Muqâqiŋ Dâŋ 23:5-15

⁵Manakic, tucwipezi furuc furuc qahuc ratâmireekac irec sâc jaha moneŋ mafagezi fakecnehec erâ ratâmireocmu.

⁶Go ŋic buchâro ehec nânâ mi nâzemec, me nânâ aŋacne râe bâmoc eekac irec andac wâc boc mi ezemec.

⁷E nânâ garehuc ŋifec ine upegao baocmu. Ehuc maŋticnezi gorao mi domaha miczi burec erâ ʒiŋuc gazahuc eatucguocmu: “Ware nânâ opâ nâc.”

⁸Go ere nânâ wiac nârâ maŋucmu, ehuc daŋgedâŋ âzâcnetec fârimâc eocmu.

⁹Go ŋic mutuc matacne ere maio dâŋ mi muzemec, e maŋɋârâŋ dâŋge mi mana tarahuc qaisockeocmu.

¹⁰Apa ŋosafâcge jaŋe mâreŋ ma râembiŋ i baʒic baefuc mi ezemec, erâ bekâ mâsiŋ jaŋere mâreŋ wâc mi jowac rozemec.

¹¹Wofuŋ e jaŋere ŋeŋezic hâcne, irec dâŋgieo jaŋere dâŋ dopeckehuc gore dâŋ bawahaocmu.

¹²Go qaqazugere dâŋte hazec râehuc tâpiri fogarekac sâc mamana gie bazemec.

¹³Go naru motec bâtiŋ‐jopazore manabâc mi ezemec, jaŋe kâcbiŋ kirâ mi hâmoniŋmu,

¹⁴aricne, kâcbiŋ kirâ juju bapa‐jeŋic biaŋkeocmu.

¹⁵O motec‐mae, go maŋɋârâŋhec erâ jucmuo ine bunane biaŋkeocmu.