Muqâqiŋ Dâŋ 17:11-27

¹¹Wiac hâhâwicnere qaqafeŋ gie baniŋmu ŋic hehesicne i jaŋerao hâmoczi hata kiŋaŋ ʒocnehec raeŋgopeneŋ irec sâc fisiocmu.

¹²Qowi mimicne ʒâŋene bea e motecfâcne jâoc rofârepie momori eha sifu jâuruzo murâ sâcne jâurunaŋmu mecne, â ŋic mutucne maŋsifuc‐ticnehec ere ine hâwic‐nâpo‐jâmbâŋkeme wisecnenʒepeneŋ.

¹³Ŋic jaŋe wiac biaŋne eŋarehapie okacne wiac hehesicne bâtikie‐jareniŋmuo ine hehesiczi ficmaŋ‐ŋeŋicko mi omaeocmu.

¹⁴Dâŋ fuŋkerâ muhuc mu qaqatarac ee i opâ kanaŋ hehapene hawec fuaekac irec sâc ekac, irec dâŋ fuŋkehuc izia mocwâc behezo.

¹⁵Wofuŋ e ŋic sindaŋne mumbiaŋ‐jopaeŋgopieŋ jaŋere mecne, â ŋic tiŋne musâqorec‐jopaeŋgopieŋ jaŋere mâmâc maname mamakâcne eekac.

¹⁶Ŋic moc e mamana tâmiric mutuc matacne juekaczi mamana roocte moneŋ beheme wemo fârine moc fuacneocmu?

¹⁷Ŋic ââgo eeŋgopieŋzi maŋjauŋ eec eeŋgopieŋ, â qoqomâ jueŋgopieŋ jaŋe wiac ŋemâcne i babaficko de âsic eeŋgopieŋ.

¹⁸Ŋic moc e maŋ mamanasu tâmiric juocmuzi mutuc erâ ŋic âgo‐ticnere tofa bazuocte mupaŋkeocmu.

¹⁹Ŋic moc e mu qaqataracte aŋac bajuocmuzi sâqocnere aŋackeocmu, â moc e sahac fefe dâŋ muekaczi ʒârâ hâriŋ hefâreocmu.

²⁰Ŋic moc e maŋ mamanasu‐ticne sâqocne foha wiac ebac eme sifu mi biaŋkeocmu, â moc e dâŋ simbiŋne muhuc juocmuzi sisipiric bâfuaocmu.

²¹Motec moc e wiac mutucne ebac eekaczi mamac‐ticne ʒâic busâqoc sawa bâfuacneekac.

²²Bubiaŋ faio juju izi nârâ bibiaŋ iŋucne erâ basanaŋ‐nâpohuc bâpiaŋ‐nâpoekac, â busâqoc faio juju izi ine tâpiri‐nâŋec bawahaekac.

²³Mumutara ŋic hehesicne jaŋe soŋsoŋko bâbâmiriŋ moneŋ rohuc dâŋgieo dâŋ muhasickeeŋgopieŋ.

²⁴Ŋic mamanaheczi wiac biaŋne ebac eocte mana tara‐fâreekac, â ŋic mamana tâmiric eki ine hata basaekac.

²⁵Motec mutuc matacne e mamac‐ticne ʒâic busâqoc bâfuacnehuc neŋgoc roro‐ticne iŋuc jaha ʒâic fâro bâfuacneekac.

²⁶Ŋic tiŋne jaŋe sahac taha moneŋ râeniŋte mujarepene mi sâckeocmu, â ŋic biaŋne jaŋe ʒika kiniŋte mupene sâqore‐jâmbâŋkeocmu.

²⁷Ŋic mamana taraheczi dâŋ bocjaha kosa mi muocmu, â ŋic maŋ mamanasuheczi maŋwamahec juocmu.