Muqâqiŋ Dâŋ 12:5-28

⁵Ŋic tiŋne jaŋe dâŋ biaŋne maŋkerâ jueŋgopieŋ, ŋic sindaŋne jaŋe ine eeatuc dâŋ sawa nâzâeŋgopieŋ.

⁶Ŋic sindaŋne jaŋere dâŋ izi ʒika iŋucne ŋic bâʒâic‐jopaekac, â ŋic tiŋne jaŋere dâŋzi ine ŋic ʒâic busâqoc faio juhapie bafic‐jopaekac.

⁷Ŋic sindaŋne jaŋe waha jopame omaeniŋmu, â ŋic tiŋne jaŋe ine mimiŋzi ɋâric jufehuc juniŋmu.

⁸Ŋoŋe mamanahec jupie ŋic jaŋe mumbiaŋ‐ŋopaniŋmu, â mutuc matacne juhapie ine mana wahac‐ŋopaniŋmu.

⁹Ŋic moc e maŋhuhuŋ juhuc nânâre hâmozacte gie bame biaŋkeocmu, â ŋic moc e ine ʒâŋe biŋe‐ticne sawa feocte manasuhuc ojoŋ juocmuzi nânâre hâmoocmu.

¹⁰Ŋic biaŋne jaŋe qowifâc‐jeŋic aijakic jaha hone maiŋ ejareniŋmu, â ŋic sindaŋne jaŋe ine hone qâoma ejareniŋmu.

¹¹Ŋic moc e ʒoɋachec jaha hesarac gie baocmuzi nânâ sâcne bâfuaocmu, â ŋic moc e mutuc erâ qâoma juocmuzi ine roroc qaŋqaŋne juocmu.

¹²Ŋic sindaŋne jaŋe wiac hehesicne sawa eniŋte maŋkeeŋgopieŋ, â ŋic tiŋne jaŋe ine sanaŋkerâ domaniŋte manasueŋgopieŋ.

¹³Ŋic sindaŋne e jahacne dâŋzi bitiŋ ecneha raʒime kiocmu, â ŋic siocmâc eki ine ʒârâ hâriŋko mi feocmu.

¹⁴Ŋic moc e miczi dâŋ muekac irec sâcko wiac roekac, â moc e mezi gie baekac irec sâc jaha wiac roekac.

¹⁵Ŋic mutuc matacne e jahacne maname sâckeekac, â ŋic maŋɋârâŋheczi ine ŋic gâcne jaŋere dâŋ manaekac.

¹⁶Ŋic mutucnezi maŋʒoc‐ticnere fuŋne onʒoŋ jaha bataniŋkeekac, ŋic mamanahec musoriŋkepie ine mamana sâqoc biac mi bâfuaekac.

¹⁷Ŋic sioc tâmiriczi dâŋ fârine sawa muekac, â burecŋiczi ine eeatuc dâŋ muekac.

¹⁸Ŋic maŋʒochec ere dâŋzi ʒika iŋucne kicnâpoekac, â ŋic maŋɋârâŋhec ere dâŋzi ine âgo bacnâpoekac.

¹⁹Jâmbomac dâŋzi forahuc juocmu sanaŋ, â burecdâŋzi ine biac omaeocmu.

²⁰Wiac hehesicne mana biric eeŋgopieŋ jaŋere maŋko eeatuc foekac, â wiac biaŋne mana biric eeŋgopieŋ jaŋe ine bubiaŋ bâfuaeŋgopieŋ.

²¹Ŋic tiŋne jaŋe wiac hâhâwicne mi fua‐jareekac, â ŋic sindaŋne jaŋe ine ʒârâ ʒâpâ faio boc feeŋgopieŋ.

²²Wofuŋ e burecŋic jaŋere maname mamakâcne eekac, â ŋic sioc tâmiric jaŋere ine maname biaŋkeekac.

²³Ŋic maŋɋârâŋhec jaŋe mamana‐jeŋic boc mi mutaniŋkeeŋgopieŋ, â ŋic mutucne jaŋe ine mutuc‐jeŋicte fuŋne musokaeŋgopieŋ.

²⁴Ŋic moc e gie ʒoɋachec baocmuzi ʒâŋe biŋehec erâ guriŋ bapa ŋic juocmu, â moc e ine ojoŋ juocmuzi kiŋaŋ gie sawa bahuc juocmu.

²⁵Mana mezac ee izi ŋic maŋnâŋec bawahaekac, â âgodâŋzi ine bubiaŋ bâfua‐nâreekac.

²⁶Ŋic tiŋne jaŋe sâqocne wisecneeŋgopieŋ, â ŋic sindaŋne jaŋe ine hata hehesicnao rahuc qâsorieeŋgopieŋ.

²⁷Ŋic ojoŋnezi wiac irec me irec ecneme sâcne mi bâfuaocmu, â ŋic moczi gie ʒoɋachec baocmu e ine wiac fofo dunduŋ fuarâ focneocmu.

²⁸Ŋic moc e siocmâc juocmuzi jujure hatao raocmu, â moc e ine sindaŋ hârindaŋ eocmuzi hâmocte hatao raocmu.