Muqâqiŋ Dâŋ 13:9-24

⁹Ŋic tiŋne jaŋe lambe tatamac sâko iŋucne, â ŋic sindaŋne jaŋe ine lambe tatamac gâkowaekac irec sâc.

¹⁰Ŋic ʒaubacne jaŋe bahac fuŋne fuŋne bâfuaeŋgopieŋ, â ŋic maŋɋârâŋhec jaŋe ine ŋic âgofâc‐jeŋic dâŋko bafic‐jopaniŋte ejareekac.

¹¹Gie fâro faio sawa bahuc moneŋ mafa bâfuaeŋgopeneŋ i biac mocwâc omaeekac, â gie sâko aijakic jaha bahuc bâfuanaŋmuo ine ʒuhuckerâ fua‐nâreocmu.

¹²Mamanac juju‐nâŋeczi fârimâc eme maŋnâŋec wahaocmu, â wiac mocte enâreha fârine fuame mamanac‐nâŋeczi soka ŋedâmârec eocmu.

¹³Ŋic moc e Anuture dâŋ fâri hândâŋne qâsuaocmuzi okacne roocmu, â moc e Anuture sâcmutâc dâŋ araŋ bacneocmuzi ine sâcne juocmu.

¹⁴Ŋic maŋɋârâŋhec jaŋere mu qaqazuc dâŋ izi jujure opâ ʒâŋe iŋucne, dâŋ izi hâcne hâmocte bitiŋko fenʒipeŋte hecke‐nâreekac.

¹⁵Ŋic mamanahec jaŋere manapene fefene eekac, doc bapa ŋic jaŋe ine hâmoc sanaŋte hatao raeŋgopieŋ.

¹⁶Ŋic maŋɋârâŋheczi gie i me i moc baocte qanaŋ mamanasu gie baocmu, â ŋic mutuc matacnezi ine iŋuc moc mi ehuc mutuc‐ticnere fuŋne bataniŋkeocmu.

¹⁷Biŋe mumu ŋic hehesicnezi wiac hâhâwicne bâfuaekac, â kiŋaŋŋic biaŋnezi ine wamadâŋ bafisiekac.

¹⁸Ŋic moc e giedâŋ biaŋne qikiŋneocmuzi ŋic hapetac â wawahane eocmu, â moc e mu bâtiŋ dâŋ mana rereŋ eme ine ere manapene fefene eocmu.

¹⁹Wiac irec me irec aŋac‐nâpome fârine bâfuarâ bubiaŋ manaeŋgopeneŋ, ŋic mutucne jaŋe ine wiac hehesicne râpeckeniŋte takic‐jopaekac.

²⁰Ŋic moc e ŋic maŋɋârâŋhec qâtec‐joparâ juhuc maŋɋârâŋhec jaha eocmu, â ŋic mutuc matacne âgo ejarehuc ine sipirickeocmu.

²¹Sâqocne bapa jaŋe okacne rorozi kikeo kikeo ejareekac, â ŋic tiŋne jaŋe ine katucne jujuhâmo roeŋgopieŋ.

²²Ŋic biaŋnere moneŋ mafa izi naru motec ŋosafâc‐ticne jaŋere biŋe eocmu, â sâqocne bapa jaŋere moneŋ mafazi ine ŋic tiŋne jaŋere biŋe eocmu.

²³Ŋic hapetac jaŋere nânâ wiac i mâreŋ furunao bocjaha fuazac, mâc ŋic hehesicne jaŋe mâreŋ irec aka hejarembiŋ.

²⁴Go ŋokâge qaisockehuc qa bâtiŋ mi ecnecmu, maŋzi jauŋkehuc ine qa bâtiŋ sâcne ecnecmu.