Muqâqiŋ Dâŋ 19:8-28

⁸Go gahacne manasuhuc mamana fuŋne fuŋne rozemec, erâ mamana rokomec i bajuhuc juhâc qâhâmozemec.

⁹Ŋic moc e dâŋgieo domahuc dâŋ muhasickeocmuzi bâbâtiŋ roocmu, â ŋic moc e burecdâŋ muocmuzi sipirickeocmu.

¹⁰Ŋic mutuc matacne jaŋe moneŋ mafa sâkohec mi junʒepieŋ, â kiŋaŋ qaqa jaŋe ŋic fekicne ŋicbomboŋ mi ejarenʒepieŋ.

¹¹Ŋic mamanahec e kimbeŋ aaric‐ticne sâcne fâre wahaocmu, â ŋic moczi wiac sâqocne moc ecneme hone takirehuc behecneme sâcke‐hâmoocmu.

¹²Ŋicwofuŋzi aarickeme owackeekac i laioŋte owa iŋucne, â âgo miriŋ‐ticnezi ine titikuczi kecɋaŋ bâgunuckeekac irec sâc ekac.

¹³Motec mutuc matacnezi mamac‐ticne sipirickeekac, â ŋokac râŋgeŋnere dâŋzi hoe micpiic heekac irec sâc ehuc tatakic bâfua‐nâreekac.

¹⁴Fic hae â moneŋ mafa wiac i neŋgoc mamacfâc‐nâŋec jaŋere merâfâc roeŋgopeneŋ, â ŋokac mamanahec ine Wofuŋzi sawa bâfua‐nâreekac.

¹⁵Go ojoŋ juzo murâ juzemec, erâ guŋ fohuc nânâre hâmozemec.

¹⁶Ŋic moc e Anuture sâcmutâc dâŋ mana rereŋ eocmuzi juhâc qâhâmoocmu, â moc e qâsuaocmuzi ine hâmo sipiric eocmu.

¹⁷Ŋic hapetac ehâmo‐jarehuc manapie Wofuŋ ecneŋgopeneŋ ezejec, eki hâcne okacne bazu‐ŋareocmu.

¹⁸Ŋoŋe naru motecfâc‐ŋeŋic piticne jaba juhapie qa bâtiŋ ejarenʒepieŋ, iŋuc mi eniŋmuo ine sisipiric hatao rahapie bafic‐jopaŋgopieŋ eocmu.

¹⁹Ŋic moc e dameŋ sâc aaric onʒoŋ jaha manahuc juocmuo ine ecnepene furi râezejec, â hone qâoma ecnenaŋmuo ine aaric‐ticnere ʒoczi nâŋâcne faio feocmu.

²⁰Go ŋic jaŋe baficguhuc dâŋ biaŋne gazapie mana rereŋ ezemec, go iŋuc erâ juku maŋɋârâŋhec ecmu.

²¹Ŋic nâŋâc mamanazi wiac fuŋne fuŋne irec dâŋ mana biric ezo murâ sâcne enaŋmu, ehame Wofuŋte micdâŋzi ine fârinehec eocmu.

²²Buchâro nânâ i wiac mamakâcne. Nâŋâc ŋic hapetac ere manapene fefene eha burecŋicte manapene wawahane eekac.

²³Go Wofuŋ araŋ bacnehuc juzemec. Go iŋuc ehuc dameŋ ʒora wama faio juhâc qâhâmohaŋtec sisipiric wiac izi me izi moc mi maicguocmu.

²⁴Ŋic gâcne jaŋe qâoma sâko ehuc nânâ wiac micjeŋicko râeniŋte takic‐jopame mâc ŋeeŋgopieŋ.

²⁵Ŋic pepec penaroŋhec jaŋe qa bâtiŋ ejarepie fuŋne‐jeŋic mananʒepieŋ, ŋic maŋɋârâŋhec jaŋe mu bâtiŋ ejarepie ine mamana‐jeŋic ɋârâŋkeocmu.

²⁶Motec sindaŋne â qaqaharicnezi sawa mamac‐ticne bâʒâickeocmu â neŋgoc‐ticne ficticnaonec jâpeme raocmu.

²⁷O motec‐mae, go ʒuhuckerâ mamana rozore takicguocmuo ine juwicnao mamana romeŋ i wâc nikecguocmu.

²⁸Mumutaniŋ ŋic hehesicnezi dâŋgie tiŋnere maname fâri tâmiric eekac, â ŋic sindaŋne jaŋe wiac hehesicnere aŋac‐jopaekac.