Muqâqiŋ Dâŋ 29:9-25

⁹Ŋic maŋɋârâŋheczi ŋic mutucne moc dâŋgieo râeocmuo ine ŋic mutucne eki mâc gâwiecneocmu, erâ wâc aaric manacnehuc dâŋ sâqocne mucneocmu.

¹⁰Ŋic socnânâ jaŋe ŋic sioc tâmiric qaisockeeŋgopieŋ, â ŋic tiŋne jaŋe ine juju‐ticne ŋezickeeŋgopieŋ.

¹¹Ŋic mutuc matacne jaŋe kimbeŋ aaric‐jeŋic mi bawahahuc tomao bataniŋkeeŋgopieŋ, â ŋic maŋɋârâŋhec jaŋe ine wiac iŋucne hetapaickehuc uruerâ jueŋgopieŋ.

¹²Guriŋ bapa ŋic moczi burecdâŋte hazec râeocmuo ine gieŋicfâc‐ticne fekicne jaŋe burecŋic jaha efâreniŋmu.

¹³Ŋic hapetac mecne â kisâfâc‐jeŋic mecne jaŋe mâmâc Wofuŋzia ʒâŋe hândâŋ râe‐jarewec.

¹⁴Ŋicwofuŋ moc e ŋic waha qaqane jaŋe dopec‐jopaocmuo ine guriŋ bapa gie‐ticne i dameŋ ʒora barahuc juocmu.

¹⁵Naru motec jaŋerao mumutiŋ â bâbâtiŋ gie bapene biaŋkeocmu, me jaŋe jaŋacne maŋte wiac ebac eniŋmuo ine neŋgocfâc‐jeŋic mimi qaqa ejareniŋmu.

¹⁶Ŋic sindaŋne jaŋe guriŋ bapa gie bahuc juhapie wiac sâqocnezi soka ŋedâmârec eocmu, â ŋic tiŋne jaŋe ŋic sindaŋne waha jopame honec‐joparâ ʒeri eniŋmu.

¹⁷Go ŋokâge qa bâtiŋ ecnetec neneŋ bâneneŋ mi egareha ere bubiaŋ manahuc jucmu.

¹⁸Ŋicguru moc jaŋe Anutu guriŋ bapa‐ticnere takic‐jopame sâcmutâc tâmiric kosa juniŋmu, â ŋicguru moc jaŋe Anuture sâcmutâc dâŋ mana rereŋ eniŋmu jaŋere manapene ʒerine eocmu.

¹⁹Go kiŋaŋ qaqa moc dâŋ sawa âzâcnehuc sâcne mi bâtiŋnecmu, ine dâŋge hazeczi sawa manahuc mana rereŋ mi eocmu.

²⁰Ŋic moc e dâŋticne manasu biric mi ehâmohuc kosa muocmu e ŋic mutuc matacne jaŋere waha micne erâ juocmu.

²¹Kiŋaŋ qaqa moc e ɋieonecteaŋ wiac irec me irec mume râcne tahac enaŋmuo ine juku sokarâ wiac‐nâŋec sasawa ro rauc eocte muocmu.

²²Ŋic maŋʒochec jaŋe mu qaqatarac erâ dâŋgie sâko bâfuaeŋgopieŋ.

²³Ŋic pepec penaroŋhec jaŋe waha jopaocmu, â ŋic maŋhuhuŋ jueŋgopieŋ jaŋere manapene fefene eocmu.

²⁴Hata kecʒiŋuc fokacte fiuc roro ŋic ere babaficzi juju‐ticne qaisockeekac: E dâŋgieo domahuc dâŋ fârine mufuame bâtiŋneniŋmu, â dâŋ fârine hesoŋkeocmuo ine Anutuzi sâweckeocmu.

²⁵Ŋic jaŋere hâhâwic bajupene bitiŋzi kicnâpoocmu tinac eocmu, â Wofuŋtao roweckehuc junaŋmuo ine eki huec sanaŋ enâreocmu.