Namba 11:12-30

¹²Aê kakêkam lau samob tonaŋ e kakôc êsêac me, tec aôm kôsôm gêdêŋ aê gebe ‘Ôsip êsêac sa êtôm jaomwagao kêsip ŋapalê dedec, taŋ gênôm su naŋ, ma ôkêŋ êsêac sêna gamêŋ, taŋ aê katôc lemoc, gebe jakêŋ êndêŋ tameŋi naŋ.’ Amboac tonaŋ me.

¹³Aê jakôc gwada aŋga ondoc, gebe jakêŋ êndêŋ lau tonec sêniŋ. Êsêac têtaŋ gêdêŋ aê ma sêsôm gebe ‘Ôkêŋ gwada êndêŋ aêac aniŋmaŋ.’

¹⁴Aê taucgeŋ jaôc lau samob tonaŋ nêŋ gêŋwapac jatôm atom, gebe ŋawapac sec.

¹⁵Mago aôm embe taêm ênam gebe ôŋgôm aê amboac tonaŋ, naŋgo ônac aê êndu, go jajala gebe gajac matamanô ŋajam ma jalic gêŋwapac, taŋ êtap aê sa naŋ, atom.”

¹⁶Ma Apômtau kêsôm gêdêŋ Mose gebe “Ôjaliŋ ŋoc lau 70 sa aŋga lau Israel nêŋ laumata, taŋ kôjala êsêac têtu launêŋ laumata to gejobwaga. Ôwê êsêac sêna lômbec ma ôndênaŋ êsêac sêkô tônê sêwiŋ aôm.

¹⁷Su, go aê jasêp jawac ma janam biŋgalôm jawiŋ aôm. Go jakôc ŋalau, taŋ kêpi aôm naŋ, ŋagêdo su ma jakêŋ elom êsêac ma êsêac sêôc launêŋ gêŋwapac sêwiŋ aôm, gebe aôm taômgeŋ ôc gêŋwapac tau êtiam atom.

¹⁸“Go ôsôm êndêŋ lau gebe ‘Anam dabuŋ taôm êtu eleŋŋa, go atap gwada sa, gebe amac ataŋ kêsô Apômtau taŋasuŋ gebe “Asa oc êkêŋ gwada êndêŋ aêac aniŋ. Aŋga Aiguptu tec amoa ŋajamgen.” Kêtu tonaŋŋa Apômtau êkêŋ gwada êndêŋ amac aniŋ.

¹⁹Eŋ êkêŋ gwada bêc tageŋ me luagêc me lemeŋ teŋ me 10 me 20 atom,

²⁰amac aniŋ gwada ajôŋ samuc teŋ e ôlim ŋakam êsa ma nêm ŋalêlôm êli amac. Biŋ tonaŋ êtap amac sa gebe atiŋ Apômtau, tec gêmoa gêwiŋ amac nec, su ma ataŋ to asôm gêdêŋ eŋ gebe “Aêac awi Aiguptu siŋ kêtu asageŋŋa.” ’”

²¹Ma Mose kêsôm gebe “Aê gamoa gawiŋ siŋwaga 600,000 ma aôm kôsôm gebe ‘Aê oc jakêŋ gwada êndêŋ amac aniŋ êtôm ajôŋ samuc teŋ.’

²²Êsêac sêmbuc domba to bulimakao e êtôm êsêac me. Me i gwêcŋa samob sêpi tageŋ, go êtôm êsêac me.”

²³Mago Apômtau kêsôm gêdêŋ Mose gebe “Amboac ondoc, Apômtau lêma kêtu dambê me. Galoc aôm oc ôlic gebe ŋoc biŋ, taŋ gajac mata gêdêŋ aôm naŋ, oc ŋanô me masi.”

²⁴Go Mose kêsa gêja ma kêsôm Apômtaunê biŋ gêdêŋ lau, ma kêjaliŋ lau 70 sa aŋga lau Israel nêŋ laumata ma kêdênaŋ êsêac sêkô sêgi lômbec auc.

²⁵Su, go Apômtau kêsêp gêmêŋ totaogeŋ mêŋkêsôm biŋ gêdêŋ Mose ma kêkôc ŋalau, taŋ kêpi Mose naŋ, ŋagêdô su, ma kêkêŋ gelom laumata 70. Ŋalau gelom êsêac e sep tageŋ seoc biŋ lasê ŋapaŋ.

²⁶Ma ŋac luagêc gacgeŋ sêmoa gamêŋ becŋa. Ŋac teŋ nê ŋaê Eldad, ma teŋ nê Medad. Ma ŋalau gelom êsêagêc gêwiŋ. Êsêagêcnêŋ ŋaê kêsêp laumatanêŋ ŋaêmôkê gêwiŋ, tageŋ êsêagêc sêsa lômbec sêja sêwiŋ atom. Mago êsêagêc seoc biŋ lasê sêmoa gamêŋ becŋa.

²⁷Ma ŋapalê teŋ kêlêti gêdêŋ Mose gêja ma kêsôm gêdêŋ eŋ gebe “Eldad agêc Medad seoc biŋ lasê sêmoa gamêŋ becŋa.”

²⁸Go Mosenê sakiŋwaga Nun latu Josua, taŋ Mose kêjaliŋ eŋ sa gêwiŋ laumata naŋ, kêsôm gebe “O ŋoc ŋatau Mose, ônac jao biŋ tau êndêŋ êsêagêc.”

²⁹Mago Mose kêsôm gêdêŋ eŋ gebe “Aôm gobe ômêtôc êsêagêc ôjô aê su me. Aê gabe Apômtau êkêŋ nê Ŋalau êpi nê lau samob e samob seoc biŋ lasê.”

³⁰Su, go Mose to lau Israel nêŋ laumata sêmu sêja gamêŋ kêtiam.