NÚMEROS 26:10-57

¹⁰Huan motlapo tlali huan quintolo ni ome tlacame ihuaya Coré. Nojquiya ipan san se tonal TOTECO quinmicti ica tlitl 250 masehualme catli quintoquiliyayaj. Nochi ya ni elqui se hueyi tlamachtili para nochi nopa israelitame catli mocajque.

¹¹Pero ipan nopa tonali itelpocahua Coré amo itztoyaj ihuaya inintata huan amo mijque.

¹²Simeón, iompa telpoca Israel, huejcajya quinpixqui macuilti itelpocahua: Nemuel, Jamín, Jaquín, Zera huan Saúl. Huan ininteipan ixhuihua sesen ni tlacame mochijque familias huejhueyi. Iteipan ixhuihua Nemuel mochijque nopa nemuelitame. Iteipan ixhuihua Jamín mochijque nopa jaminitame. Iteipan ixhuihua Jaquín mochijque nopa jaquinitame.

¹³Iteipan ixhuihua Zera mochijque nopa zeraitame. Iteipan ixhuihua Saúl mochijque nopa saulitame.

¹⁴Huan ipan nopa tonali quema quinpojque catli itztoyaj ipan nochi familias tlen iteipan ixhuihua Simeón, quinpojque 22 mil 200 tlahuilanca tlacame.

¹⁵Gad, itelpoca Israel, huejcajya quinpixqui chicome itelpocahua: Zefón, Hague, Suni, Ozni, Eri, Arod huan Areli. Huan ininteipan ixhuihua sesen ni tlacame mochijque familias huejhueyi. Iteipan ixhuihua Zefón mochijque nopa zefonitame. Iteipan ixhuihua Hagui mochijque nopa haguitame. Iteipan ixhuihua Suni mochijque nopa sunitame.

¹⁶Iteipan ixhuihua Ozni mochijque nopa oznitame. Iteipan ixhuihua Eri mochijque nopa eritame. Iteipan ixhuihua Arod mochijque nopa aroditame.

¹⁷Iteipan ixhuihua Areli mochijque nopa arelitame.

¹⁸Huan ipan nopa tonali quema quinpojque catli itztoyaj ipan nopa familias tlen iteipan ixhuihua Gad, quinpojque 40 mil 500 tlahuilanca tlacame.

¹⁹Judá, itelpoca Israel, huejcajya quinpixqui ome itelpocahua catli inintoca Er huan Onán. Inijuanti mijque nimantzi ipan nopa tlali Canaán.

²⁰Pero teipa Judá nojquiya quinpixqui sequinoc eyi itelpocahua: Sela, Fares huan Zera. Huan ininteipan ixhuihua sesen ni tlacame mochijque familias huejhueyi. Iteipan ixhuihua Sela mochijque nopa selaitame.

²¹Iteipan ixhuihua Fares mochijque nopa faresitame. Iteipan ixhuihua Zera mochijque nopa zeraitame. Huan Judá itelpoca catli itoca Fares quinpixqui ome itelpocahua, Hezrón huan Hamul catli mochijque nopa hezronitame huan nopa hamulitame.

²²Huan ipan nopa tonali quema quinpojque catli itztoyaj ipan nopa familias tlen iteipan ixhuihua Judá, quinpojque 76 mil 500 tlahuilanca tlacame.

²³Isacar, itelpoca Israel, huejcajya quinpixqui nahui itelpocahua: Tola, Fúa, Jasub huan Simrón. Huan ininteipan ixhuihua mochijque familias huejhueyi. Iteipan ixhuihua Tola mochijque nopa tolaitame. Iteipan ixhuihua Fúa mochijque nopa fuaitame.

²⁴Iteipan ixhuihua Jasub mochijque nopa jasubitame. Iteipan ixhuihua Simrón mochijque nopa simronitame.

²⁵Huan ipan nopa tonali quema quinpojque catli itztoyaj ipan nopa familias tlen iteipan ixhuihua Isacar, quinpojque 64 mil 300 tlahuilanca tlacame.

