Números 26:2-16

²«Llapan Israelcunata sinsuy, castanpa-cama shuyni-cama juctapis mana cachaypa ishcay chunca watayojpita janaman guërrapaj alli cajllata.»

³Chaura Eleazarwan Moisesga Moab ragra aywaj pampacho llapan Israelcunata willaparan. Chay pampaga caycan Jericöpa chimpan Jordán mayupa jucaj lädunpami.

⁴Willaparan ishcay chunca watayojpita janaman cäga Moisesta Tayta Dios nishanno llapan sinsucunanpaj. Egiptupita llojshicamoj Israelcunaga caran caycunami:

⁵Israelpa mayur wamran Rubenpita mirajcunaga caran: Enoc casta, Falú casta,

⁶Hezrón casta, Carmi casta runacuna.

⁷Sinsuptin Rubén trïbu runacunaga caran chuscu chunca quimsa waranga ganchis pachac quimsa chuncan (43,730).

⁸Falüpa wamran caran Eliab.

⁹Eliabpana wamrancuna caran: Nemuel, Datán, Abiram. Datanwan Abiramga Corëwan shuntacaycur Moisespa, Aaronpa, Tayta Diospa contran jatariran. Paycunaga mayur tantiyachej runacunami caran.

¹⁰Chayno contran jatarishanpitami pachapa shimin quichacar Datanta, Abiramta, Corëtawan micucurcuran. Contran ricacoj cäga llapan wañuran. Ninana rupar ushacurcuran ishcay pachac pichga chuncan (250) runacunata. Chay runacuna wañuran waquin Israelcunapis ricacunanpämi.

¹¹Chayno Coré wañuptinpis wamrancunaga manami wañuranchu.

¹²Simeón trïbu runacuna caran: Nemuel, Jamín, Jaquín,

¹³Zera, Saúl casta runacuna.

¹⁴Sinsuptin Simeón trïbu runacuna caran ishcay chunca ishcay waranga ishcay pachacnin (22,200).

¹⁵Gad trïbu cajna caran Zefón, Hagui, Suni,

¹⁶Ozni, Eri, Arod, Areli casta runacuna.