Namba 22:34-40

³⁴Go Bileam kêsôm gêdêŋ Apômtaunê aŋela gebe “Aê gagôm sec. Aê gajam kauc gebe kôkô intêna auc aê atom, Amboac tonaŋ embe ôlic sec, naŋgo jamu jana êtiam.”

³⁵Go Apômtaunê aŋela kêsôm gêdêŋ eŋ gebe “Ôsêlêŋ ôwiŋ lau tau. Mago ôsôm biŋ tageŋ, taŋ aê oc jajatu aôm naŋgeŋ.” Amboac tonaŋ Bileam kêsêlêŋ gêwiŋ Balaknê kasêga.

³⁶Balak gêŋô Bileam gêmêŋ ŋawae, tec gêdi kêpuc eŋ tôŋtôŋ gêja Moabnê malac, taŋ gêc bu Amon ŋatali aŋga gamêŋ tau ŋamadiŋ jaêcgeŋ naŋ.

³⁷Balak kêsôm gêdêŋ Bileam gebe “Aôm gôdêŋ aê gômôêŋ atom kêtu asageŋŋa. Aê kakêŋ jaeŋ to kakalem aôm atom me. Aôm gobe aê oc katôm gebe jatoc aôm sa atom me.”

³⁸Bileam gêjô eŋ awa gebe “Ôlic acgom, aê tec gadêŋ aôm gamêŋgac. Mago aê oc katôm gebe jasôm biŋ me masi. Aê oc jasôm biŋ tageŋ, taŋ Anôtô êkêŋ êsêp aocsuŋ naŋgeŋ, lasê.”

³⁹Go Bileam kêsêlêŋ gêwiŋ Balak e sêô lasê Kiriat-Husot.

⁴⁰Ma Balak kêkêŋ bulimakao to domba kêtu da ma kêsakiŋ ŋagêdô gêdêŋ Bileam to kasêga, taŋ sêmoa sêwiŋ eŋ naŋ.