²⁶Zabulón, itelpoca Israel, huejcajya quinpixqui eyi itelpocahua: Sered, Elón huan Jahleel. Huan ininteipan ixhuihua sesen ni tlacame mochijque familias huejhueyi. Iteipan ixhuihua Sered mochijque nopa sereditame. Iteipan ixhuihua Elón mochijque nopa elonitame. Iteipan ixhuihua Jahleel mochijque nopa jehleelitame.

²⁷Huan ipan nopa tonali quema quinpojque catli itztoyaj ipan nopa familias tlen iteipan ixhuihua Zabulón, quinpojque 60 mil 500 tlahuilanca tlacame.

²⁸José, itelpoca Israel, huejcajya quinpixqui ome itelpocahua: Manasés huan Efraín.

²⁹Tlen Manasés quisqui ome familias huejhueyi. Se quisqui tlen itelpoca catli itoca Maquir. Huan iteipan ixhuihua mochijque nopa maquiritame. Huan ne se hueyi familia quisqui tlen itelpoca catli itoca Galaad catli elqui itelpoca Maquir. Huan iteipan ixhuihua Galaad mochijque nopa galaaditame.

³⁰Huan itelpoca Galaad catli itoca Jezer, iteipan ixhuihua mochijque nopa jezeritame. Huan itelpoca Galaad catli itoca Helec, iteipan ixhuihua mochijque nopa helequitame.

³¹Huan itelpoca Galaad catli itoca Asriel, iteipan ixhuihua mochijque nopa asrielitame. Huan itelpoca Galaad catli itoca Siquem, iteipan ixhuihua mochijque nopa siquemitame.

³²Huan itelpoca Galaad catli itoca Semida, iteipan ixhuihua mochijque nopa semidaitame. Huan itelpoca Galaad catli itoca Hefer, iteipan ixhuihua mochijque nopa heferitame.

³³Hefer quipixqui itelpoca catli itoca Zelofehad, pero yaya amo quipixqui niyon se itlaca cone. Zelofehad san quinpixqui iichpocahua catli inintoca: Maala, Noa, Hogla, Milca huan Tirsa.

³⁴Huan ipan nopa tonali quema quinpojque catli itztoyaj ipan nopa familias tlen iteipan ixhuihua Manasés, quinpojque 52 mil 700 tlahuilanca tlacame.

³⁵Por José itelpoca catli itoca Efraín quinpixqui eyi itelpocahua: Sutela, Bequer huan Tahán. Huan ininteipan ixhuihua sesen ni tlacame mochijque familias huejhueyi. Iteipan ixhuihua Sutela mochijque nopa sutelaitame. Iteipan ixhuihua Bequer mochijque nopa bequeritame. Iteipan ixhuihua Tahán mochijque nopa tahanitame.

³⁶Huan Sutela, itelpoca Efraín, quipixqui itelpoca catli itoca Erán huan iteipan ixhuihua mochijque nopa eranitame.

³⁷Huan ipan nopa tonali quema quinpojque catli itztoyaj ipan nopa familias tlen iteipan ixhuihua Efraín, quinpojque 32 mil 500 tlahuilanca tlacame. Huajca ya nimitzilhuijtoc tlen iteipan ixhuihua José huan catlique huejhueyi familias quisque ipan ya.

³⁸Benjamín, itelpoca Israel, huejcajya quinpixqui macuili itelpocahua: Bela, Asbel, Ahiram, Sufam huan Hufam. Huan ininteipan ixhuihua sesen ni tlacame mochijque familias huejhueyi. Iteipan ixhuihua Bela mochijque nopa belaitame. Iteipan ixhuihua Asbel mochijque nopa asbelitame. Iteipan ixhuihua Ahiram mochijque nopa ahiramitame.

³⁹Iteipan ixhuihua Sufam mochijque nopa sufamitame. Iteipan ixhuihua Hufam mochijque nopa hufamitame.

⁴⁰Huan Bela, itelpoca Benjamín, quinpixqui itelpocahua Ard huan Naamán. Huan ininteipan ixhuihua mochijque nopa arditame huan nopa naamitame.

