NÚMEROS 23:7-25

⁷Huajca Balaam quiijto ni camanali: “Techchijtoc ma nihuala nica nopa hueyi Tanahuatijquet Balac ipan ni tali Moab. Huan nihualajtoc ten nopa tepeme ipan tali Aram ica campa quisa tonati. ‘Xihuala’, yaya techilhui, ‘xiquintelchihuaqui ni israelitame. Xijcahua mocualancayo ma tejco ica inijuanti para ma ininpanti cati fiero.’

⁸Pero amo hueli niquintelchihuas sinta Toteco amo quintelchijtoc. Amo hueli niquincualancaitas cati TOTECO amo quincualancaita.

⁹Niquinita ten nica itzonco ni hueyi tepet. Nojquiya niquintachilía piltepetzitzi. Niquinita para moiyocatalijtoque ten sequinoc. Inijuanti seyoc tamanti masehualme. Amo quej sequinoc taltipac ehuani.

¹⁰Tahuel miyaqui inijuanti hasta itztoque quej taltepocti. Amo aqui hueli quinpohua. Yon se amo hueli quimatis quesqui itztoque. Nipaquisquía sinta nimiquisquía xitahuac iixpa TOTECO quej inijuanti. Ma nimiqui ica nopa tatiochihualisti cati se israelita quipiya.”

¹¹Huajca nopa Tanahuatijquet Balac quiilhui Balaam: ―¿Taya tijchijtoc? Na nimitzhualicac para xiquintelchihua nocualancaitacahua, huan ta tiquintiochijtoc.

¹²Huan Balaam quinanquili: ―Monequi san niquijtos cati TOTECO techilhuis.

¹³Huajca Tanahuatijquet Balac quiilhui Balaam: ―Xihuala nohuaya huan ma tiyaca sejcoyoc. Huan ten nopona hueli tiquitas san se achi ten nochi nopa miyaqui israelitame. Ten nopona huelis tiquintelchihuas san se achi ten inijuanti.

¹⁴Huajca Tanahuatijquet Balac quihuicac Balaam ipan se mili campa itoca Zofim itzonco nopa tepet Pisga, huan nopona quichijqui chicome taixpamit huan quitencajqui se becerro huan se borrego ipan sesen taixpamit.

¹⁵Huajca nopona Balaam quiilhui Tanahuatijquet Balac: ―Ximocahua nica nechca motacajcahualis tatatili huan na niquitati Toteco Dios nopona.

¹⁶Huan TOTECO quinamiquico Balaam huan quimacac nopa camanali cati quinequiyaya ma quiijto. Huan nojquiya quiilhui: ―Xitacuepili campa itztoc Tanahuatijquet Balac huan xiquilhui cati na nimitzilhuijtoc.

¹⁷Huan Balaam tacuepili huan quiitac Balac ijcatoc nechca nopa tacajcahualisti tatatili, huan ihuaya itztoyaj nopa tayacanani ten tali Moab. Huan Tanahuatijquet Balac quitatzintoquili: ―¿Taya mitzilhuijtoc DIOS?

¹⁸Huajca Balaam sempa pejqui camanalti huan quiijto ni camanali: “¡Tanahuatijquet Balac, ta cati tiicone Zipor, cuali techtacaquili!

¹⁹Toteco amo itztoc quej titacame. Yaya amo istacati. Yon amo moyolpata quej se tacat. Cati yaya quiijtohua para oncas, ya nopa oncas. Cati yaya quitencahua, ya nopa quichihua.

²⁰Technahuatijtoc ma niquintiochihua ni masehualme. Huan pampa yaya ya quintiochijtoc, amo hueli na niquijtos para amo.

²¹TOTECO amo quipantía tajtacoli ipan ni israelitame. Inijuanti cati iteipan ixhuihua Jacob. Amo hualas tequipacholi ipan inijuanti pampa TOTECO cati inintata quihueyichijqui itztoc inihuaya. Yeca inijuanti tzajtzij ica paquilisti, pampa tahuel hueyi inintanahuatijca cati inihuaya yahui.

²²Quej se hueyi toro quipiya icuacua, ni masehualme quipiyaj TOTECO quej ininchicahualis, yaya cati quinquixti ipan tali Egipto.

²³Amo aqui hueli quintelchihuas ni iteipan ixhuihua Jacob. Ni israelitame amo teno huelis quinchihuilis se tenahualhuijquet. Nochi quiijtohuaj: ‘Toteco Dios quinchihuilijtoc huejhueyi tamanti.’

²⁴Ni masehualme motananaj huan temajmatíaj, quej se tecuani cati amo mosiyajquetza, hasta quicuas cati moitzquilijtoc, huan quiis ieso cati momictilijtoc.”

²⁵Huajca Tanahuatijquet Balac quiilhui Balaam: ―Masque amo hueli tiquintelchihuas, amo xiquintiochihua.