Namba 23:1-12

¹Ma Bileam kêsôm gêdêŋ Balak gebe “Ômboa altar 7 sa êtu aêŋa, go ôkêŋ-bulimakao kapoac 7 to domba kapoac 7 êndêŋ aê.”

²Balak gêgôm kêtôm Bileam kêsôm ma agêc sêkêŋ bulimakao kapoac teŋ ma domba kapoac teŋ kêtu daja gêsac altar 7 tau ŋaô kêtômgeŋ.

³Ma Bileam kêsôm gêdêŋ Balak gebe “Ôkô ôwiŋ nêm daja, ma aê gabe jana. Moae Apômtau oc mêŋêlic aê. Ma biŋ, taŋ eŋ êtôc êndêŋ aê naŋ, oc janac miŋ êndêŋ aôm.” Go eŋ kêpi lôc sawa teŋ gêja.

⁴Ma Anôtô mêŋgêlic Bileam ma Bileam kêsôm gêdêŋ eŋ gebe “Aê gaboa altar 7 sa ma kakêŋ bulimakao kapoac teŋ ma domba kapoac teŋ kêtu daja gêsac altar 7 ŋaô kêtômgeŋ.”

⁵Ma Apômtau kêkêŋ biŋ kêsêp Bileam awasuŋ su, go kêsôm gêdêŋ eŋ gebe “Ômu ôndêŋ Balak ôna ma ôsôm biŋ tonec êndêŋ eŋ.”

⁶Go Bileam gêmu gêdêŋ Balak gêja ma Balak to lau Moab nêŋ kasêga samob sêkô sêwiŋ ênê daja.

⁷Go Bileam gêôc awa sa ma kêsôm gebe “Lau Moab nêŋ kiŋ Balak kêkôc aê aŋga lôc oc kêpiŋa Aram gamêŋ ma kêsôm gebe ‘Ômôêŋ ôpuc boa Jakob êtu aêŋa. Ômôêŋ ônac jatu Israel.’

⁸Mago aê japuc boa ŋac, taŋ Anôtô kêpuc boa eŋ atom naŋ, amboac ondocgeŋ.

⁹Gebe aê kakô lôc ŋatêpôê ma galic eŋ, kakô gamêŋ ŋabau ma matoc gê eŋ. Lau-m teŋ, tê sêŋgôŋ nêŋ ŋasawa teŋ tauŋŋa nê, sedec gebe sêŋgôŋ sêwiŋ lau samuc.

¹⁰Asa kêtôm gebe êsa Jakobnê kekop sa. Asa kêtôm gebe êsa Israelnê lau ŋatoŋ sa. Aê jamac êndu jatôm lau gêdêŋ ma janac dabiŋ ŋoc lêŋ êtôm êsêac sêjac dabiŋ nêŋmaŋ.”

¹¹Go Balak kêsôm gêdêŋ Bileam gebe “Aôm gôgôm aê amboac ondoc. Ôlic acgom, aê kakêŋ biŋ aôm gebe ôpuc boa ŋoc ŋacjo, mago galoc aôm gôjam mec êsêac.”

¹²Bileam gêjô eŋ awa gebe “Amboac ondoc, aê taŋoc wamu ma jasôm biŋ, taŋ Apômtau kêkêŋ kêsêp aê aocsuŋ naŋ, atom me.”