Muqâqiŋ Dâŋ 7:1-15

¹Motec‐mae, go dâŋ gazaekopac i manasuhuc juzemec, ehuc sâcmutâc dâŋnanere moc mi nikecguzejec.

²Go sâcmutâc dâŋnane mana rereŋ erâ juhâc qâhâmocmu. Go ʒâŋe hândâŋge soŋaŋkeekic irec sâc jaha mu qaqazuc dâŋnane soŋaŋkezemec.

³No dâŋ gaza qazuc eekopac i dameŋ sâc paŋʒâic jaha bajuzemec, ehuc maŋgao qâreŋketec fozejec.

⁴Go maŋɋârâŋte manatec seŋgere sâc ezejec, â maŋzi wiac mamana tara irec manatec âgo fuŋfuŋge ezejec.

⁵Jahe hâcne ŋic gâcne jaŋere ŋonâŋfâc jaŋerao mecne, â esâicguhuc wokemaŋ dâŋ egareeŋgopieŋ ŋokac i jaŋerao mâmâc razicte aka hegareekopirec.

⁶No dameŋ mocko ficnaneo ŋehuc qâqâtâc kataŋko ʒâŋe fipe rawec.

⁷Eme ŋicmotec socɋâri mamanasu tâmiric jaŋere ŋondeŋko motec mutuc matacne moc jume honepo.

⁸E hata sâko fotâcnerâ hata ŋeŋehasicko boe sau ŋokac moc juwec irapec rarâ ere ficko fisiwec.

⁹Erâ i hae ŋafeme dapâc foha iŋuc ewec.

¹⁰Ehame ŋokac e mi fickonec waharâ bâfuazejec i! Ŋokac e hata ŋokac jaŋere rurufa â eri qoqonaŋ wiac iŋucne rojuwec, ehuc eesâic gie baocte mâsi fuŋne fuŋne ewec.

¹¹E mimi tâmiric hata sâkoo sisi hâhâŋ faio ifi aifi jaha rac warec ewec.

¹²Ehuc doma qatara rarâ hata ŋeŋehasicko domawec, izi irecnec ra hata sâkoo domawec, izi rarâ wiac nareŋ gareŋ eere tomao domawec.

¹³Iŋuc ehuc motec mutucne e honerâ izia hâpo mumuduc ecnerâ sasec ʒâŋe fihuc dâŋ kecʒiŋuc âzâcnewec:

¹⁴“No miŋecgac qowi bâzi rikepacte qowi tiwâne fonarekac.

¹⁵Irec no fickonec waharâ gore ʒâŋe fihuc juku bâfuacgukopac hâcne.