Muqâqiŋ Dâŋ 7:7-19

⁷Eme ŋicmotec socɋâri mamanasu tâmiric jaŋere ŋondeŋko motec mutuc matacne moc jume honepo.

⁸E hata sâko fotâcnerâ hata ŋeŋehasicko boe sau ŋokac moc juwec irapec rarâ ere ficko fisiwec.

⁹Erâ i hae ŋafeme dapâc foha iŋuc ewec.

¹⁰Ehame ŋokac e mi fickonec waharâ bâfuazejec i! Ŋokac e hata ŋokac jaŋere rurufa â eri qoqonaŋ wiac iŋucne rojuwec, ehuc eesâic gie baocte mâsi fuŋne fuŋne ewec.

¹¹E mimi tâmiric hata sâkoo sisi hâhâŋ faio ifi aifi jaha rac warec ewec.

¹²Ehuc doma qatara rarâ hata ŋeŋehasicko domawec, izi irecnec ra hata sâkoo domawec, izi rarâ wiac nareŋ gareŋ eere tomao domawec.

¹³Iŋuc ehuc motec mutucne e honerâ izia hâpo mumuduc ecnerâ sasec ʒâŋe fihuc dâŋ kecʒiŋuc âzâcnewec:

¹⁴“No miŋecgac qowi bâzi rikepacte qowi tiwâne fonarekac.

¹⁵Irec no fickonec waharâ gore ʒâŋe fihuc juku bâfuacgukopac hâcne.

¹⁶Manakic, no Aigita mâreŋkonec fofo qoruc erinehec i biac fofo‐naneo rumackepac.

¹⁷Ehuc siŋsiŋ saŋkarac â ʒineŋ sâfânâŋ wiac âsu biaŋ i wâc biac râe‐fârepac.

¹⁸Irec go biac waretec waha hâhâpoc erâ fohuc ʒeri bubiaŋ manahuc fohapere hae furezejec.

¹⁹Ŋowe‐nanezi ʒira mi jukac, e ʒoricko rawec.