Muqâqiŋ Dâŋ 24:3-33

³Ŋic maŋɋârâŋheczi ficticne basarickeocmu, â ŋic mamanaheczi ficticne basanaŋkeme ŋehuc juocmu.

⁴Ŋic mamana sarichec e ficticne maŋne maŋne ba bâpiaŋ ehuc wiac furi sâko râe raocmu.

⁵Ŋic maŋɋârâŋheczi ŋic sasanaŋhec sirickeekac, â ŋic mamanaheczi ŋic tâpirihec ere sâc jâuruekac.

⁶Go maŋɋârâŋ dâŋzi basanaŋgupie ʒikao sâcne racmu, â dâŋ biaŋne bocjaha mutâcne‐garepie irec sâcko ʒika qahuc sâcne sanaŋkecmu.

⁷Maŋɋârâŋ dâŋ i ŋic mutuc matacne ere sâc sirickeekac, irec e tutumaŋko dâŋwiac fârine muc manac ehapie dâŋ biaŋne moc muocte quŋkeocmu.

⁸Ŋic moc e wiac hehesicne eocte mana biric eocmu ere ŋic sindaŋne muniŋmu.

⁹Ŋic mutuc matacnezi wiac kosa manasu biric eme sâqoreekac, â ŋic mu âke sisicne ere ine manapie mamakâcne eocmu.

¹⁰Go dameŋ biaŋnao docke betaŋ ecmuo ine dameŋ ŋemâcnao iŋuc jaha betaŋke‐jâmbâŋkecmu.

¹¹Go ŋic moc hâmocko râezo ehapie mejeŋickonec bataracmurâ mâcne afecne mi ezemec.

¹²Ehuc ʒiŋuc wâc mi muzemec: “No ŋic e mi manakopac.” Manakic, Anutu e dâŋ iŋucne i weniŋucte mukomec i manakac, e maŋgere fuŋne manahuc hone jâjâpecguekac. Eki hâcne ŋic eebapa‐jeŋicte okacne bazu‐jareekac.

¹³Motec‐mae, go baŋac nâzemec, baŋac i wiac biaŋne hâcne. Baŋac opâne qâŋnaonec ro nâc etec maracgao aŋacne eocmu.

¹⁴Eme go irec sâc jaha mamana tara â maŋɋârâŋ mana maŋ etec maŋ qâqâtâcge bâpiaŋkezejec.

¹⁵Go ŋic tiŋne ere wiac fiuc rocmurâ ficticne mi somâckezemec, me fic hae‐ticne wâc mi hetâtiezemec.

¹⁶Manakic, ŋic tiŋne e gâbâ jaha waha qarâ sifu mocwâc fahareekac, â ŋic sindaŋne e ine sisipiriczi bâsiroweocmu.

¹⁷Go kisâge wiac hâhâwicne fuacnehame bubiaŋ mi manazemec.

¹⁸Go iŋuc etec Wofuŋzi honerâ maname mi sâckeha kisâge ŋezickezacte iŋuc mi ezemec.

¹⁹Go ŋic hehesicne jaŋere erâ maŋge mi faharezejec, â ŋic sindaŋne jaŋe wâc iiŋguuŋ mi ejarezemec.

²⁰Ŋic hehesicne jaŋe juku omaeniŋmu â ŋic sindaŋne jaŋere lambe tatamac i hâpoocmu.

²¹O motec‐mae, go Wofuŋ â ŋicwofuŋ jahe mâmâc jaha araŋ bajactezemec, ehuc dâŋjekic qataraeŋgopieŋ ŋic i jaŋere ŋondeŋko mi juzemec.

²²Sisipiriczi ŋic iŋucne jaŋe ututuŋ jaha maic‐jopaocmu. Ehame Wofuŋ â ŋicwofuŋ jaheraonec sisipiric weniŋucne fuaocmu i goki moc manakic me?

²³Ŋic maŋɋârâŋhec jaŋe dâŋ kecʒiŋuc mumbiŋ wâc: Mumutara ŋic e ŋic bârâwiŋ‐joparâ gâcne jaŋere dâŋ muafeckehuc gâcne jaŋere mu mâmâckeme mi sâckeocmu.

²⁴E ŋic bahachec jaŋe ʒiŋuc jazaocmu mecne: “Ŋoŋe bahac tâmiric,” iŋuc jazame mâreŋ sâc ŋicne ŋicne jaŋe e qaisockehuc sâweckeniŋmu.

²⁵Â ŋic bahachec bâtiŋ‐jopaniŋmu mumutara ŋic i jaŋere ʒâŋe biŋe feha bubiaŋ manahuc juhâc qâhâmoniŋmu.

²⁶Dâŋ okacne fâretiŋ jaha mumu izi maŋ mocjaha jujure ma ekac.

²⁷Go qanaŋ hae ʒoŋage emasaŋkerâ nânâ giege he sarac ezemec, izi ʒâhec ine ficge bazemec.

²⁸Go fuŋne tâmiricko ŋic âgoge dâŋgieo mi râezemec, erâ dâŋticne wâc mi muhasickezemec.

²⁹Go ʒiŋuc mi muzemec: “E wiac enarewec irec sâc jaha ecnezepac, no okacne bazucnepemu hâcne.”

³⁰No ŋic ojoŋne â mutuc matacne ere giegaŋ â waiŋ gie fotâcnerâ rahuc wiac ʒiŋuc honepo:

³¹Giegaŋ‐ticne i ʒârâ uupic â hofâ qinʒiŋzi sâcke‐fârewec, â râreckerâ sac fowec i ʒaŋke‐fârewec.

³²Eme no iŋuc honerâ manatâc qâtâc ehuc ʒiŋuc mana tarapo:

³³No rarâ guŋ piticne fopemu me ŋemanahuc sawa ropemuo