Näni Cægaïnö 3:1-18

¹Ïincayæ̈ ate nænque ædæ wæicä ate oodeoidi näni cöwë Wængonguï ingante apæ̈nedöñedë Pegodo tönö Wäö ïñömö Wængonguï oncönë ñæ̈næncö yabæcönë guiicæte ante æidatapa.

²Æite ayöna wadäni pöninque cömäwaingä ëñate në pædingä ingante næ̈ænte mämönäni pongä adatapa. Ïingä cömäwaingä ïñömö në pö guiidäni ïnänite, Pönömi æ̈moe pönömi æ̈moe, ancæcäimpa, ante cædinque tömënäni tömengä ingante ïïmö ïñö ïïmö ïñö næ̈ænte pö næ̈ænte pö cædinque edæ Wængonguï oncö ñæ̈næncö boyæ̈ yabædemö, Waïnemö, näni änemö yabæque cö cædönänimpa.

³Ïninque ñöwo Pegodo tönö Wäö Wængonguï oncö ñæ̈næncönë yabæcönë pö guiicæ cæda adinque tömengä tömëna ïnate, Pönömïna æ̈moeda, angantapa.

⁴Angä ëñëninque Wäö tönö tömengä ingante cöwä adinque Pegodoque apæ̈necantapa. —Mönatö ïmönate æ̈æ̈mö ae.

⁵Angä ëñëninque cömäwaingä, Botö ïmote wabänö pönöna ænguïmo, ante pönëninque æ̈æ̈mö ayongä

⁶Pegodo ïñömö, —Quïnö mämopa pönömo ænguïmii. Edæ oodo incæ tiguitamö incæ ömæpobo ïmopa. Wæætë tæiyæ̈ waëmö botö ëwocadö ante bitö ïmite pönö apæ̈nebo ate bitö æ̈e. Näatadeta quëwengaingä Itota Codito ëmöwo beyænque bitö dao dao goe, angacäimpa.

⁷Äninque Pegodo cömäwaingä tömëmæ̈ ïnö pædæ wææmpo bæi ongonte töö æ̈mængä ate cömäwadingä önöwa tönö önoncaiwa tæ̈ï pïñæ̈wacä.

⁸Ate ïñontobæ̈ ængæ̈ gantite dao dao gocantapa. Ayæ̈ Wäö tönö Pegodo mïñæ̈ Wængonguï oncö ñæ̈næncönë yabæcönë godongämæ̈ go guiidinque dao dao go togæi togæi godinque Wængonguï ingante waa ate apæ̈nedinque, Wængonguï, bitö cöwë waa pönï ïnömi inte pönö cæbi æ̈mopa, ante nanguï apæ̈necantapa.

⁹Wængonguï mänömaï waa cæcampa, ante nanguï pönï tededinque dao dao gocä adinque edæ tömänäni,

¹⁰Æ, ïingä ïñömö, Pönömi æ̈moe pönömi æ̈moe, ante Wængonguï oncö ñæ̈næncö boyæ̈ yabædemö, Waïnemö, mönö änemö gäänë mönö në änecöningä adocä ingampa. Ante adinque, Quïnö baï cæte waa bacäï, ante ancai guïñente wægadänimpa.

¹¹Mänïï cömäwaingä ïningä incæ Pegodo tönö Wäö ïnate wïnïmä wïnïmä cæcä adinque wadäni tömänäni guïñente wædinque Tadömöö yabætaa näni äñömö pogodo ponte tömënäni weca guiidänitapa.

¹²Guiidäni adinque Pegodo, “Mïni idægocabo ëñëedäni. Mönatö ïmönate quïnante waa amïnii. Mänömaï waa bawacä adinque edæ quïnante guïñente wæmïnii. Mönatö edæ, Tömengä dao dao gocæcäimpa, ante cædinque tæiyæ̈ waëmöna ïmönapa diyæ̈ tæ̈ï pïñænte cæquïmönaa.

¹³Abadäö wodi Itæca wodi Aacobo wodi tömënäni, Mönö Wængonguï ïnongä ingampa, ante näni në angaingä inte Wængonguinque cæcä ate waa bawacampa. Mönö wæ̈mæ̈idi Wængonguï incæ, Itota botö ïmote në cædongä ñäö baï ëmöñongante tömengä ingante waa acædänimpa, ante mänömaï cæcampa. Adocä Itota ingante mïnitö ïñömö, Wæ̈nongæ̈impa, äninque pædæ godömïnitapa. Ayæ̈ Pidato, Ñimpo cæbo gocæcäimpa, ante apænte angä ate mïnitö wæætë Pidato weca ongöninque adocä ingante ante Baa ämïnitapa.

¹⁴Ïninque në Tæiyæ̈ Waëmö ïnongä inte nö cæyongante mïnitö Baa äninque wæætë në wæ̈nöningä ingante ante äninque, Ïingä ingante ñimpo cæbi pongäe, ämïnitapa töö.

¹⁵Ïninque mönö quëwenguïmämo në pönongä ingante Baa äninque mïnitö në wæ̈nönïmïni ïmïnipa. Incæte Wængonguï tömengä ingante, Ñäni ömæ̈möe, angä ñäni ömæ̈mongantapa. Ïninque tömengä ñäni ömæ̈mongä në adïmöni inte mönitö, Æbänö cægacäimpa, ante adodö ante në apæ̈nemöni ïmönipa.

¹⁶Adocä Itota ëmöwo ante apæ̈nemöna ëñente pönëninque mäningä cömäwadingä mïni në adingä ïñömö ñöwo tæ̈ï pïñæ̈wacampa. Edæ Itota pönö cæcä beyæ̈ mänïï onguïñængä në pönengä badinque Itota ëmöwo beyænque ædæmö waa bawate tæ̈ï pïñængä bacä amïnipa,” ante Pegodo apæ̈necantapa.

¹⁷Ayæ̈ godömenque apæ̈nedinque Pegodo, “Ñöwo botö tönïñamïni ëñëedäni. Mïnitö awënëidi ëñënämaï näni cæï baï cædinque mïnitö ïñömö adobaï, Æbänö nö cæquïï, ante ëñënämaï inte cæmïnitapa, ante awædö.

¹⁸Incæte mïnitö mänömaï ëñënämaï cædinque Wængonguï beyæ̈ në apæ̈negaïnäni tömänäni näni apæ̈negaï baï do ïinque cæmïnipa. Tömënäni, Mönö Codito caate wæte wæncæcäimpa, ante näni angaïnö baï mïnitö cædï beyæ̈ ñöwo ïinque batimpa.