Nambas 21:24-35

²⁴Bat detlot Isreil pipul bin kilim ded sambala enami wen olabat bin faitfaitbat langa olabat en deibin deigim olabat kantri brom det Anan Riba langa sauthsaid raidap nowathsaid langa det Jeibak Riba. Nowathwei igin brom det Jeibak Riba detlot Emanait pipul bin jidan, en det Emanait pipul boda bin brabli strongbala.

²⁵Wal detlot Isreil pipul bin teikoba brom detlot Emarait pipul det taun gulum Heshban en det najalot taun du weya jidan raidaran langa det taun en olabat bin jidan deya na.

²⁶Heshban bin det bigiswan taun blanga Saihan det king blanga detlot Emarait pipul hubin fait en bidim langa det najawan king blanga Moweb, en Saihan, bin gajim ol det kantri raidap langa det Anan Riba.

²⁷Blanga dijan na detlot Emarait pipul bin sing dijan song. Deibin sing, “Kaman langa Heshban langa det King Saihan bigwan taun. Melabat wandim luk im garra bildimap en meigim gudwan igin.

²⁸Wantaim brom dijan taun Heshban, detlot solja blanga King Saihan bin go jis laiga faiya. Deibin binijimap det taun blanga Eiya langa Moweb, en deibin binijimap detlot boswan blanga det hil kantri langa topwei langa det Anan Riba.

²⁹Im garra brabli nogud blanga yumob Moweb pipul! Ol yumob pipul hu oldei weship det drimin gulum Kemosh garra abum trabul! Yumob drimin oldei larram yumob men jidan streinja, en ol yumob wuman jidan prisana blanga det Emarait king gulum Saihan.

³⁰Olabat bigininimob bin gitkil du. Olabat brom Heshban raidap langa Diban, en brom Neishim langa Nofa gulijap langa Midaba bin dai. Nomo enibodi jidan laibala.” Lagijat na deibin sing.

³¹Wal detlot Isreil pipul bin jidanbat langa det kantri blanga ola Emarait pipul.

³²En Mosis bin jandim sambala men blanga faindat snikinbalawei hau blanga fait en teikoba langa det taun gulum Jeisa. Brom deya detlot Isreil pipul bin gajim det taun gulum Jeisa en ol detlot taun weya jidan raidaran langa det taun, en deibin andimwei ol detlot Emarait pipul hubin jidan deya.

³³Afta na, detlot Isreil pipul bin go najawei en deigim det roud langa Beishan. Det king blanga Beishan gulum Og, bin kaman garram im soljamob blanga fait langa detlot Isreil pipul langa Idrei.

³⁴Wal YAWEI bin dalim Mosis, “Yu nomo bradin langa im. Ai garra meigim yu bidim im en im pipul olabat. Yu garra fait langa im jis laik yubin fait en bidim Saihan det king blanga ola Emarait pipul hubin jidan bosmen langa Heshban.”

³⁵Wal detlot Isreil pipul bin kilim Og en im san, en ola pipul blanga im. Olabat nomo bin libum enibodi laibala, en olabat bin jidan langa im kantri na.