Muqâqiŋ Dâŋ 15:4-29

⁴Dâŋ biaŋnezi juju bâfua‐nâreekac, â dâŋ gâgâpâcnezi ine maŋnâŋec bâsâqoreekac.

⁵Motec mutucnezi mamac‐ticnere mubâtiŋ dâŋ qaisockeekac, â mana maŋ eekaczi ine maŋɋârâŋhec eekac.

⁶Ŋic tiŋne jaŋe moneŋ mafa ɋâfoŋne fojareekac, â ŋic sindaŋne jaŋere huhure wiac ine sifuckeekac.

⁷Ŋic mutucne jaŋe mâcne, maŋɋârâŋhec jaŋe mamana dâŋ musaweeŋgopieŋ.

⁸Ŋic siocmâc jaŋe Wofuŋ numucnepie maname biaŋkeekac, â ŋic sindaŋne jaŋe taha bâzi rikecnepie ine maname mamakâcne eekac.

⁹Wofuŋ e ŋic sindaŋ hârindaŋne jaŋere eebapa honeme gâgâpâcne eekac, â wiac tiŋne ebac eeŋgopieŋ jaŋe ine maŋzi ʒâfic‐jopaekac.

¹⁰Moc e wiac hehesicne ebac eocmu ere faio okacne hâhâwicne feocmu, ehame bâbâtiŋ qikiŋnehuc hâmoocmu.

¹¹Hâmoc haere fuŋne Wofuŋte maio tâtâc fohame ine wemocko ŋiczi maŋticnere fuŋne moc Wofuŋte maio sâcne hesoŋkeocmu.

¹²Ŋic mu âke sisicnezi bâbâtiŋte takickeekac, â ŋic maŋɋârâŋhec jaŋe dâŋzi bafickeniŋte wâc mi ecneekac.

¹³Ŋic moc e bubiaŋ maname ʒâŋe maine fie ruruckeocmu, â moc e busâqoc maname ine ʒâŋe maine ki humimic eocmu.

¹⁴Ŋic mamanaheczi mamana gie ʒuhuckerâ baocte ecneekac, â ŋic mutuc matacnezi ine mutucdâŋ sawa muhuc juocte ecneekac.

¹⁵Ŋic waha qaqane jaŋere juju i biaŋne aricne, â juhâc qâhâmoeŋgopieŋ jaŋe ine juju‐jeŋicte manapie ʒerine eekac.

¹⁶Hapetac juhuc Wofuŋ araŋ babacne irec manapene fefene ezejec, â moneŋ mafahec ʒârâ ʒâpâ faio juju irec ine manapene wawahane ezejec.

¹⁷Maŋjauŋ enârehuc nânâ monʒaŋ wiac sawa gumec‐nâpopie sifu manapene fefene ezejec, â qaisoc‐nâpohuc qowi biuc wokemaŋ sâkohec nârepie manapene wawahane ezejec.

¹⁸Ŋic maŋʒocheczi ʒikadâŋ bâfuaekac, â ŋic buurucheczi ine wamadâŋ bâfuaekac.

¹⁹Ŋic moc e ojoŋ juocmuzi dameŋ sâc ŋemâc bâfuaocmu, â moc e siocmâc juocmuzi ine ʒâic busâqoc tâmiric juocmu.

²⁰Motec maŋɋârâŋheczi mamac‐ticne bubiaŋ qacneocmu, â motec mutucnezi ine neŋgoc‐ticne qaisockeocmu.

²¹Ŋic mutuc matacne jaŋe mutuc‐jeŋicte manapie bubiaŋnehec eekac, â ŋic maŋɋârâŋhec jaŋe ine wiac ebac epie tiŋke biaŋ efâreekac.

²²Ŋic âgofâcge jaŋe baficguhapie dâŋwiacge mu biric etec fârinehec eocmu, â i tâmiric ine fârimâc eocmu.

²³Ŋic gâcne jaŋe dâŋ muniŋte eipiehapie dameŋ ijaha ŋic moczi dâŋ fârine jazame manapie bubiaŋnehec eocmu.

²⁴Ŋic maŋɋârâŋheczi hâmoc haere hatao mâcne, jujure hatao raekac.

²⁵Wofuŋzi ŋic pepec penaroŋhec jaŋere fic hae hetâc qâtâtieekac, â hozec jaŋere wâcwiac ine ŋezickehuc akickeekac.

²⁶Wofuŋ e ŋic sindaŋne maŋ mamanasu‐jeŋicte maname wiac mamakâcne eekac, â ŋic maŋɋârâŋhec jaŋere dâŋte ine maname aŋac baŋacne eekac.

²⁷Ŋic moc e eeatuc ehuc moneŋ mafa hureocmuzi wiacfâcne ŋemâc bâfua‐jareocmu, â moc e bâbâmiriŋ mi roocmuzi ine dameŋ ʒora juhâc qâhâmoocmu.

²⁸Ŋic biaŋne jaŋe dâŋ okacne bâtikieniŋte mana tara‐hâmorâ bâtikieeŋgopieŋ, â ŋic sindaŋne jaŋe ine dâŋ manabâc tâmiric kosa mupie sâqoreekac.

²⁹Wofuŋ e ŋic tiŋne jaŋere nunumu manaekac, â ŋic sindaŋne jaŋere ine suŋgiŋkeekac.