NÚMEROS 24:4-21

⁴Nijcactoc itlajtol Toteco tlen quipiya nochi chicahualistli, huan niquitztoc ya tlen quipiya nochi chicahualistli huan tlen nechnextilijtoc. Huan quema nihuetzqui iixtla, nechtlapohuili noixtiyol huan nochi nijmachili. Huajca ya ni tlen nechilhui para ininpantis:

⁵Nelía paquij iteipa ixhuihua Jacob ipampa nopa tlatiochihualistli tlen quinchiya. Tlayejyectzi elis campa ininchajchaj israelitame huan nopona oncas paquilistli.

⁶Niquinita para mosemantoc ininchajchaj campa hueli ipan huejhueyi tlamayamitl campa xoxohuic sacapetlatl. Nesi queja se hueyi xochimili tlen tlahuel yejyectzi huan tlen nochi temaca pampa eltoc atentli. Nesi queja campa miyac áloes tlen TOTECO quitoctoc. Itztoque queja miyac tiocuatini tlen tlatoctli ateno.

⁷Miyac atl quipiyase israelitame hasta mocahuas. Quipiyase atl para quiatequise ininmil. Quipiyase inintlanahuatijca tlen más hueyi que nochi totlanahuatijcahua. Huan tlahuel hueyi elis itlanahuatil.

⁸Toteco Dios tlen quinquixti ipan tlali Egipto itztoc ininhuaya. Yajaya ininchicahualis queja se hueyi toro quipiya huejhueyi icuacua. TOTECO quintzontlamiltis nochi tlacame ipan nochi tlaltini tlen quincualancaitaj. Quena, quinpostequilis iniomiyo, huan quinmictis ica cuatlamintli.

⁹Nopa israelitame itztoque queja se tecuani tlen motectoc para mosiyajcahuas, huan axaca motemaca para quiixitis. ¡TOTECO quintiochihuas tlen inmechtiochihua, inisraelitame, huan quintelchihuas nochi tlen inmechtelchihuaj!”

¹⁰Huajca quema Tlanahuatijquetl Balac quicajqui nopa tlajtoli tlen Balaam quiijto, tlahuel cualanqui ihuaya, huan momatejtejtzonqui huan quiilhui: ―Na nimitznotzqui para xiquintelchihua nocualancaitacahua, huan ta hasta eyi huelta tiquintiochijtoc.

¹¹¡Xiquisa nica! Na nijnequiyaya nimitzmacas miyac tlamantli tlen tlahuel patiyo, pero Toteco ax quinejqui ma nimitzmaca.

¹²Huan Balaam quiilhui Tlanahuatijquetl Balac: ―Achtohui niquinilhui nopa tlacame tlen tinechtitlanili

¹³para yonque Tlanahuatijquetl Balac nechmacasquía ichaj temitoc ica oro huan plata, ax hueli niquixpanos tlen nechilhuía TOTECO. Ax tleno tlen cuali, niyon tlen ax cuali niquijtos san pampa na nijnequi niquijtos. San tlen TOTECO nechilhuía, ya nopa niquijtos. ¿Ax queja nopa niquinilhui?

¹⁴Huan ama, quena, nimocuepas notlal, pero achtohui nimitzilhuis tlen ni israelitame quinchihuilise imotlacajhua teipa.

¹⁵Huajca Balaam sampa camatqui queja se tlachixquetl huan quiijto ni tlajtoli: “Ya ni notlajtol niBalaam, niicone Beor. Ama cuali niquita tlen huala.

¹⁶Nicamatis na tlen nijcactoc itlajtol TOTECO. Quena, Toteco tlen más hueyi nechmachiltijtoc ni tlen ya quimati. Niquitztoc ya tlen quipiya nochi chicahualistli, huan ya ni tlen nechnextilijtoc.

¹⁷Niquita se tlen axaca ama. Yajaya tlen nijtlachilía nopona hasta tlahuel huejca, yajaya hualas teipa. Monextis se sitlali tlen hualas tlen iteipa ixhuihua Jacob. Yajaya elis se hueyi Tlanahuatijquetl tlen motlalanas ipan ni israelitame. Quintzonpechis Moab ehuani. Quintlamiltis iteipa ixhuihua Set.

¹⁸Israelitame quitlanise nopa tlali Edom huan Seir. Quena, moaxcatise inintlal inincualancaitacahua. Quichihuase huejhueyi tlamantli tlen temajmatise.

¹⁹Se tlanahuatijquetl quisas ipan iteipa ixhuihua Jacob, huan quintzontlamiltis nochi tlen mocahuaj ipan altepetini ipan tlali Edom.”

²⁰Teipa Balaam quitlachili ininchajchaj iteipa ixhuihua Amalec, huan sampa camatqui queja se tlachixquetl huan quiijto ni tlajtoli: “Itlacajhua Amalec hualahuij tlen huejcajquiya, pero se tonal mocahuas ax tleno, tlamisosolijtos.”

²¹Huan Balaam nojquiya quintlachili campa ininchajchaj nopa quenitame, huan sampa camatqui queja se tlachixquetl huan quiijto ni tlajtoli: “Imojuanti inceneos, cuajcuali campa inmomanahuíaj. Initztoque temachtli queja se tototl ica itepasol huejcapa campa huejhueyi tetl.