Muqâqiŋ Dâŋ 10:4-19

⁴Ŋic ojoŋnezi hapetac erâ juocmu, gie ʒoɋachec baocmuzi ine moneŋ mafahec eocmu.

⁵Ŋic mamanaheczi qa roro dameŋ maickeme nânâ wiac qa roro eocmu, â moc e qa roro dameŋko guŋ foocmuzi ine wiac miminehec bâfuaocmu.

⁶Ŋic biaŋnere faio wiac biaŋne jaha feocmu, â ŋic sindaŋne e maŋticnao ʒârâ foekac i dâŋticnezi tapa baekac.

⁷Ŋic biaŋne jaŋe ehâmo‐nârehuc jumbiŋte manasuc‐jopaeŋgopeneŋ, â ŋic sindaŋne jaŋere ine biac nikec‐nâpoekac.

⁸Ŋic mamanahec jaŋe mumutâc dâŋ mana maŋ eeŋgopieŋ, dâŋ racne mueŋgopieŋ jaŋe ine sipirickeniŋmu.

⁹Ŋic sioc tâmiriczi wama faio juhâc qâhâmoocmu, ŋic siochec ere fuŋne ine biac bataniŋkeniŋmu.

¹⁰Ŋic moc e bahac hesoŋkehuc ʒârâ hâriŋ bâfuaocmu, â moc e wiac mocte maname sâqoreme mufuahuc wamare gie baocmu.

¹¹Ŋic biaŋnere dâŋzi jujure opâ ʒâŋe tinac eekac, â ŋic sindaŋne e maŋticnao ʒârâ foekac i dâŋticnezi tapa baekac.

¹²Qaqaisoc eeŋgopieŋ ŋic i jaŋe ʒika bâfuaeŋgopieŋ, â ŋic maŋjauŋhec jaŋe ine ŋic âgofâc‐jeŋic jaŋere bahac hone qâoma eeŋgopieŋ.

¹³Ŋic mamanahec jaŋe dâŋ fârine jaha mueŋgopieŋ, ŋic mutuc matacne jaŋe ine bâtiŋ‐jopazo.

¹⁴Ŋic maŋɋârâŋhec jaŋe mamana sâko fua‐jareocte ʒoɋac sâko eeŋgopieŋ, ŋic mutuc matacne jaŋe ine dâŋ mupie sisipiric fuaekac.

¹⁵Ŋic mafa sâkohec e moneŋ mafa‐ticnezi bafickeekac, â ŋic qarâ suriŋne jaŋe ine hapetac juku sipirickeeŋgopieŋ.

¹⁶Ŋic biaŋne e juju‐ticnere fârine jujuhâmo bâfuaekac, â ŋic hehesicne ine juju‐ticnere fârine sisipiric bâfuaekac.

¹⁷Ŋic moc e mu bâtiŋ ecnepie mana maŋ erâ sâcne juocmu, â ŋic moc mu bâtiŋ ecnepie qikiŋnerâ hata qâsorieocmu.

¹⁸Ŋic moc e burecdâŋ muocmuzi ŋic âgofâc‐ticne qaisoc‐jopaocmu, â moc e gupe micko âkec eocmuzi ine ŋic mutuc matacne erâ juocmu.

¹⁹Sâqocne bâfuazo eeŋgopieŋ ŋic i jaŋe dâŋ bocjaha woseeŋgopieŋ, â ŋic maŋɋârâŋhec jaŋe ine dâŋ afecne sawa mueŋgopieŋ.