Namba 11:6-17

⁶Mago galoc nêŋ ôliŋwalô gêbacnê. Gêŋ ŋajam teŋ gêc atom. Mateŋ gê mana tageŋ.”

⁷Mana tau kêtôm mêcgauc ma ŋalaŋô kêtôm uc ŋatêkwi, taŋ ŋajaŋa kêsa naŋ.

⁸Lau sêsêlêŋ-sêsêlêŋ ma sejoŋ gêŋ tau sa jasêlêsa popoc me sepeŋ kêsêp toŋtoŋ. Go seno kêsêp ku ma sêpac polom tapa-tapa. Gêŋ tau ŋasaê kêtôm polom tapa-tapa, taŋ sêpac ŋa ŋalêsi naŋ.

⁹Gêdêŋ gêbêc maniŋ kêsêp nêŋ gamêŋ becŋa ma mana kêsêp gêwiŋ.

¹⁰Mose gêŋô launêŋ gôlôac têtaŋ gêdêŋ-gêdêŋgeŋ sêŋgôŋ nêŋ bec ŋasacgêdô, tec Apômtau têtac ŋandaŋ kêsa ŋanô ma Mose gêlic sec amboac tonaŋgeŋ.

¹¹Go Mose kêsôm gêdêŋ Apômtau gebe “Aôm gôgôm nêm sakiŋwaga sec kêtu asageŋŋa. Ma aê gajac matamanô ŋajam atom kêtu asageŋŋa, tec kôkêŋ lau samob tonec nêŋ gêŋwapac kêkôniŋ aê.

¹²Aê kakêkam lau samob tonaŋ e kakôc êsêac me, tec aôm kôsôm gêdêŋ aê gebe ‘Ôsip êsêac sa êtôm jaomwagao kêsip ŋapalê dedec, taŋ gênôm su naŋ, ma ôkêŋ êsêac sêna gamêŋ, taŋ aê katôc lemoc, gebe jakêŋ êndêŋ tameŋi naŋ.’ Amboac tonaŋ me.

¹³Aê jakôc gwada aŋga ondoc, gebe jakêŋ êndêŋ lau tonec sêniŋ. Êsêac têtaŋ gêdêŋ aê ma sêsôm gebe ‘Ôkêŋ gwada êndêŋ aêac aniŋmaŋ.’

¹⁴Aê taucgeŋ jaôc lau samob tonaŋ nêŋ gêŋwapac jatôm atom, gebe ŋawapac sec.

¹⁵Mago aôm embe taêm ênam gebe ôŋgôm aê amboac tonaŋ, naŋgo ônac aê êndu, go jajala gebe gajac matamanô ŋajam ma jalic gêŋwapac, taŋ êtap aê sa naŋ, atom.”

¹⁶Ma Apômtau kêsôm gêdêŋ Mose gebe “Ôjaliŋ ŋoc lau 70 sa aŋga lau Israel nêŋ laumata, taŋ kôjala êsêac têtu launêŋ laumata to gejobwaga. Ôwê êsêac sêna lômbec ma ôndênaŋ êsêac sêkô tônê sêwiŋ aôm.

¹⁷Su, go aê jasêp jawac ma janam biŋgalôm jawiŋ aôm. Go jakôc ŋalau, taŋ kêpi aôm naŋ, ŋagêdo su ma jakêŋ elom êsêac ma êsêac sêôc launêŋ gêŋwapac sêwiŋ aôm, gebe aôm taômgeŋ ôc gêŋwapac tau êtiam atom.