⁴¹Huan ipan nopa tonali quema quinpojque catli itztoyaj ipan nopa familias tlen iteipan ixhuihua Benjamín, quinpojque 45 mil 600 tlahuilanca tlacame.

⁴²Dan, itelpoca Israel, huejcajya quipixqui san se itelpoca catli itoca eliyaya Súham. Huan iteipan ixhuihua Súham mochijque nopa suhamitas.

⁴³Huan ipan nopa tonali quema quinpojque catli itztoyaj ipan nopa familias tlen iteipan ixhuihua Dan, quinpojque 64 mil 400 tlahuilanca tlacame.

⁴⁴Aser, itelpoca Israel, huejcajya quinpixqui eyi itelpocahua: Imna, Isúi huan Bería. Huan ininteipan ixhuihua sesen ni tlacame mochijque familias huejhueyi. Iteipan ixhuihua Imna mochijque nopa imnitame. Iteipan ixhuihua Isúi mochijque nopa isuitame. Iteipan ixhuihua Bería mochijque nopa beriaitame.

⁴⁵Huan Bería, itelpoca Aser, quinpixqui itelpocahua catli inintoca Heber huan Malquiel. Huan iniixhuihua mochijque nopa heberitame huan malquielitame.

⁴⁶(Nojquiya Aser quipixqui se ichpocatl catli itoca Sera.)

⁴⁷Huan ipan nopa tonali quema quinpojque catli itztoyaj ipan nopa familias tlen iteipan ixhuihua Aser quinpojque 53 mil 400 tlahuilanca tlacame.

⁴⁸Neftalí, itelpoca Israel, huejcajya quinpixqui nahui itelpocahua: Jahzeel, Guni, Jezer huan Silem. Huan iniixhuihua sesen ni tlacame mochijque familias huejhueyi. Iteipan ixhuihua Jahzeel mochijque nopa jahzeelitame. Iteipan ixhuihua Guni mochijque nopa gunitame.

⁴⁹Iteipan ixhuihua Jezer mochijque nopa jezeritame. Iteipan ixhuihua Silem mochijque nopa silemitame.

⁵⁰Huan ipan nopa tonali quema quinpojque catli itztoyaj ipan nopa familias tlen iteipan ixhuihua Neftalí, quinpojque 45 mil 400 tlahuilanca tlacame.

⁵¹Huajca quema tlanque moijcuilohuaj nochi nopa israelita tlacame catli huelque yohuij ipan tlahuilancayotl, quinpojque 601 mil 730 tlacame.

⁵²Huajca TOTECO quiilhui Moisés:

⁵³“Quema anmoaxcatise nopa cuali tlali catli nimechmacas, xiquinmajmaca nopa tlali ica sesen nopa huejhueyi familias quen ininmiyaca tlacame catli moijcuilojtoque ama ipan ni censo.

⁵⁴Nopa huejhueyi familias catli achi más miyaqui tlacame quinpiyaj tiquinmacas achi más hueyi tlali. Huan nopa huejhueyi familias catli amo miyaqui tlacame quinpiyaj, tiquinmacas quentzi tlali.

⁵⁵Pero para tijmatis campa quiselis sesen hueyi familia monequi timahuiltis ica piltetzitzi. Quej nopa tijmatis canque sesen hueyi familia moaxcatis itlal.

⁵⁶Huan nopa tlali catli quintocarohua moxelhuilise quen quinextis nopa suerte iixpa TOTECO para elis iniaxca. Huan nopa hueyi familia catli achi hueyi quiselis achi más, huan catli tziquitetzi, amo más miyac tlali quiselis.”

⁵⁷Leví, itelpoca Israel, huejcajya quinpixqui eyi itelpocahua: Gersón, Coat huan Merari. Huan ininteipan ixhuihua sesen ni tlacame mochijque familias catli huejhueyi. Iteipan ixhuihua Gersón mochijque nopa gersonitame. Iteipan ixhuihua Coat mochijque nopa coatitame. Iteipan ixhuihua Merari mochijque nopa meraitame.