Muqâqiŋ Dâŋ 21:7-30

⁷Ŋic sindaŋne jaŋe eebapa tiŋne qikiŋneeŋgopieŋte jaŋacne eebapa repicnezi bitiŋ ejareha raʒipie kicjopaekac.

⁸Kiŋ bahac bâfuaeŋgopieŋzi hata hehesicnao raeŋgopieŋ, bahac fâsâc jaŋe ine wiac ebac epie tiŋke biaŋ efâreekac.

⁹Ŋokac râŋgeŋne ehec fic biaŋnao juju izi wiac wawahane eekac, â e tâmiric kâte bozeo buc juju izi ine wiac fefene eekac.

¹⁰Ŋic sindaŋne jaŋe dameŋ sâc wiac hehesicnere boc ejareekac, jaŋe ŋic mocte busâqoc moc mi manaeŋgopieŋ.

¹¹Ŋic mu âke sisicne qa bâtiŋ ejarepie mutucne jaŋe honerâ mamanahec eniŋmu, ŋic maŋɋârâŋhec jaŋe ine wiac qazu‐jarepie ʒuhuckerâ mamana fua‐jareocmu.

¹²Tiŋne rune e ŋic sindaŋne jaŋere mamanasu hone manac efâreekac, ehuc sisipiricko râec‐jopaekac.

¹³Ŋic moc e hapetac jaŋere wira wâwâsicte hazec mi râeocmuo ine juku e jahacnere wira wâwâsic eme e wâc iŋuc jaha mi bafickezo.

¹⁴Ŋic moczi gore aaric manahame go soŋsoŋko wiac moc râcne tahac etec aaric‐ticne qaʒue wahaocmu.

¹⁵Mumutiŋ gie biaŋne bapie ŋic tiŋne jaŋe bubiaŋ mananiŋmu, â ŋic hehesicne jaŋe ine bipic tatara ejareocmu.

¹⁶Ŋic moc e mamana biaŋne qikiŋneocmuzi hâmokicne jaŋe qâtec‐jopaocmu.

¹⁷Ŋic moc e sahacte wiacko mamaŋ gugutuŋ hurâ juhuc waiŋ â nânâ wiac nâ râmbe eocmuzi ŋic mafa sâkohec mi juocmu.

¹⁸Ŋic sindaŋne jaŋe ŋic tiŋne jaŋere faio wiac ʒârâ ʒâpânehec râezo mueŋgopieŋ izi ŋerisierâ jaŋe jaŋacne faio feekac.

¹⁹Ŋokac râŋgeŋ qaŋqaŋne â hâdi boŋkekicne ehec juju i wiac wawahane, â mâreŋ burocnao buc juju izi ine wiac fefene.

²⁰Ŋic maŋɋârâŋhec jaŋe moneŋ mafa wiac‐jeŋic biaŋne qâzuckepie fojareekac, â ŋic mutuc matacne â iric iricne jaŋe ine bâfuaeŋgopieŋ sâc kosa behepie rafâreekac.

²¹Ŋic moc e tiŋne juju â miriŋ babac ee irec henʒiriŋneocmuzi ʒâŋe biŋehec erâ juhâmoocmu.

²²Momori ŋic maŋɋârâŋheczi ŋic tâpirihec jaŋere haesac sanaŋ henʒaŋ qanʒaŋneocmu, ehuc hae sanaŋ‐jeŋic ro rauc sâcne eocmu.

²³Ŋic moc e micticne soŋaŋkeocmuzi ʒârâ hâriŋ faio boc mi feocmu.

²⁴Sahac fefe juhuc pepec penaroŋ â picʒoŋ eeŋgopieŋ jaŋere “ŋic mu âke sisicne” muzo.

²⁵Ŋic moc e giere takickeme ojoŋ juocmuzi e jahacne sahac sipirickeocmu.

²⁶Ŋic sindaŋne jaŋe dameŋ sâc ŋic âgofâc‐jeŋic jaŋere wâcwiac irec andac eeŋgopieŋ, â ŋic tiŋne jaŋe ine wiac‐jeŋic mi sakarehuc buafec jaha qikiŋneeŋgopieŋ.

²⁷Ŋic sindaŋne jaŋe taha bâzi rikepie Wofuŋzi maname mamakâcne eekac, jaŋe maŋjeŋicko wiac qame gâpâcne foha bâzi rikepie iŋuc hâcne mana‐jareekac.

²⁸Mumutaniŋ ŋic burecnezi sipirickeocmu, â moc e dâŋticne manatâc qâtâc ehuc fâretiŋ jaha muocmuzi ine juhâc qâhâmoocmu.

²⁹Ŋic sindaŋne jaŋe râsi ʒâŋe fieŋgopieŋ, â ŋic tiŋne jaŋe ine hata‐jeŋic mana taraeŋgopieŋ.

³⁰Maŋɋârâŋ â mamana tara erâ mumutâc dâŋ biaŋne wiac i sasawa Wofuŋte maio wiac omane efâreekac.