Muqâqiŋ Dâŋ 16:1-21

¹Ŋic nâŋâc wiac irec me irec dâŋ mu biric ezo murâ enaŋmu, ehame irec dâŋ mumutara ine Wofuŋzi eocmu.

²Ŋic nâŋâc wiac ebac ehuc manapene tiŋke biaŋ eekac, mâc fuŋne weniŋucte eeŋgopeneŋ i ine Wofuŋzi buc manaekac.

³Go gie moc bazo murâ Wofuŋzi jambuŋke‐gareocte numucnehuc batec fârinehec eocmu.

⁴Wofuŋ e wiac sasawa fuŋnehec bâfuac‐jopa‐fârewec, ehuc ŋic sindaŋne jaŋe ine sisipiricte biŋe râec‐jopawec.

⁵Wofuŋ e ŋic pepec penaroŋhec jaŋere maname mamakâcne eekac, irec jaŋe okacne rojâmbâŋkeniŋmu.

⁶Go Anutu manasiŋkehuc erao qohotatec sâqocnege bâtâmireocmu, â Wofuŋ araŋ bacnehuc jutec wiac hâhâwicne moc mi fua‐gareocmu.

⁷Nâŋâc Wofuŋzi juju bapa‐nâŋec honeme biaŋkeha râsifâc‐nâŋec âgo ejarepene jaŋe âgo jaha enâreniŋmu.

⁸Nâŋâc siocmâc juhapene wiac afecne sawa fua‐nâreme manapene mi sâqorezejec, â eeatuc ehuc moneŋ mafa bocjaha bâfuanaŋmuo ine sâqoreocmu.

⁹Maŋnâŋeczi juju hata‐nâŋecte dâŋ manasu biric eekac, ehame Wofuŋzi ine hata fâretiŋ jaha nâzâ nâwotuc eekac.

¹⁰Ŋicwofuŋ e Anuture micte dâŋ muekac, irec e moc mi musifuckehuc dâŋ fârine sawa muekac.

¹¹Wofuŋzi ŋemâc bâbâfuare sâc â sâcmeda wiac i sâckoa fofâreocte muekac, wiac sasawa i eki hâcne bâfua‐fârewec.

¹²Hehesic bâbâfua izi ŋicwofuŋ jaŋere maio mamakâcne eha tiŋne jujuzi eri ŋeŋe‐jeŋicte hobeteŋne eekac.

¹³Ŋicwofuŋ e dâŋ fâri hândâŋne manaocte ecneekac, irec dâŋ fârine muniŋmu ŋic i jaŋe hâcne âgo ejareocmu.

¹⁴Ŋicwofuŋ e maŋʒoc‐ticne fuame ŋic moc qâhâmozacte ŋic maŋɋârâŋhec jaŋe mu bâmâteŋ ecneeŋgopieŋ.

¹⁵Ŋicwofuŋ e ʒâŋe mai‐ticne fie ruruckeme honepene âgo hawari eekac, ehame ʒoaŋ dameŋko hoezi mâreŋ bâgunuckeekac irec sâc enâreekac.

¹⁶Nâŋâc gol me siliwa babaju irec manapene wawahane eha maŋɋârâŋ â mamanahec juju irec ine manapene fefene ezejec.

¹⁷Ŋic biaŋne jaŋe sisipiricte hata geŋkeeŋgopieŋ, irec ŋoŋe hata‐ŋeŋic hone‐hâmohuc ranʒepieŋ; ŋoŋe iŋuc ehuc juju‐ŋeŋic ŋezickeniŋmu.

¹⁸Sahac fefezi sisipiricte hata baekac, â pepec penaroŋzi ine sâc ijaha ehuc bawahac‐nâpoekac.

¹⁹Ŋic hapetac â maŋhuhuŋ jueŋgopieŋ jaŋehec juju irec manapene fefene ezejec, â ŋic pepec penaroŋ eeŋgopieŋ jaŋehec juhuc kâdoc qaqa irec ine manapene wawahane ezejec.

²⁰Ŋic moc e Anuture dâŋ âzâcne qazuc ekicne i mana rereŋ eocmuzi juhâc qâhâmoocmu, â moc e Wofuŋtao roweckehuc juocmu ere manapene ʒerine eocmu.

²¹Ŋic moc e maŋɋârâŋhec jume honerâ ŋic mamana sarichec mucneeŋgopieŋ, ehame dâŋ biaŋne mume aŋac‐jopaha mana ʒakieeŋgopieŋ.