Namba 20:4-11

⁴Amagêc awê Apômtaunê gôlôac mêŋaô lasê gamêŋ sawa tonec gebe aêac amac êndu toma bulimakaogeŋ êtu asageŋŋa.

⁵Amagêc awê aêac awi Aiguptu siŋ e aô lasê gamêŋ sec tonec kêtu asageŋŋa. Aêac atôm gebe asê gêŋ teŋ atom. Jambô to wain ma aiŋ masi. ma bu anômŋa masi amboac tonaŋgeŋ.”

⁶Go Mose agêc Aron sêwi gôlôac siŋ sêja lômbec ŋasacgêdô ma sêu tauŋ laŋôŋanô jagêdêŋ nom. Go Apômtaunê ŋawasi geoc tau lasê gêdêŋ êsêagêc.

⁷Ma Apômtau kêsôm gêdêŋ Mose gebe

⁸“Ôkôc nêm tôc ma amagêc têwam Aron akac gôlôac sa sêpi tageŋ. Go ôsôm biŋ êndêŋ poc ôkô êsêac laŋôŋnêm gebe poc êkêŋ bu. Amboac tonaŋ ôŋgôm bu êsa aŋga poc êtu êsêacŋa ma ôkêŋ êndêŋ gôlôac to nêŋ bulimakao sênôm.”

⁹Ma Mose kêkôc tôc, taŋ gêc Apômtaunê gamêŋ naŋ, kêtôm Apômtau kêjatu eŋ.

¹⁰Go Mose agêc Aron sêkac gôlôac sa sêpi tageŋ sêkô sêwiŋ poc ma kêsôm gêdêŋ êsêac gebe “Amac gêsômtêkwa-ŋatoŋwaga, aŋô acgom. Aêac oc atôm gebe aŋgôm bu êsa aŋga poc ma akêŋ êndêŋ amac me masi.”

¹¹Go Mose gêôc lêma sa ma gêjac poc ŋa nê tôc kêtu dim luagêc, ma bu kapôêŋ kêsa, ma gôlôac to nêŋ bulimakao sênôm e kêtôm.