Muqâqiŋ Dâŋ 22:2-13

²Wofuŋzi mafaŋic â hapetac mâmâc bâfuac‐jopawecte fuŋne‐jekic bârâwiŋ mi fokac.

³Ŋic maŋɋârâŋhec jaŋe sisipiriczi maic‐jopame honerâ kizueŋgopieŋ, â ŋic maŋɋârâŋ tâmiric jaŋe ine hone‐bipiehuc rarâ sipirickeeŋgopieŋ.

⁴Go maŋhuhuŋ juhuc Wofuŋ araŋ bacnetec moneŋ mafa â ʒâŋe biŋe fua‐gareme dameŋ ʒora juhâc qâhâmocmu.

⁵Go jujuge ŋezickezo murâ ine hata heririŋko wiwitic wiac râepie foha ŋic sindaŋne jaŋe raʒipie kicjopaekac i kizuzemec.

⁶Go naru motec jaŋe juju hata biaŋne qazu‐jarezemec, eme jaŋe jufeniŋmu sâc irec manasuhuc juniŋmu.

⁷Ŋic moneŋ mafahec jaŋe ŋic hapetac ŋicbomboŋ ejareeŋgopieŋ, â moneŋ hotâ roeŋgopieŋ jaŋe moneŋ jareeŋgopieŋ jaŋere mic sâcko gie baeŋgopieŋ.

⁸Ŋic moc e wiac sindaŋnere gie baocmu e juku irec fârine sisipiric roocmu, bâbâtiŋ hâhâwicnezi fuacnehuc bâsiroweocmu hâcne.

⁹Ŋic moc e afeckerâ nânâ wiac‐ticne ŋic hapetac kâdoc qajareocmu e jambuŋkezo.

¹⁰Ŋic mu âke sisicne e jâpepie raha ŋoŋerao ʒika â mu qaqatarac erâ mumusifuc wiac gâcne i wâc omaeocmu.

¹¹Ŋic dâŋ wokemaŋnehec mueŋgopieŋ jaŋe ŋicwofuŋzi âgo ejareekac, â Wofuŋzi maŋ ɋaɋacne jueŋgopieŋ ŋic i jaŋere maname biaŋkeekac.

¹²Wofuŋ e ŋic mamana tarahec jaŋere dâŋ dopeckeekac, â burecŋic jaŋere dâŋ ine qame wahaekac.

¹³Ŋic ojoŋnezi dâŋ kecʒiŋuc muhuc ficko ŋeekac: “Laioŋzi hae ʒoŋao jukacte huhape nâcnuzackohec.”