Namba 21:24-33

²⁴Tasol ol Israel i kilim planti Amor long pait na kisim graun bilong ol, stat long wara Arnon i go inap long wara Jabok long hap not. Dispela em i mak bilong kantri Amon, na ol Amon i gat strongpela lain ami i save lukautim dispela mak.

²⁵Orait ol Israel i kisim taun Hesbon na ol arapela taun i stap klostu long en na olgeta taun bilong ol Amor, na ol i sindaun long ol dispela taun.

²⁶Hesbon em i namba wan taun bilong Sihon, king bilong ol Amor. Bipo Sihon i bin pait long wanpela king bilong Moap na kisim olgeta hap graun bilong en, i go inap long wara Arnon.

²⁷Long dispela as tasol na ol man bilong kirapim song i save singim song olsem, “Yupela kam long Hesbon, em taun bilong King Sihon. Mipela i laik lukim ol i wokim Hesbon gen bai em i stap strong.

²⁸Bipo ol ami bilong Sihon i lusim dispela taun na ol i go pait strong long taun Ar long kantri Moap, olsem paia i kukim kunai. Na ol soldia i bagarapim dispela taun na pinisim tru ol bikman i stap long ples maunten bilong wara Arnon.

²⁹Sori tru long yupela ol manmeri bilong Moap. Bai yupela i gat bikpela hevi tru. Yupela ol manmeri i save lotu long giaman god Kemos, yupela bai i bagarap. Dispela god bilong yupela em i save mekim ol man i bihainim em ol i lusim ples na i stap olsem ol tripman. Na em i mekim Sihon em king bilong ol Amor, i holimpas ol meri bilong yupela na ol i mekim wok kalabus bilong en.

³⁰Tasol nau mipela i kilim ol pinis, em ol lain bilong taun Hesbon na bilong taun Dibon tu. Mipela i bagarapim ol nogut tru, i go inap long taun Nofa klostu long taun Medeba.”

³¹Orait ol Israel i kisim ol taun bilong ol Amor na ol i sindaun long ol dispela taun.

³²Na bihain Moses i salim ol man i go long taun Jaser na ol i painim gutpela rot bilong bagarapim dispela taun. Na ol Israel i pait long Jaser na kisim dispela taun wantaim ol ples i stap klostu long en. Na ol i rausim ol Amor i bin i stap long ol dispela ples.

³³Na bihain ol Israel i tanim na bihainim rot i go long kantri Basan. Ol i go kamap na Ok, king bilong Basan, wantaim ol soldia bilong en i kam na pait long ol Israel long taun Edrei.