Namba 11:13-25

¹³Ämawebe ŋo tomta kot näwatkaŋ. Wa! Ämawebe päke ŋo yepmäŋ towikta tom de nanik yäpet?

¹⁴Näkŋagän ämawebe päke ŋo täga nämo watäni iret. Näk täga nämo, u bäräpiinik.

¹⁵Bäräpi ude pen namikta nadäŋpäŋä eruk butewaki nadäŋ namiŋpäŋ pengän nutpewi kumba! Uyaku bäräpi u wari nämo kaŋ kotawa!

¹⁶Moses ude yäŋirän Yawetä ŋode iwetkuk; Eruk, Isrel ämawebe täŋo äma ekäni 70 ude yabäŋ ahä yäk. Äma uwä intäjukun äma wäpi nikek irirä yabäk täyan upäŋ yäŋ-yäkŋat yäpmäŋ näkŋa käbeyä eŋiken äbä gäkŋakät bok kaŋ irut.

¹⁷Täŋiri näkä äpakaŋ gäkkät man yäŋpäŋ-nadäk api täde. Ude täŋpäŋ Munapik gäkä terak itak unitäŋo moräki yäpmäŋpäŋ Munapik äma unita imaka, api yämet. Täŋpäkaŋ äma unitä gäk täŋkentäwäkaŋ Isrel ämawebe täŋo bäräpi gäkkät bok kaŋ kotawut. Ude täŋirä gäkŋagän nämo api kotawen.

¹⁸Eruk, ämawebe ŋo yäwet; Kwepta yäŋpäŋ iŋamnaken siwoŋi itta baga mantä yäyak ude täŋtuŋum täkot. Kwep uwä tom api näneŋ yäk. Inä ŋode yäŋkaŋ konäm kähän yäŋkubit-kubit yäŋkuŋo u Yawetä nadäŋ tamiŋkuk; Tom depäŋ näne? Isip itkumäŋo u tägagän itkumäŋonik yäŋ yäŋirä Yawetä nadäŋ tamiŋpäŋ tom u tamänkaŋ api näneŋ!

¹⁹Tom uwä kepma kubä ba yarä ba 5 ba 10 ba 20 udeta nämo api näneŋ.

²⁰Nämo, tomgän naŋ yäpmäŋ kuŋkä gaŋani pähap nadäŋpäŋ taräki yäŋ api yäneŋ. Imata, komepak kubäta tomgänpäŋ naŋ yäpmäŋ kunayäŋ täkaŋ unita ude api yäneŋ. Inä Yawe, bämopjinken it täyak u mäde ut imiŋpäŋ ŋode yäŋpäŋ-kaŋiwat täŋkuŋ; Imata Isip kome kakätäŋpeŋ äbumäŋonik? yäk. Kädet ude täŋkuŋo unita kowata ude api ahäŋ tamek.

²¹Yawetä Moses ude iweränä Mosestä kowata ŋode iwetkuk; Yawe nadätan? Ämawebe äbot pähap 600 tausen udepäŋ watäni it täyat ŋonita tom depäŋ komepak kubäta täga api yäpmäŋ towiwen yäŋ näwetan?

²²Bulimakau sipsip päke u kudup däpmäŋpäŋ naŋpäŋ nadäwä täganeŋ? Ba gwägu tom gwägu pähap gänaŋ it täkaŋ päke u kudup naŋpäŋ täga nadäneŋ? Nämo!

²³Ude yäwänä Yawetä Moses kowata ŋode iwetkuk; Näkŋo kehärominata nadäŋiri äpani täyak? Ude täga nämo täŋpek yäŋ nadätan? Ude nadätan u täŋpäwä ätu nanak itkaŋ kehäromina itak ba nämo yäŋ bureni kaŋpäŋ nadäwayäŋ.

²⁴Mosestä man u nadäŋkaŋ yäman äpmoŋpäŋ Yawetä iwetkuko u ämawebe yäwetkuk. Yäwetpäŋ äma ekäni 70 u yäŋpäbä kubäkengän yepmaŋpäŋ yäwerän käbeyä eŋi u it gwäjiŋkuŋ.

²⁵Ude irirä Yawetä gubam gänaŋ äpä Moseskät yäŋpäŋ-nadäk täŋpäŋ Munapik Moses terak itkuko unitäŋo moräki yäpmäŋpäŋ Munapik äma ekäni 70 uterak peŋ yämiŋkuk. Täŋpäkaŋ Munapiktä magärirän kadäni keräpigän man inipärik kubä, Anutu täŋo meni jinom yäpmäŋpäŋ yäwanitä-yäŋ yäŋkuŋ.