1Ʒoaŋ dameŋko hoe micsâko heme mi biaŋkeekac, me hoe dameŋko ʒoaŋ ʒâʒâicne qame wâc mi sâckeekac iŋuc jaha ŋic mutuc matacne mumbiaŋkepene mi sâckeocmu.
2Fuŋne tâmiricko sâwec‐nâpopie fâri tâmiric eocmu, wiac i sawa hehetâc wipe jaŋe hehetâcnehuc nâworueŋgopieŋ irec sâc ekac.
3Becâsiczi kâcbiŋ kizejec â doŋgi micko kiki râecnezo erâ ŋic mutucne qa bâtiŋ ecnezo.
4Go ŋic mutucne wiwio‐ticnere okacne bâtikiecnecmuo ine go gahacne wâc e iŋucne mutuc jaha ecmu.
5Ŋic moczi e jahacnere maname maŋɋârâŋhec jukopac, iŋuc ezacte go wiwio‐ticne mutucnere okacne mutucne jaha bâtikiecnezemec.
6Ŋic moczi ŋic mutucne moc biŋedâŋ‐ticne baraocte soreocmu ere manapene e jahacne kike hetâcnekac irec sâc eocmu; e iŋuc ehuc sisipiric hotâckeocmu hâcne.
7Ŋic mutuc matacnezi muqâqiŋ dâŋ muocmu i ŋic moczi kike‐ticne demba qame hata raekac irec sâc eocmu.
8Ŋic moczi ŋic mutucne mumbiaŋkeocmu e ine ŋic moczi mutuc erâ tacbaŋko qânâ basanaŋkeme mi raekac ere sâc eocmu.
9Ŋic mutuc matacne moczi maŋɋârâŋ dâŋ muocmu e ŋic moc opâ sanaŋ nâku maŋne sifuckeme meticnaonec ʒârâ unuckeocte eipieocmu irec sâc eocmu.
10Ŋic moczi ŋic mutucne moc rorâ kiŋaŋ qaqa‐ticne baocmu e ŋic hatapecne fotâcnehapie kosa muruc‐jopaekac ŋic ere sâc eocmu.
11Ŋic mutuc matacne moczi wiac mutucne eha arec jajahec eocmu e qâtozi nânâ wiac maŋurâ mocwâc risierâ nâekac irec sâc eocmu.
12Ŋic maŋɋârâŋ tâmiric moczi no maŋɋârâŋhec jukopac muhame ŋic mutucne jâmbâŋ moczi ere sâc sirickehuc biaŋne juocmu.
13Ŋic ojoŋnezi dâŋ kecʒiŋuc muhuc ficko feekac: “Laioŋzi hae ʒoŋao jukac.”
14Motâczi beŋgu hahasic‐ticnao domahuc rac warec eekac irec sâc jaha ŋic ojoŋnezi fofo‐ticnao fohuc foc forisic eekac.
15Ŋic gâcne jaŋe qâoma sâko ehuc nânâ wiac micjeŋicko râeniŋte takic‐jopame mâc ŋeeŋgopieŋ.
16Ŋic ojoŋnezi e jahacnere maname feha ŋic 7 jaŋe maŋ mamanasu‐jeŋicko dâŋ fokac i mufuapie maname wawahane ekac.
Muqâqiŋ Dâŋ 26
Muqâqiŋ Dâŋ 26:1-16