Mumutara Ŋic 7:8-19

⁸Eme jaŋeraonec kuʒi â qeŋ i rombiŋ. Rohapie Gideoŋzi Israe ŋic gâcne sâko jaŋe hae‐jeŋic sâc sorec‐jopame rahapie ŋic 300 jaŋe ine sakarec‐jopawec. Eme Midiaŋ ŋic jaŋere teuŋzi juwicnao wâneŋko fowec.

⁹Ŋafe ira Wofuŋzi Gideoŋ âzâcnerâ muwec: “Faharerâ teuŋ‐jeŋicko huc. No teuŋ i gore meo râekopac.

¹⁰Eme teuŋko buc huzore hâwicgukacko ine kiŋaŋŋicge Purahec huzepirec.

¹¹Ehuc jaŋe weniŋuc muniŋmu i manazemec. Eme irec faicnao ine tâpirige fuame teuŋ râsi fisicnecmu.” Eme Gideoŋ e kiŋaŋŋic‐ticne Purahec râsi fombiŋ teuŋ irec qaŋeŋnao hupic.

¹²Ehame Midiaŋ ŋic, Amaleke ŋic â ʒoaŋ wewefunaonec ŋic gâcne jaŋe wâneŋko waŋgambec qokic iŋucne guru dindiŋ jâmbâŋ fombiŋ. Erâ kamelefâc‐jeŋic hâmbâŋ sâko jâmbâŋ wowosene tâmiric hâwec moŋgeŋ iŋucne fombiŋ wâc.

¹³Eme Gideoŋ e fisirâ manahame ŋic moczi guŋ manawec i momori âgofâcne jazawec. Ehuc muwec: “Manaŋgopieŋ, no guŋ moc manapac ine gai huŋ hândâŋ bakicnezi heherâ waha Midiaŋ teuŋ‐nâŋecko raʒirâ qoruc boze wiac hetâtie rajec.”

¹⁴Eme momori âgofâcne jaŋe fuŋne bâtikiecnehuc mumbiŋ: “I wiac moc aricne, i Israe ŋic moc ʒâŋene Gideoŋ, Joasi ŋokâ‐ticne ere ʒika. Anutuzi Midiaŋ â momori sasawa ere meo hâcne râec‐nâpojec.”

¹⁵Eme Gideoŋ e guŋ â irec fuŋne mukicne i manarâ daŋge mumuteŋ ewec. Ehuc Israe ŋic jaŋere teuŋko risierâ muwec: “Fahareniŋ, Wofuŋ e Midiaŋ momori guru meŋeŋicko râec‐jopakac.”

¹⁶Eme ŋic 300 jaŋe bâfâuc‐jopame guru jahec â moc embiŋ. Ehuc kuʒi tacne irec maŋnao waha râerâ qeŋhec mâmâc mejeŋic sâc râewec.

¹⁷Ehuc ʒiŋuc jazawec: “Norao fipie wareoc, erâ epe irec sâc jaha enʒepieŋ. Teuŋ qaŋeŋnao fisirâ epemu irec sâc enʒepieŋ hâcne.

¹⁸No â gurufâc‐nane nâŋe qeŋ qapene teuŋ ŋifec â ŋifec iŋuc jaha qeŋ qafârerâ ʒiŋuc muhuc owackenʒepieŋ: ‘Wofuŋ â Gideoŋ jahere biŋe.’”

¹⁹Eme râsi jaŋe ŋafe ʒâʒâŋiŋte soŋaŋ guru moc âkendâŋ‐jopahapie Gideoŋ â ŋic 300 jaŋe teuŋ qaŋeŋnao fisimbiŋ. Erâ qeŋ qahuc kuʒi bajumbiŋ i qanʒaŋnembiŋ.