Muqâqiŋ Dâŋ 18:10-24

¹⁰Anuture dâŋ i huec sanaŋ iŋucne, irec ŋic tiŋnezi ira ferâ wamao sâcne ŋec foc eocmu.

¹¹Ŋic gâcne jaŋe moneŋ mafa wiac‐jeŋicte manapie haesac sanaŋ ʒoricne irec sâc ehuc ŋezic‐nâpokac tinac eekac.

¹²Ŋic maŋhuhuŋ jueŋgopieŋ jaŋere manapene fefene eekac, â ŋic pepec penaroŋhec jaŋe ine sisipiricte hatao raeŋgopieŋ.

¹³Go qanaŋ dâŋte hazec râezemec izi ʒâhec dâŋ okacne bâtikiezemec, go iŋuc mi ecmuo ine mutuc erâ mimi faio fecmu.

¹⁴Ŋic moc e jujure ʒoɋac focneocmuzi huc ʒâic fuacneme sâcne qamaseocmu, â ʒoɋac‐ticne omaeme ie maŋticne gâcke‐fâreocmu.

¹⁵Ŋic mamana sarichec jaŋe dameŋ sâc mamana ʒuhuckerâ roniŋte afeckerâ giene baeŋgopieŋ.

¹⁶Go ŋic ʒâŋe biŋe sâkohec ere maio fuazo murâ ine bubiaŋte wiac moc afeckerâ bacne razemec.

¹⁷Ŋic moc e dâŋgieo dâŋticne fuŋkerâ mume manapie fârine eekac, izi ʒâhec ine kisâ‐ticnezi ŋifecne mume fâri tâmiric eekac.

¹⁸Ŋic jajahec ʒâŋe biŋe sâkohec jahe dâŋgieo dâŋ mu qaqatarac epire ɋâsâi qapie dâŋjekicte fuŋne taniŋkeekac.

¹⁹Go qomâge baficketec eki wâc ŋifec sacsanaŋge erâ ŋezicguocmu, me ehec mu qaqatarac etec râpecguocmu.

²⁰Ŋic moc e dâŋ muocmu irec sâc jaha fârine bâfuaocmu.

²¹Dâŋ sasawa mueŋgopeneŋ izi ŋifec juju‐nâŋec ŋezickeekac, â ŋifec ine sipirickeekac; irec dâŋ muekic sâc fârine bâfuarâ manatec sâckezejec.

²²Go ŋokac rohuc wiac biaŋne rocmu, ehame Wofuŋzi ehâmo‐gareekac irec fuŋne taniŋkeocmu.

²³Ŋic hapetaczi dâŋ mume nunumu hawari eekac, â ŋic moneŋ mafaheczi dâŋ mume ine ʒâʒâicne eekac.

²⁴Ŋic gâcne jaŋe âgo hawari burec burec sawa enâreeŋgopieŋ, â ŋic gâcne jaŋe ine hahac ɋa jaŋe ââgo eeŋgopieŋ irec sâc sirickehuc âgo enâreeŋgopieŋ.