Nəğmələr Nəğməsi 7:2-11

²Göbəyin cürbəcür şərabların tükənmədiyi Dəyirmi piyaləyə bənzəyir. Belin zanbaqlara bürünən Bir dəstə sünbülə bənzəyir,

³Döşlərin cüt ceyran balası kimi, Əkiz maral balası kimi qoşadır.

⁴Boynun fil dişi qülləsi kimi gözəldir. Gözlərin Bat-Rabbim darvazası yanındakı Xeşbon hovuzuna bənzəyir. Burnun Dəməşqə baxan Livan qülləsi kimi gözəldir.

⁵Başın Karmel dağı kimi dik durur, Başındakı tellər tünd qırmızı rəngə çalır, Padşah zülfünün əsiri olur.

⁶Nə qəşəngsən, nə şirinsən, Ey məlahətli sevgilim.

⁷Qamətin xurma ağacına, Döşlərin salxımlara bənzəyir.

⁸Dedim: «Qoy xurma ağacına çıxım, Meyvəli budaqlarından yapışım». Döşlərindən üzüm salxımları kimi dadım, Nəfəsindən alma ətrini duyum.

⁹Dodaqların gözəl şərab dadı verir. Qız: Bu şərab birbaşa sevgilim üçün tökülsün, Biz yatanların dodaqlarına süzülsün.

¹⁰Mən sevgiliminkiyəm, Onun meyl etdiyi mənəm.

¹¹Sevgilim, gəl çölə gedək, Kəndlərdə gecələyək.