Muqâqiŋ Dâŋ 1:1-33

¹Dawidire ŋokâ Salomo, Israe ŋicwofuŋ hâcne, ere muqâqiŋ dâŋ sasawa ʒi.

²Muqâqiŋ dâŋ ʒizi maŋɋârâŋ â mumutâc dâŋ biaŋne hone mana tarac enaŋte â dâŋ qame hukicne wâc mana taranaŋte bafic‐nâpoocmu.

³Dâŋ izi hâcne weniŋuc erâ mamanahec juzo â siocmâc tiŋne â biaŋne juju irec fuŋne sâcne qazu‐nâreocmu.

⁴Ehuc ŋic babititicne jaŋe jujure fuŋne jaza mutâc eha maŋfârihec eniŋmu â ŋic socɋâri jaŋe wâc mamana â maŋɋârâŋ qazu‐jareocmu.

⁵Ehame maŋɋârâŋhec jaŋe dâŋ ʒi wose manac epie mamana‐jeŋic fua ɋârâŋkeocmu â maŋfânâŋhec jaŋe wâc bafic‐jopahuc juju hata biaŋnao jowa qataŋ ejareocmu.

⁶Ehame muqâqiŋ dâŋte fuŋne â ŋic maŋɋârâŋhec jaŋere dâŋ herâricne â suŋsuŋne i sâcne mana taraniŋmu.

⁷Wofuŋ araŋ babacne izi maŋɋârâŋte hata fufuŋkene ekac. Ŋic mutuc matacne jaŋe maŋɋârâŋ dâŋte manapie wawahane eha mananiŋte takic‐jopaekac.

⁸Motec‐mae, go mamacgezi dâŋ gaza qazuc eekac i manazemec, â neŋgocgezi dâŋ muekac irec hazec wâc râezemec.

⁹Iŋuc ehuc jahere dâŋte manatec qizecgere eridu â upegere qoqonaŋ ezejec.

¹⁰Motec‐mae, go ŋic sindaŋne jaŋe esâicgupie mi docke‐jarezemec.

¹¹Jaŋe ʒiŋuc mecne gazaniŋmu: “Ajoc, go waretec ra ŋic maŋhumuc e me e bâfuarâ qâhâmonaŋ. Nâŋâc ŋic biaŋne fuŋne tâmiric mâc qâhâmonʒepeneŋ.

¹²Jaŋe biaŋne â ɋiɋicne juhapie bâfuac‐joparâ jopapene hâmorâ foranʒepieŋ.

¹³Ehame moneŋ mafa wiac‐jeŋic fuŋne fuŋne bâfuarâ ficnâŋecko râe guruc epene fusucmazejec.

¹⁴Irec ware qâtec‐nâpoc, eme wiac fiuc ronaŋmu sâc bâtâc banʒepeneŋ.”

¹⁵Motec‐mae, go ŋic iŋucne jaŋehec mi juhuc dic bajarezemec.

¹⁶Jaŋe wiac hehesicne eniŋte ʒoɋac erâ ʒikare goŋgoricne heeŋgopieŋ.

¹⁷Jaŋe ʒoaŋko wipe jaŋe honec‐jopahapie ufic fârepie mi jowaniŋmu.

¹⁸Ŋic iŋucne jaŋe burec ehuc jaŋe jaŋacne bitiŋ râepie kicjopaocmu.

¹⁹Ŋic ʒika qahuc wiac fiuc roniŋmu jaŋe ʒikare biŋe jaha eniŋmu, fiuc roro jaŋe iŋuc hâcne fua‐jareocmu.

²⁰Manaŋgopieŋ, maŋɋârâŋzi ŋic baafec‐jopaekac jaŋe hata upeo me hae ʒoŋao maŋɋârâŋ dâŋ mueŋgopieŋ.

²¹Erâ haesac motâcko â ŋic tutumaŋko maŋɋârâŋ dâŋ musokaeŋgopieŋ wâc.

²²O ŋic mutuc matacne! Ŋoŋe mutuc‐ŋeŋic i mo dameŋko moc omaeocmu? Me mamana sâkore mu âke sisic ehuc mamana qiqikiŋ i wezimucko moc beheniŋmu?

²³Ŋic maŋɋârâŋhec jaŋe mu bâtiŋ eŋarepie dâŋjeŋic mananʒepieŋ, jaŋe hâcne uŋ sawaŋ biaŋne eŋarehuc ŋoŋe wâc mamanahec eniŋte dâŋ ŋazaeŋgopieŋ.

²⁴Jaŋe wira hefârec eŋarembiŋ, ehame ŋoŋe ine dâŋjeŋicte hazec mi râembiŋ, â mejeŋic sicne‐ŋarepie mi rombiŋ.

²⁵Ŋoŋe uŋsawaŋ dâŋjeŋic qâsuahuc mu bâtiŋ eŋarezo mupie takic‐ŋopame qikiŋnembiŋ.

²⁶Irec sisipiric fua‐ŋareme honec‐ŋoparâ gâwie‐ŋareniŋmu, â wiac hâhâwicnezi fai‐ŋeŋicko feme mu âke sisic eŋareniŋmu wâc.

²⁷Wiac izi mâŋâŋ ɋicwânʒâŋnehec iŋucne fisi‐ŋarehuc ʒâic fâro â ʒârâ hâriŋ bâfua‐ŋareme iŋuc hâcne eŋareniŋmu.

²⁸Iŋuc fua‐ŋareme maŋɋârâŋte wira wâwâsic epie arictac eocmu. Ehuc ira me ira maŋɋârâŋ bâfuaniŋte basa‐bipieniŋmu hâcne.

²⁹Ŋoŋe dameŋ sâc maŋɋârâŋte manapie wiac wawahane eha Wofuŋ araŋ bacneniŋte takic‐ŋopame qikiŋnembiŋ.

³⁰Ŋoŋe uŋsawaŋ dâŋjeŋicte moc mi eŋareha mu bâtiŋ eŋarezo mupie râŋgeŋkembiŋ.

³¹Irec ŋoŋe juju bapa‐ŋeŋicte fârine rohapie wiac ebac embiŋ irec okacne fisi‐ŋareocmu hâcne.

³²Ŋic mamana tâmiric jaŋe maŋɋârâŋ dâŋ qikiŋneeŋgopieŋte hâmoniŋmu, â ŋic mutuc matacne jaŋe manabâc tâmiric kosa jueŋgopieŋte sipirickeniŋmu.

³³Maŋɋârâŋ dâŋ mana maŋ eocmu ŋic eki ine hâhâwic tâmiric wama faio juhâc qâhâmoocmu.