Namba 21:20-30

²⁰Na ol i lusim Bamot na i go long dispela ples daun long kantri Moap i stap klostu long maunten Pisga. Long dispela hap ol man i ken lukluk i go long ples drai.

²¹Bihain ol Israel i salim tok i go long Sihon, king bilong ol Amor. Ol i tok olsem,

²²“Mipela i laik bai yu larim mipela i wokabaut i go long kantri bilong yu. Mipela i no inap lusim rot na kalap i go long ol gaden kaikai na gaden wain bilong yupela. Na bai mipela i no ken dringim wara long ol hul wara bilong yupela. Mipela bai i bihainim bikrot tasol inap mipela i lusim kantri bilong yupela.”

²³Tasol King Sihon i no laik larim ol Israel i wokabaut long kantri bilong en. Em i bungim ol soldia bilong en na ol i go long taun Jahas long ples drai na pait long ol Israel.

²⁴Tasol ol Israel i kilim planti Amor long pait na kisim graun bilong ol, stat long wara Arnon i go inap long wara Jabok long hap not. Dispela em i mak bilong kantri Amon, na ol Amon i gat strongpela lain ami i save lukautim dispela mak.

²⁵Orait ol Israel i kisim taun Hesbon na ol arapela taun i stap klostu long en na olgeta taun bilong ol Amor, na ol i sindaun long ol dispela taun.

²⁶Hesbon em i namba wan taun bilong Sihon, king bilong ol Amor. Bipo Sihon i bin pait long wanpela king bilong Moap na kisim olgeta hap graun bilong en, i go inap long wara Arnon.

²⁷Long dispela as tasol na ol man bilong kirapim song i save singim song olsem, “Yupela kam long Hesbon, em taun bilong King Sihon. Mipela i laik lukim ol i wokim Hesbon gen bai em i stap strong.

²⁸Bipo ol ami bilong Sihon i lusim dispela taun na ol i go pait strong long taun Ar long kantri Moap, olsem paia i kukim kunai. Na ol soldia i bagarapim dispela taun na pinisim tru ol bikman i stap long ples maunten bilong wara Arnon.

²⁹Sori tru long yupela ol manmeri bilong Moap. Bai yupela i gat bikpela hevi tru. Yupela ol manmeri i save lotu long giaman god Kemos, yupela bai i bagarap. Dispela god bilong yupela em i save mekim ol man i bihainim em ol i lusim ples na i stap olsem ol tripman. Na em i mekim Sihon em king bilong ol Amor, i holimpas ol meri bilong yupela na ol i mekim wok kalabus bilong en.

³⁰Tasol nau mipela i kilim ol pinis, em ol lain bilong taun Hesbon na bilong taun Dibon tu. Mipela i bagarapim ol nogut tru, i go inap long taun Nofa klostu long taun Medeba.”