NÚMEROS 24:2-19

²Huan quema Balaam tlachixqui huan quinitac nochi nopa israelitame catli quiquetztoyaj ininyoyoncalhua ica pamitl, sese ica ihueyi familia imasehualhua, nimantzi Itonaltzi Toteco Dios motlali ipan ya,

³huan pejqui quiijtohua ni camanali: “Ya ni nopa camanali catli niBalaam, niicone Beor, nijhualica. Na nise tlacatl catli cuali hueli niquita catli ininpantis ni israelitame.

⁴Nijcactoc icamanal Toteco catli quipiya nochi chicahualistli, huan niquitztoc ya catli quipiya nochi chicahualistli huan catli nechnextilijtoc. Huan quema nihuetzqui iixpa, nechtlapoli noixteyol huan nochi nijmachili. Huajca ya ni catli nechilhui para ininpantis:

⁵Nelía paquij iteipan ixhuihua Jacob por nopa tlatiochihualistli catli quinchiya. Tlayejyectzi elis campa ininchajchaj israelitame huan nopona oncas paquilistli.

⁶Niquinita para mosemantoc ininchajchaj campa hueli ipan huejhueyi tlamayamitl campa xoxohuic sacapetlatl. Nesi quen se hueyi xochimili catli tlahuel yejyectzi huan catli nochi temaca pampa eltoc atentli. Nesi quen campa miyac áloes catli TOTECO quitoctoc. Itztoque quen miyac tiocuame catli tlatoctli ateno.

⁷Miyac atl quipiyase israelitame hasta mocahuas. Quipiyase atl para quiatequise inintlatochui. Quipiyase inintlanahuatijca catli más hueyi que nochi totlanahuatijcahua. Huan tlahuel hueyi elis itlanahuatil.

⁸Toteco Dios catli quinquixti ipan tlali Egipto itztoc ininhuaya. Yaya ininchicahualis quen se hueyi toro quipiya huejhueyi icuacua. TOTECO quintzontlamiltis nochi masehualme ipan nochi tlalme catli quincualancaitaj. Quena, quinpostequilis iniomiyo, huan quinmictis ica cuatlamintli.

⁹Nopa israelitame itztoque quen se tecuani catli motectoc para mosiyajquetzas, huan amo aqui motemaca para quiixitis. ¡TOTECO quintiochihuas catli anmechtiochihua, anisraelitame, huan quintelchihuas nochi catli anmechtelchihuaj!”

¹⁰Huajca quema Tlanahuatijquetl Balac quicajqui nopa camanali catli Balaam quiijto, tlahuel cualanqui ihuaya, huan momatejtejtzonqui huan quiilhui: ―Na nimitznotzqui para xiquintelchihua nocualancaitacahua, huan ta hasta eyi huelta tiquintiochijtoc.

¹¹¡Xiquisa nica! Na nijnequiyaya nimitzmacas miyac tlamantli catli tlahuel patiyo, pero Toteco amo quinejqui ma nimitzmaca.

¹²Huan Balaam quiilhui Tlanahuatijquetl Balac: ―Achtihui niquinilhui nopa tlacame catli techtitlanili

¹³para masque Tlanahuatijquetl Balac nechmacasquía ichaj temitoc ica oro huan plata, amo hueli niquixpanos catli nechilhuía TOTECO. Amo tleno catli cuali, niyon catli amo cuali niquijtos san pampa na nijnequi niquijtos. San catli TOTECO nechilhuía, ya nopa niquijtos. ¿Amo quej nopa niquinilhui?

¹⁴Huan ama, quena, nimocuepas notlal, pero achtihui nimitzilhuis catli ni israelitame quinchihuilise amomasehualhua teipa.

¹⁵Huajca Balaam sempa camanaltic quen se tlachixquetl huan quiijto ni camanali: “Ya ni nocamanal niBalaam, niicone Beor. Ama cuali niquita catli huala.

¹⁶Nicamanaltis na catli nijcactoc icamanal TOTECO. Quena, Toteco catli más hueyi nechmachiltijtoc ni catli ya quimati. Niquitztoc ya catli quipiya nochi chicahualistli, huan ya ni catli nechnextilijtoc.

¹⁷Niquita se catli amo aqui ama. Yaya catli nijtlachilía nopona hasta tlahuel huejca, yaya hualas teipa. Monextis se sitlali catli hualas tlen iteipan ixhuihua Jacob. Yaya elis se hueyi Tlanahuatijquetl catli motlananas ipan ni israelitame. Quintzonpechis Moab ehuani. Quintlamiltis iteipan ixhuihua Set.

¹⁸Israelitame quitlanise nopa tlali Edom huan Seir. Quena, moaxcatise inintlal inincualancaitacahua. Quichihuase huejhueyi tlamantli catli temajmatise.

¹⁹Se tlanahuatijquetl quisas ipan iteipan ixhuihua Jacob, huan quintzontlamiltis nochi catli mocahuaj ipan altepeme ipan tlali Edom.”