Muqâqiŋ Dâŋ 2:7-21

⁷Eki hâcne ŋic tiŋne â siocmâc bafic‐jopaekac â ŋezic‐jopaekac.

⁸Ehuc, ŋic âgofâc‐jeŋic bafic‐jopahuc dâŋjeŋic mutiŋne‐jareeŋgopieŋ ŋic i jaŋe sapec‐jopaekac, â e jahacnao qohotahuc jueŋgopieŋ jaŋe hone soŋaŋ ejareekac.

⁹Go maŋɋârâŋ dâŋ manacmuo ine wiac biaŋne â tiŋnere hata hone taracmu, ehuc irec sâcko ebac ehuc jucmu.

¹⁰Erâ go maŋɋârâŋhec jaha jutecne mamanagezi bubiaŋ bâfua‐gareocmu.

¹¹Mamana saric â maŋzi wiac mamana tara izi ŋezicguocmu,

¹²ehuc wiac hehesicne ezicte aka hegareocmu. Ehame ŋic dâŋ kosa muhuc bâbâsifuc bâfuaeŋgopieŋ jaŋerao ra qohotazicte hata hebâzicke‐gareocmu.

¹³Ŋic iŋucne jaŋe dapâcte hatao juniŋte tiŋne jujure hata râpeckeeŋgopieŋ,

¹⁴erâ wiac hehesicne ehuc bubiaŋ manaeŋgopieŋ, â wiac sindaŋnere aŋac bajueŋgopieŋ.

¹⁵Jaŋe hata‐jeŋic keke poricne â hatagâŋ‐jeŋic i bac bâŋoricne.

¹⁶Go maŋɋârâŋhec jucmuo ine ŋokac sâqocnezi dâŋ wokemaŋzi wiac ehuc esâicgume sâcne sanaŋkerâ dâŋticne hetapâickecmu.

¹⁷Ŋokac iŋucnezi ŋowe‐ticne maŋzi beheekac, ehuc mumupaŋ dâŋticnere wâc nikeckeekac.

¹⁸Go ŋokac ere ficko moc racmuo ine hâmoc haere hatao racmu hâcne. Manakic, ere ficko rara izi hâmockicne jaŋere mâreŋko rara irec sâc ekac.

¹⁹Ŋic moczi ŋokac e iqickeocmuo ine mocwâc mi risieocmu, ehuc juju hata mocwâc mi bâfuaocmu.

²⁰Irec go ŋic biaŋne jaŋere itiroc bâjâpehuc tiŋne juzemec.

²¹Ŋic tiŋne â bahacmâc jaŋe hâcne mâreŋko dameŋ ʒora jufeniŋmu.