Muqâqiŋ Dâŋ 11:1-21

¹Ŋemâc bâbâfuare sâc sâcti qâtiri bajueŋgopieŋ ŋic i jaŋe Wofuŋzi qaisoc‐jopaekac, â ŋemâc bâbâfuare sâc sâckoa bajueŋgopieŋ jaŋere ine maname sâckeekac.

²Ŋic sahac fefe jueŋgopieŋ jaŋe mimi qaqa ejarehuc bawahac‐jopaekac, â ŋic maŋhuhuŋ jueŋgopieŋ jaŋe ine maŋɋârâŋ bâfua‐jareekac.

³Ŋic biaŋne jaŋe siocmâc juju‐jeŋiczi jowa qataŋ ejareekac, ŋic otec keŋgoŋne jaŋe ine eeatuc‐jeŋiczi bâsirowec‐jopaekac.

⁴Moneŋ mafazi dameŋ sâkoo sâcne mi ŋezic‐nâpoocmu, siocmâc juju‐nâŋeczi ine hâmockonec batarac‐nâpoocmu.

⁵Nâŋâc siocmâc junaŋmuo ine juju‐nâŋec fâretiŋ jaha foocmu, ŋic sindaŋne jaŋe ine jaŋacne jujuzi bawahac‐jopaocmu.

⁶Ŋic siocmâc jaŋe tiŋne juju‐jeŋiczi ŋezic‐jopaekac, â doc bapa ŋic jaŋe ine eeatuc‐jeŋiczi bitiŋ ejareha ira raʒipie kicjopaekac.

⁷Ŋic sindaŋne jaŋe hâmohapie woworic‐jeŋiczi wâc omaeocmu, moneŋ mafao roweckehuc juju izi fâri tâmiric eocmu hâcne.

⁸Ŋic tiŋne jaŋe ʒârâ hâriŋkonec batarac‐jopazo, ehuc jaŋere okacne ŋic sindaŋne ʒârâ hâriŋko râec‐jopazo.

⁹Ŋic hehesicne jaŋere dâŋzi ŋic âgofâc‐jeŋic sipiric‐jopaekac, â ŋic tiŋne jaŋere maŋɋârâŋ dâŋzi ine bafic‐jopaekac.

¹⁰Ŋic tiŋne jaŋe hae maŋnao juhâc qâhâmohapie ʒeri bubiaŋ fuarâ foekac, ehame ŋic sindaŋne jaŋe hâmopie ʒeri ehuc kiwac qawac eeŋgopieŋ.

¹¹Hae moc irec maŋnao ŋic jaŋe tiŋne juhapie hae irec ʒâŋe biŋe faharehuc foekac, ŋic sindaŋne jaŋere dâŋzi ine hae bâsâqoreekac.

¹²Ŋic maŋ mamanasu tâmiriczi ŋic âgo‐ticne manacneme wawahane eha râpedâŋ ecneekac, â ŋic mamana taraheczi ine dâŋemâc juekac.

¹³Gupe baekac ŋic e dâŋ moc âzâcnehuc mic muac ecneeŋgopeneŋ i kosa mutaniŋkeekac, â ŋic aki metânezi ine maŋticnao râeme foekac.

¹⁴Ŋicguru moc jaŋe guriŋ bapa tâmiric juniŋmuo ine siŋsaŋ qahuc sipiricke‐fâreniŋmu, mumutâc ŋic bocjaha jujarepie ine sâcne juniŋmu.

¹⁵Ŋic furune jaŋe tofa‐jeŋic bazunaŋte numu‐nârepie bafic‐jopahuc busâqoc bâfuanʒipeŋte biac mi mupaŋkenʒepeneŋ, irec moc e wiac iŋucnere mumupaŋ dâŋ mi muocmuzi sâcne juocmu.

¹⁶Ŋokac biaŋnere manapene fefene eekac, â ŋokac iriŋ biriŋnere ine manapene wawahane eekac. Ŋic otec ɋeticnezi moneŋ mafa moc mi bâfuaocmu, ŋic ʒoɋacheczi ine mafa mâririhec eocmu.

¹⁷Ŋic maŋjauŋheczi ŋic gâcne bafic‐jopahuc e jahacne sahac bafickeocmu, â moc e ine ŋic âgofâcne bâʒâic‐jopahuc e jahacne sahac bâʒâickeocmu.

¹⁸Ŋic sindaŋne jaŋe wiac fârine moc mi hureeŋgopieŋ, â wiac tiŋne ebac eeŋgopieŋ jaŋe ine irec fârine biaŋne jaha bâfuaeŋgopieŋ.

¹⁹Ŋic moc e wiac tiŋne jaha ebac eocte sanaŋkeocmu e juhâmoocmu, â moc e sâqocne bâfuaocte ʒoɋac eocmu eki ine hâmo‐jâmbâŋkeocmu.

²⁰Wofuŋ e ŋic maŋʒoc‐jeŋichec jaŋe qaisoc‐jopaekac, â maŋ ɋaɋacne jueŋgopieŋ jaŋere ine maname biaŋkeekac.

²¹Go ʒiŋuc manapaŋkec: Ŋic hehesicne jaŋe okacne fua‐jareocmu, ŋic tiŋne â ɋâricfâc‐jeŋic jaŋe ine juhâc qâhâmoniŋmu.