Näni Cægaïnö 7:42-50

⁴²Mänömaï cædäni ate wædinque Wængonguï näëmæ̈, Pönë cæmïniyaa, ante pïingacäimpa. Ayæ̈, Ïïnäni öönædë owocooque ante, Wængonguïidi ïnänipa, ante oda cæcædänimpa, ante cædinque idægoidi ïnänite ñimpo cædinque dadi ëmæ̈ninque aadämaï ingacäimpa. Edæ mänïnö tömënäni näni cægaïnö baï ante pönente yewæ̈möninque wacä wantæpiyæ̈ ate Wængonguï beyæ̈ ïïmaï ante yewæ̈mongacäimpa. ‘Idægoidi ëñëedäni. Önömæca gote coadenta wadepo ganca cægöninque mïnitö, Wængonguï quï, ante pönoncæte ante cædinque cæ̈nïnäni wæ̈nöninque baö tönö mäincoo ænte pö ænte pö cæmïni incæte dicæ botö ïmote ante pönëninque pönömïni æntawogaa.

⁴³Ïñæmpa, Mönö wængonguïidi ïñönänite ædæ wæænte apæ̈necæ̈impa, ante cædinque mïnitö mïni badöninca adoca Mönoco mïni änonca beyæ̈ æ̈montaicö oncö næ̈ænte godinque wocæ wocæ cædömïni awædö. Ayæ̈ waca, Möni wængonguï Adempaö nëmö baï owocæ̈impa, ante mïni badöninca næ̈ænte æ̈monga cö cæ cö cæ cædömïnimpa töö. Ante adinque Wængonguï, Mänömaï cæmïni beyæ̈ botö mïnitö ïmïnite Babidönia ganca da godöninque godömenque gobæ da godömo gocæmïnimpa,’ angampa, ante yewæ̈mongatimpa.” Ante apæ̈nedinque Etebä, Mönö wæ̈mæ̈idi ïïmaï cægadänimpa, ante godömenque apæ̈necantapa.

⁴⁴“Wængonguï doyedë Möitee wodi ingante apæ̈nedinque, Mïnitö æ̈montaicö mæ̈nonte ate botö wææ ante yewæ̈möninca cö cæte mancæmïnimpa. Ïïmaï mæ̈noncæmïnimpa, ante odömongä adinque Möitee wodi wæætë mönö wæ̈mæ̈idi ïnänite odömongä ate ëñëninque tömënäni wæætë Wængonguï nänö odömönö baï mänömaïnonque æ̈montaicö mæ̈nongadänimpa. Mänömaï mæ̈nonte ate dica wææ ante Wængonguï nänö yewæ̈mongainca incæ mänincönë cö cægadänimpa. Ayæ̈ önömæca wayömö wayömö gocæte ante æ̈montaicö capote mongænte mäo wocæ wocæ cægadänimpa.

⁴⁵Ayæ̈ wadäni mänïömæ në quëwënäni ïñönänite Wængonguï wido cæcä ate mönö wæ̈mæ̈idi Ootowee wodi mïñæ̈ ponte ömæ æ̈ninque Wængonguï oncö æ̈montaicö näni ænte mongængaincö mämö wodongadänimpa. Wodönäni ate Awënë Dabii wodi nänö ëñate quëwenguimpoga mänincö æ̈montaicö incæ ayæ̈ a owogatimpa.

⁴⁶Awënë Dabii ingante Wængonguï pönö waa agacäimpa. Ïninque Dabii wæætë Wængonguï ingante apæ̈nedinque, Bitö Aacobo wodi Wængonguï ïnömi ïmipa, ante adinque botö, Bitö quëwenguïñömö, ante oncö ämi mæ̈nonguïmo, äñongante Wængonguï Baa angacäimpa.

⁴⁷Wæætë Tadömöö wodi Wængonguï beyæ̈ në oncö mæ̈nongä ingacäimpa.

⁴⁸Mänömaï cægaïnäni incæte Wængonguï ïñömö edæ æ̈monga pönï në ongongä inte waocä nänö önompoca mæ̈nönincönë ædö cæte pönö Ao ante guiite quëwenguingää. Mänömaïnö ante pönente wædinque Wængonguï beyæ̈ në apæ̈negaingä ïïmaï ante apæ̈negacäimpa.

⁴⁹‘Botö në Tæiyæ̈ Awënë ïnömo ïñömote öönæ incæ botö Awënë tæ̈ contaquï baï impa, inguipoga wæætë botö önöwa podöwate quï baï impa. Mänömaï në ongömo beyæ̈ mïnitö botö oncö ante ædö cæte mæ̈nonguïmïnii. Inguipoga æcönënö guiidinque guëmanguïmoo, ante Wængonguï angampa.

⁵⁰Botö ïñæmpa tömëmo önompoca tömää në badongaïmo ïnömo ïmopa,’ ante Wængonguï Awënë angampa, ante wacä yewæ̈mongacäimpa.”