Muqâqiŋ Dâŋ 4:4-23

⁴mamac‐nanezi wiac qazu‐narewec. Ehuc dâŋ ʒiŋuc naza jujec: “Dâŋ gazaekopac sâc irec ninikec moc mi bâbâfua manasuhuc juzemec. Erâ sâcmutâc dâŋnane mana rereŋ ehuc sâcne juhâc qâhâmocmu.

⁵Go maŋɋârâŋ â maŋzi wiac mana utuckehuc mamana tara i bâfuazemec, ehuc dâŋ gazaekopac i mi qâsuazemec.

⁶Go maŋɋârâŋ mi râpeckecmuo ine izi hâcne sapecguocmu, â mana maŋ ecmuo ine soŋaŋguocmu.

⁷Manakic, go maŋɋârâŋhec ecmurâ ʒoɋac sâko ezemec, ʒoɋac izi hâcne maŋɋârâŋhec jujure fufuŋkene ekac. Go wiac irec me irec mâcne, maŋzi wiac mamana tara irec manatec furi sâko eha bâfua‐jâmbâŋkezemec.

⁸Maŋɋârâŋ dâŋ mana maŋ etec izi ʒâŋe biŋe sâko bâfua‐garezejec, â maŋzi hâpo heâroŋ ecnetec eri qoqonaŋge eocmu.

⁹Go iŋuc etec eri hendiŋ â eriduge eocmu hâcne.”

¹⁰Motec‐mae, go dâŋnanere hazec râec, ehuc dâŋ gazaekopac sâc manatec fârine eha bajuhuc dameŋ ʒora jufezemec.

¹¹No maŋɋârâŋte fuŋne gaza gowatuc epo, ehuc siocmâc jujure hatao jowacgupo.

¹²Irec go hatagao rahaŋtec wiac moczi aka moc mi hegareocmu â gasackerâ racmuo ine kikege wâc mi fâfâckeocmu.

¹³Wiac qazu‐garekicne irec manasuhuc juzemec, â mamana bâfuameŋ izi hâcne jujuge dopeckeekacte biaŋne soŋaŋkezemec.

¹⁴Go ŋic hehesicne jaŋere hata mi âtezemec â ŋic sindaŋne jaŋere itiroc wâc mi bâjâpezemec.

¹⁵Go jaŋere hata râpeckerâ dic bacnehuc wiac hehesicne mi ezemec, iŋuc ehuc gahacne hatao ʒuhuckerâ razemec.

¹⁶Ŋic sindaŋne jaŋe wiac hehesicne mi eniŋmuo ine guŋ sâcne mi foniŋmu, â ŋic moc mi bâʒâickeniŋmuo ine guŋɋâri jaha foniŋmu.

¹⁷Wiac sindaŋne â ʒâʒâicne ebac ee izi hâcne nânâ opâ‐jeŋic eekac.

¹⁸Ŋic tiŋne jaŋere hata i furic oŋa rarac iŋucne, oŋa rarac i ʒoaŋ wefume fuŋkerâ mâreŋ tamae rahuc hae fure‐fâreekac.

¹⁹Ŋic sindaŋne jaŋere hata ine dapâc qisiric iŋucne, irec jaŋe wiac izi me izi kike‐jeŋic fâfâckeme waha jopaekac i mi hone taraeŋgopieŋ.

²⁰Motec‐mae, go hazec râe‐hâmohaŋtec dâŋ gazape manazemec.

²¹Go dâŋnanere ninikec moc mi bâfuahuc maŋzi mana sakac ezemec.

²²Moc e dâŋnane mana tarahuc bajuocmuo ine izi hâcne nârâ bibiaŋ‐ticne ehuc juju bâfuacneocmu.

²³Go maŋge soŋaŋkezemec, izi hâcne juju bâbâfuagere hobeteŋne ekac.