Muqâqiŋ Dâŋ 26:5-22

⁵Ŋic moczi e jahacnere maname maŋɋârâŋhec jukopac, iŋuc ezacte go wiwio‐ticne mutucnere okacne mutucne jaha bâtikiecnezemec.

⁶Ŋic moczi ŋic mutucne moc biŋedâŋ‐ticne baraocte soreocmu ere manapene e jahacne kike hetâcnekac irec sâc eocmu; e iŋuc ehuc sisipiric hotâckeocmu hâcne.

⁷Ŋic mutuc matacnezi muqâqiŋ dâŋ muocmu i ŋic moczi kike‐ticne demba qame hata raekac irec sâc eocmu.

⁸Ŋic moczi ŋic mutucne mumbiaŋkeocmu e ine ŋic moczi mutuc erâ tacbaŋko qânâ basanaŋkeme mi raekac ere sâc eocmu.

⁹Ŋic mutuc matacne moczi maŋɋârâŋ dâŋ muocmu e ŋic moc opâ sanaŋ nâku maŋne sifuckeme meticnaonec ʒârâ unuckeocte eipieocmu irec sâc eocmu.

¹⁰Ŋic moczi ŋic mutucne moc rorâ kiŋaŋ qaqa‐ticne baocmu e ŋic hatapecne fotâcnehapie kosa muruc‐jopaekac ŋic ere sâc eocmu.

¹¹Ŋic mutuc matacne moczi wiac mutucne eha arec jajahec eocmu e qâtozi nânâ wiac maŋurâ mocwâc risierâ nâekac irec sâc eocmu.

¹²Ŋic maŋɋârâŋ tâmiric moczi no maŋɋârâŋhec jukopac muhame ŋic mutucne jâmbâŋ moczi ere sâc sirickehuc biaŋne juocmu.

¹³Ŋic ojoŋnezi dâŋ kecʒiŋuc muhuc ficko feekac: “Laioŋzi hae ʒoŋao jukac.”

¹⁴Motâczi beŋgu hahasic‐ticnao domahuc rac warec eekac irec sâc jaha ŋic ojoŋnezi fofo‐ticnao fohuc foc forisic eekac.

¹⁵Ŋic gâcne jaŋe qâoma sâko ehuc nânâ wiac micjeŋicko râeniŋte takic‐jopame mâc ŋeeŋgopieŋ.

¹⁶Ŋic ojoŋnezi e jahacnere maname feha ŋic 7 jaŋe maŋ mamanasu‐jeŋicko dâŋ fokac i mufuapie maname wawahane ekac.

¹⁷Ŋic moc e ŋic âgo‐ticnere dâŋ muocte mi manacnehapie sifu muocmu e ŋic moczi hatao rahuc qâto furune moc hazecnao roocmu ere sâc eocmu.

¹⁸Ŋic moczi ŋic âgo‐ticne eatuckerâ ʒiŋuc muocmu: “No mâc ʒoraŋ sawa ekopac,” e ŋic mutuc matacne moczi ʒoc kosa turuŋkeme wiac ʒafâreekac me tepe motec kosa qâtâcneme raekac ere sâc eocmu.

²⁰Ʒoc mocwâc mi henusuckepene hâpoocmu, â gupe micko âkec behepene dâŋ mu qaqataraczi wâc omaeocmu.

²¹Ʒoc râqâcnere kinezi ʒoc tucne qâhâsâekac â ʒoc henusuckepene ʒahuc foekac irec sâc jaha ŋic râŋgeŋnezi qaqatara bâfuaekac.

²²Ŋic nâŋâc gupe micko âkec ee irec manapene afeckeha boc bajueŋgopeneŋ.