaminyi dokona ee kana akalisa kisimako randa nao kararami. Nambame nakama kando rae mai nalene lao soo nyerami.

³⁵Nakama wambu koo pingi dupwa nyuo pyasapala namba kando mata joo karaminyi dupwa keta nambame lapunuli pyuo piru lao lalu lao leto. Yuu muiyane dakena nakama peparae kumarami lao namba Kamongome lalu lao lapu.

³⁶Moseseme akali lapo yuu doko apiyakale lao kandala pena leyamopa nakama pao kapu kyuo epapala kyambo leyaminyi dokome wambu dupwa Anatu kando mumu leyami.

³⁷Dokona Kamongome nakama keta anga pingi renge maiyamosa nakama kumuyami.

³⁸Dopa pyuo kumuyaminyipape akali akalisa ipisu lama yuu doko apiyakale lao kandala peyaminyi dusipana Josua Kelepepa iki mee lete kareyambi.

³⁹Kamongome leyamuli pyuo Moseseme Isaraele wambu dupwa kando lamaiyamo dokopa nakama soo mona randayami.

⁴⁰Dokopa wambu dupwa wamba yangama sipurapala yuu kyau pyalya pyana pingi dokona ketae pulyuo yuu enenge nyela pao karo lao Kamongome yuu jero lao lalu lao leyamo dokona epapu namwa rapa rapa pisi karamano kapa parama. Namwa koo piyama lao silyamano, leyami.

⁴¹Dopa leyaminyipape Moseseme lamaiyuo, Akipamo epapu nakamame Kamongo kando kamba letamisi? Nakama embone pisa nara.

⁴²Nakama paa nalapape. Nakama pipya Kamongo role kara nalyamo dokona nakamana nyisu petenge dupwame nakama anamasi minyarami.

⁴³Nakama Amaleke wambu dupwape Kenane wambu dupwape pipya yanda pyalana pao lenge kambusa kararaminyi dokopa nakama yandana kumarami. Nakamame Kamongome langiyamuli pyuo moko minyuo pii nayaminyi dokona Kamongo nakama keta role kara nara, leya.