NÚMEROS 23:4-21

⁴Huajca Balaam yajqui ipan se piltepetzi catli amo tleno quipiya, huan Toteco hualajqui quinamiquico huan quiilhui: ―Na nijcualtlalijtoc chicome tlaixpamitl huan ipan sesen tlaixpamitl nimitztencahuilijtoc se becerro huan se borrego.

⁵Huajca TOTECO quimacac Balaam nopa camanali catli quinequiyaya ma quiijto, huan quiilhui: ―Ximocuepa campa itztoc Tlanahuatijquetl Balac huan xiquijto nochi senquistoc quen nimitzilhuijtoc.

⁶Huan Balaam mocuepqui huan quipantico Tlanahuatijquetl Balac ijcatoc nechca nopa tlacajcahualistli catli quitlatijtoya. Huan ihuaya itztoyaj nochi nopa tlayacanani tlen nopa tlali Moab.

⁷Huajca Balaam quiijto ni camanali: “Nechchijtoc ma nihuala nica nopa hueyi Tlanahuatijquetl Balac ipan ni tlali Moab. Huan nihualajtoc tlen nopa tepeme ipan tlali Aram ica campa hualquisa tonati. ‘Xihuala’, yaya nechilhui, ‘xiquintelchihuaqui ni israelitame. Xijcahua mocualancayo ma tlejco ica inijuanti para ma ininpanti catli fiero.’

⁸Pero amo hueli niquintelchihuas sintla Toteco amo quintelchijtoc. Amo hueli niquincualanis catli TOTECO amo ininca cualani.

⁹Niquinita tlen nica itzonatipa ni hueyi tepetl. Nojquiya niquintlachilía tlen piltepetzitzi. Niquinita para moiyocatlalijtoque tlen sequinoc. Inijuanti seyoc tlamantli masehualme. Amo quen sequinoc tlaltipac ehuani.

¹⁰Tlahuel miyaqui inijuanti hasta itztoque quen tlaltejpoctli. Amo aqui hueli quinpohua. Niyon se amo hueli quimatis quesqui itztoque. Nipaquisquía sintla nimiquisquía xitlahuac iixpa TOTECO quen inijuanti. Ma nimiquis ica nopa tlatiochihualistli catli se israelita quipiya.”

¹¹Huajca nopa Tlanahuatijquetl Balac quiilhui Balaam: ―¿Tlaque tijchijtoc? Na nimitzhualicac para xiquintelchihua nocualancaitacahua, huan ta tiquintiochijtoc.

¹²Huan Balaam quinanquili: ―Monequi san niquijtos catli TOTECO nechilhuis.

¹³Huajca Tlanahuatijquetl Balac quiilhui Balaam: ―Xihuala nohuaya huan ma tiyaca seyoc lugar. Huan tlen nopona hueli tiquitas san se achi tlen nochi nopa miyaqui israelitame. Tlen nopona huelis tiquintelchihuas san se achi tlen inijuanti.

¹⁴Huajca Tlanahuatijquetl Balac quihuicac Balaam ipan se mili campa itoca Zofim ipan itzonatipa nopa tepetl Pisga, huan nopona quichijqui chicome tlaixpamitl huan quitencajqui se becerro huan se borrego ipan sesen tlaixpamitl.

¹⁵Huajca nopona Balaam quiilhui Tlanahuatijquetl Balac: ―Ximocahua nica nechca motlacajcahualis tlatlatili huan na niquitati Toteco Dios nopona.

¹⁶Huan TOTECO quinamiquico Balaam huan quimacac nopa camanali catli quinequiyaya ma quiijto. Huan nojquiya quiilhui: ―Ximocuepa campa itztoc Tlanahuatijquetl Balac huan xiquilhui catli na nimitzilhuijtoc.

¹⁷Huan Balaam mocuepqui huan quiitac Balac ijcatoc nechca nopa tlacajcahualistli tlatlatili, huan ihuaya itztoyaj nopa tlayacanani tlen tlali Moab. Huan Tlanahuatijquetl Balac quitlatzintoquili: ―¿Tlaque mitzilhuijtoc DIOS?

¹⁸Huajca Balaam sempa pejqui camanalti huan quiijto ni camanali: “¡Tlanahuatijquetl Balac, ta catli tiicone Zipor, cuali techtlacaquili!

¹⁹Toteco amo itztoc quen titlacame. Yaya amo istlacati. Niyon amo moyolpatla quen se tlacatl. Catli yaya quiijtohua para oncas, ya nopa oncas. Catli yaya quitencahua, ya nopa quichihua.

²⁰Nechnahuatijtoc ma niquintiochihua ni masehualme. Huan pampa yaya ya quintiochijtoc, amo hueli na niquijtos para amo.

²¹TOTECO amo quipantía tlajtlacoli ipan ni israelitame. Inijuanti catli iteipan ixhuihua Jacob. Amo hualas tequipacholi ipan inijuanti pampa TOTECO catli inintata quihueyichijqui huan yaya itztoc ininhuaya. Yeca inijuanti tzajtzij ica paquilistli, pampa tlahuel hueyi inintlanahuatijca catli ininhuaya yohui.