Muqâqiŋ Dâŋ 17:3-18

³Ŋic jaŋe gol â siliwa wiac i ʒocko rike esâic epie wosâeekac irec sâc jaha Anutuzi ŋic maŋnâŋec ba esâic eekac.

⁴Ŋic hehesicne jaŋe dâŋ hehesicnere hazec râeeŋgopieŋ, â burecŋic jaŋe dâŋ sisipirichec i mana rereŋ eeŋgopieŋ.

⁵Ŋic moc e ŋic hapetac moc mu âke sisic ecneocmuzi Mamac bâbâfua‐ticne e wâc mâmâc ecneocmu, â moc e ŋic âgo‐ticne wiac hâhâwicne moc fuacneme honerâ bubiaŋ manaocmuzi ine bâbâtiŋte biŋe eocmu.

⁶Ŋic mocte motecfâc jaŋe mamac‐jeŋicte manapie fefene eekac, irec sâc jaha ŋicqizec jaŋe ŋosafâc‐jeŋic jaŋere manapie fefene wâc eekac.

⁷Ŋic mutuc matacne jaŋe dâŋ fârine mupie boc mi biaŋkeekac, â ŋic fekicne jaŋe burecdâŋ mupie sâqore‐jâmbâŋkeekac.

⁸Ŋic gâcne jaŋe bâbâmiriŋ moneŋte manapie qaŋgec tinac eha izi gie i me i bazo murâ sâcne baocmu.

⁹Ŋic jaŋe âgo egareniŋte manasukicko ine wiac esâqore‐garembiŋ irec kiŋ behe‐jarezemec. Jaŋe wiac egarembiŋ irec dâŋ i giŋkeme giŋ murahuc jutecne âgo ʒuʒuhuc‐ŋeŋic i tâcne‐fâreocmu.

¹⁰Ŋic mamanahec e arec mocjaha sawa mu bâtiŋ ecnepene mana‐hâmoocmu, â ŋic mutuc matacne e ine arec 100 qa bâtiŋ ecnepene sifu mi manaocmu.

¹¹Wiac hâhâwicnere qaqafeŋ gie baniŋmu ŋic hehesicne i jaŋerao hâmoczi hata kiŋaŋ ʒocnehec raeŋgopeneŋ irec sâc fisiocmu.

¹²Qowi mimicne ʒâŋene bea e motecfâcne jâoc rofârepie momori eha sifu jâuruzo murâ sâcne jâurunaŋmu mecne, â ŋic mutucne maŋsifuc‐ticnehec ere ine hâwic‐nâpo‐jâmbâŋkeme wisecnenʒepeneŋ.

¹³Ŋic jaŋe wiac biaŋne eŋarehapie okacne wiac hehesicne bâtikie‐jareniŋmuo ine hehesiczi ficmaŋ‐ŋeŋicko mi omaeocmu.

¹⁴Dâŋ fuŋkerâ muhuc mu qaqatarac ee i opâ kanaŋ hehapene hawec fuaekac irec sâc ekac, irec dâŋ fuŋkehuc izia mocwâc behezo.

¹⁵Wofuŋ e ŋic sindaŋne mumbiaŋ‐jopaeŋgopieŋ jaŋere mecne, â ŋic tiŋne musâqorec‐jopaeŋgopieŋ jaŋere mâmâc maname mamakâcne eekac.

¹⁶Ŋic moc e mamana tâmiric mutuc matacne juekaczi mamana roocte moneŋ beheme wemo fârine moc fuacneocmu?

¹⁷Ŋic ââgo eeŋgopieŋzi maŋjauŋ eec eeŋgopieŋ, â qoqomâ jueŋgopieŋ jaŋe wiac ŋemâcne i babaficko de âsic eeŋgopieŋ.

¹⁸Ŋic moc e maŋ mamanasu tâmiric juocmuzi mutuc erâ ŋic âgo‐ticnere tofa bazuocte mupaŋkeocmu.