Muqâqiŋ Dâŋ 20:1-20

¹Ŋic jaŋe opâ sanaŋ bocjaha nârâ mutuc bacjopame bebe qahuc dâŋ ojowa kosa eeŋgopieŋ. Opâ sanaŋ nâku maŋsifuc ee i wiac mutucne.

²Ŋoŋe laioŋ owa‐ticnere hâwic‐ŋopaekac irec sâc jaha ŋicwofuŋ aaric‐ticnere hâwic‐ŋopazejec. Ŋoŋe ŋicwofuŋ maŋbâiŋ ecnehuc manapie juju‐nâŋec doc baŋgopeneŋ ezejec.

³Ŋic mutucne jaŋe dâŋ mu qaqatarac eeŋgopieŋ; mu qaqatarac tâmiric juju izi ine wiac biaŋne ekac.

⁴Ŋic moc e gie hesarac dameŋko qâoma juocmuzi qa roro dameŋ maickeme nânâ basaocmu.

⁵Ŋic maŋ mamanasu‐nâŋec i nombâŋ ʒoricnao opâ ŋeekac irec sâc, i ŋic mamana taraheczi sawa fâreme wefuocmu.

⁶Ŋic bocjaha jaŋe jaŋacne manapie tiŋne â biaŋne juŋgopeneŋ eekac, ehame sifu ŋic biaŋne moc bâfuanaŋte babasa gie sâko baeŋgopeneŋ.

⁷Ŋic moc e siocmâc juhuc wiac tiŋne ebac eekac ere naru motecfâc jaŋere manapene ʒerine eekac.

⁸Ŋicwofuŋ e dâŋ mumutara ŋeŋe‐ticnao ŋehuc wiac hehesicne hone ʒâŋitac efâreocmu.

⁹Ŋic moczi ʒiŋuc sâcne muocmu: “No sâqocne tâmiric juekopacte maŋnanezi mumu hehec mocwâc mi enareekac?”

¹⁰Ŋemâc bâbâfuare sâc â meda wiac sâctiri babaju i Wofuŋte maio wiac mamakâcne eekac.

¹¹Naru motec jaŋe eebapa‐jeŋiczi fuŋne‐jeŋic bataniŋkeekac, eme honec‐jopapene biaŋne â siocmâc jueŋgopieŋ irec fuŋne taniŋkeekac.

¹²Wofuŋ e dâŋ mananaŋte hazec‐nâŋec râewec, â wiac hone taranaŋte ʒâŋe‐nâŋec wâc bâfuawec.

¹³Go guŋgie sawa bahuc dameŋ sipirickecmuo ine hapetac erâ jucmu, â guŋɋâri juhuc gie ʒoɋachec bacmuo ine nânâ mâriri fofo dunduŋ fua‐gareocmu.

¹⁴Ŋic moc e wiac furine baocte ehuc, “Furine boc fekac,” iŋuc manasurâ situâc rune ʒoɋac ecneme furine bawahacneme rorâ rahuc sahac‐ticne muteŋkeocmu.

¹⁵Gol â qânâ furi sâko fuŋne fuŋne forakac, erâ sifu maŋɋârâŋ dâŋzi wiac i sasawa sirickerâ qânâ fuŋmoc furi sâko irec sâc ekac.

¹⁶Ŋic moczi mutuc erâ ŋic âgo‐ticnere tofa bazuocte mupaŋkeocmuo ine ŋaqi qoruc‐ticne hotâ jâoc rorâ râepene foha mumupaŋ‐ticnere fârine bâfuazejec.

¹⁷Go sioc ehuc wiac nânâne bâfuarâ nâtec qanaŋ aŋacne eocmu, izi ʒâhec ine nâkâcnehuc manatec maracgao hâtâ qiŋqiŋne eocmu.

¹⁸Dâŋ biaŋne mutâcne‐garehapie irec sâcko gie batec fârinehec eocmu, irec go dâŋ manasu biric ehâmorâ ie ʒikao razemec.

¹⁹Doc bapa ŋiczi dâŋ soŋne sâcne mi bajuocmu, irec ŋic moc dâŋ bocjaha woseekac e dic bacnenʒepieŋ.

²⁰Go neŋgoc mamac jahecge sâwec‐jofacmuo ine lambezi dapâcko hâpoekac irec sâc jujugezi omaeocmu.