Text copied!
CopyCompare
Kâte Bible - Muqâqiŋ Dâŋ - Muqâqiŋ Dâŋ 6

Muqâqiŋ Dâŋ 6:4-29

Help us?
Click on verse(s) to share them!
4Irec go hesacke furic ehuc guŋ mi fozemec.
5Go wipezi eekac iŋuc ehuc bitiŋ heunuckerâ wisezemec, erâ beczi wosaŋeŋ bapa ŋic honerâ qârucnerâ wisehuc juju‐ticne bâfuaekac irec sâc ezemec.
6Ŋic roroc qaŋqaŋne jaŋe fiu qoʒazaŋ jaŋere eebapa honerâ maŋɋârâŋ bâfuanʒepieŋ.
7Fiu qoʒazaŋ jaŋe soŋaŋ micne me ŋicwofuŋ me guriŋ bapafâc‐jeŋic aricne,
8erâ sifu hoemaŋ dameŋte manasuhuc nânâ wiac‐jeŋic ʒoaŋ dameŋkoa ro qâzuc eeŋgopieŋ.
9Ŋic roroc qaŋqaŋne e mo dameŋko ojoŋ juju‐ticne moc beheocmu? Me wezimucko moc faharerâ gie baocmu?
10E ʒiŋuc hâcne muekac: “No me ʒâʒâfic qarâ guŋ piticne mac fope.”
11E iŋuc muhuc guŋ fohame roroczi ʒikaŋic jaŋe iŋucne ututuŋ jaha fisicnerâ bawahaocmu.
12Ŋic repic qapicne â sindaŋ hârindaŋne jaŋe gibioc dâŋ muhuc jueŋgopieŋ.
13Ehuc esâic‐ŋopaniŋte ʒâŋe bazuc eŋareeŋgopieŋ â kikezi âte ʒifuŋ‐ŋopaeŋgopieŋ erâ mezi sâsâc eŋareeŋgopieŋ.
14Jaŋe iŋuc ehuc hehesic bâfuaniŋte maŋzi dâŋ manasu biric eeŋgopieŋ, ehuc doc bapa gie bahuc jueŋgopieŋ.
15Jaŋe iŋuc eeŋgopieŋte sisipiriczi ututuŋ jaha fisi‐jarerâ bâsirowec‐jopame mocwâc mi juniŋmu.
16Wofuŋ e eebapa 7 kecʒiŋuc jaŋere maname mamakâcne eha râsi ejareekac: Pepec ʒâŋe fifi, micbipiczi wokemaŋ dâŋ mumu, ŋic bahacmâc qâqâhâmoc‐jopa, dâŋ repicne manasu biric ee, wiac hehesicne ezore fâro hata rara, dâŋgieo domahuc dâŋ muhasickerâ burec ee, erâ âgo ŋondeŋko juhuc iiriac â kikisâ bâbâfua.
20Motec‐mae, go mamacgere sâcmutâc dâŋ mana rereŋ ehuc juzemec, erâ wâc neŋgocgezi wiac qazu‐garewec irec moc mi nikecguzejec.
21Go dâŋjekic maŋgao râetec foha paŋʒâic jaha bajuzemec.
22Ehame hata ira me ira racmurâ jowa qataŋ egarezejec, ehuc ŋafeo ŋezicguzejec â ʒoaŋko wâc baficguzejec.
23Sâcmutâc dâŋjekiczi lambe iŋucne tamae‐garezejec, â mumutiŋ dâŋjekiczi juju hata biaŋne irec fuŋne gaza mutâc ezejec.
24Sasec ŋokac jaŋerao qohotazicte me ŋokac gâcne jaŋere wokemaŋ dâŋzi bâdocguzacte jahere dâŋzi hâcne aka sâcne hegareocmu.
25Ŋokac hawari‐jeŋic biaŋne izi mi woricguzejec, me ʒâŋe rârâqâc honecgupie ririfirerâ mi docke‐jarezemec.
26Ŋic moc e hata ŋokac nânâ poroŋ mocjaha maczi furine bazo murâ baocmu, mâc boe sau gie bapazi ine juju‐ticne fârine sipiricke‐fâreocmu.
27Go ʒocmimiŋ hâpohaŋtec ŋaqige akickeocmu me?
28Me ʒoc kine fainao âtehaŋtec kikege mi ʒaocmu me?
29Manakic, ŋic moczi ŋic mocte ŋonâŋhec foocmu e irec sâc fuacneocmu. Moc e iŋuc eocmuzi ʒâic manaocmu hâcne.

Read Muqâqiŋ Dâŋ 6Muqâqiŋ Dâŋ 6
Compare Muqâqiŋ Dâŋ 6:4-29Muqâqiŋ Dâŋ 6:4-29