Números 23:1-24

¹Geb degine, Balaam, Balacʼga sogded: “Wegi be anga ibmar-ogumakar-ukleged-aila gwagugle (7) be sobo. Degi, moli-bebe-nikad-machered walagugle (7) be anga guakwaa amio, degine, sibad-wawaad-machered walagugle (7) be anga guakwaa amibalo.”

²Geb Balac, Balaam-ega-igi-sogsa, deyob imaksad. Balac, Balaam-ebogwa ibmar-ogumakar-ukleged-aila-irba moli-bebe-nikad-wargwen, degine, sibad-wawaad-machered-wargwen ogumakar uksamalad.

³Degi, Balaam, Balacʼga sogded: “Na be-ibmar-ogumakar-uknaid-nagaba be gwisguo, andi nagwelo, abakalegi an Bab-Jehová abingualile. Anga-ibmar-sogoedi geb an bega sogmogoed.” Geb Balaam dulemarsulidse yar-mullu-siidse nadsunnad.

⁴Agine, Bab-Dummad Balaamʼse magarononikid. Geb Balaam, Bab-Dummadga sogded: —Ibmar-ogumakar-ukleged-aila gwagugle (7) an sobsad. Amar-aila-iliba an bega moli-bebe-nikad-machered-wargwen, degi, sibad-wawaad-machered-wargwen ogumakar uksad.

⁵Bab-Jehová Balaamʼga gayaburba ukded, ega weyob sogded: —Balac-gwichidse be nae, an bega-ibmar-sogsad ega be sogna.

⁶Balaam, Balac-gwichidse nonikid, daknonikid, Balac, Moab-dulemar-dummaganmala e-moli-bebe-nikad-ogumakar-uknaid-nagaba gwichi.

⁷Geb Balaam, Bab-Jehová-ega-ibmar-sogsadba sunmakded: “Dad-Ibeler-nakwiardaed-yalagansiki, Aram-yar-akar, Moab-dulemar-e-rey-Balac an-sealid. Ese dagye anga sogsad. Ega Jacob-wagan ukabsadaye, degi, Israel-dulemar ega iwisadaye, anga sogsad.

⁸¿Ande ibiga, dulemar Bab-Dummadse-ukabsalessulid, ukabsadagoe? ¿Ande ibiga, dulemar Bab-Jehová-egi-ichakwa-binsassulidgi ichakwa-binsadagoe?

⁹Ar ade, akwasailagan-birgi-gwichid-akar an we-dulemar-dakgwichid, yar-mullugan-birgi-gwichid-akar an we-dulemar-argagwichid. We-dulemarde, bachiki bukwamalad, we-dulemarde, baigan-dulemarba akarsailad.

¹⁰¿Wede doa Jacob-wagan ebisoe? ¿Israel-dulemar danabake urbilesar, a-gwensakde sunna dule ebichisar, be insae? Suli, ebichissulile. Bitigi we-dule-ibmar-innikii-imakmalad-burgwedyobi, an burgwemogana gadin. Bitigi wemar-gumaloedyobi, an gumogana yeerban.”

¹¹Balac, deyob-soge Balaam-itosgu, ega sogded: —¿Ibiga weyob be sunmaknai? ¿An-isdarmalad-ukabsaega an be-searsursi? Emide, we-dulemargi ise-nued be sunmaknaid. ¿Ar wede be igidi?

¹²Balaam, Balac-abin sogded: —Unnila Bab-Jehová-anga-ibmar-sogedbarbi an sunmakergebed.

¹³Geb degine, Balac, Balaamʼga sogded: —An bese wilesakwaa egis, baidsik be anba dage, adi, agi Israel-dulemar-bukwad be dakbaloed. Ar amar bela be dakosulid. Unnila abala be dakoed. Agi-gwichi be anga a-dulemar ukabsaoed.

¹⁴Balac, Pisga-yala-dukuse, Zofim-nainuse Balaam-sesad. Agine, ibmar-ogumakar-ukleged-aila gwagugle (7) sobsad. Geb ibmar-ogumakar-ukleged-aila-irba moli-bebe-nikad-wargwen, degine, sibad-wawaad-machered-wargwen ogumakar uksad.

¹⁵Degi, Balaam, Balacʼga sogded: —Na be-ibmar-ogumakar-uknaid-nagaba be gwisguo, andi Bab-Dummad-ebo abingunagwelo.

¹⁶Agine, Bab-Jehová Balaamʼse magarononikid. Ega gayaburba ukded. Ega weyob sogded: “Balac-gwichidse be nae, an bega-ibmar-sogsad ega be sogna.”

¹⁷Balaam, Balac-gwichidse nonigua, daknonikid, Balac, Moab-dulemar-dummaganmala e-moli-bebe-nikad-ogumakar-uknaid-nagaba gwichi. Agi, Balac, Balaamʼga sogded: —¿Bab-Jehováʼde, igi bega sogsa?

¹⁸Geb Balaam, Bab-Jehová-ega-ibmar-sogsadba sunmakded: “Zipor-machi-Balac, nue be an-itogo.

¹⁹Bab-Dummad dulemaryobsulid, gege dulemaryob gakansaed, Bab-Jehová, e-binsaedi gege ogwaed. Bab-Dummad na-ibmar-sogsadba bela imaked, Na ibmar-imakoye sogsale, imakedsegad. Geg-imaksuli gued.

²⁰Bab-Jehová anga soged: ‘Israel-dulemargi ise-nued be sunmakoye.’ Degisoggu, ise-nued an egi sunmakergebed, geg an sogsuli gued, sogergebed.

²¹”Bab-Dummad Jacob-wagan-isgusye sogsulid. Bab-Jehová Israel-dulemar nosa gwen daksulid. Ar Israel-dulemarba Bab-Dummad-Jehová gudiid. Israel-dulemar na sogmalad, Bab-Dummad e-reyye.

²²Ar Bab-Dummad Egipto-yargi onosad. Israel-dulemar-e-ganguedi, moli-bebe-nikad-sapurbalidyobid.

²³Ar ade, Jacob-wagan-ukabsaye be sogele, geg be bayoged, Israel-dulemargi sunnasuli-sunmakye be sogele, geg be oakaloged. Ar Jacobʼgi, Israelʼgi soglegoed: ‘¡Bab-Dummad-ega-ibmar-imaksad be dake!’

²⁴Israel-dulemar, achumiguryob gwichiguardaed, achumiguryob yargan-baasmakardaed. We-achumigurde e-ibmar-oburgwisad-e-san-obelogedse, geb megdaed. E-ibmar-oburgwisad-e-abe gobedse, geb obunnomegdaed.”