Mumutara Ŋic 18:11-24

¹¹Iŋuc mupie Daŋte mâreŋko Zora â Esitaoli hae ŋepic irecnec ŋic 600 ʒika qaniŋte ʒawierâ fahare rambiŋ.

¹²Raku Juda mâreŋko Kiriati‐Jearim haeo teuŋ âterâ fombiŋ. Iŋuc embiŋte Kiriati‐Jearim hae heririŋ ʒoaŋ huhunaopec mâreŋ ŋondeŋ fokac irec ʒâŋe i Daŋte teuŋ iŋuc mumbiŋ, erâ wâc ʒiŋuczia muhuc juŋgopieŋ jaha.

¹³Eme irecnec raku Eferaim tiki mâreŋko Mikare haeo fisimbiŋ.

¹⁴Ehuc ŋic 5 Laisi mâreŋ hone tâcneniŋte rambiŋ jaŋe âgofâc‐jeŋic ʒiŋuc jazambiŋ: “Fic ʒi ŋeraŋgopieŋ jaŋere ŋondeŋko fic mocte maŋnao qoqonaŋ ŋaqi erâ jâc â siliwazi ɋâŋ hekicne ŋekac i moc manaŋgopieŋ me? I weniŋuc enaŋmu irec moc mana wosâc eniŋ.”

¹⁵Eme jaŋe bâŋorierâ Mikare haeo raʒirâ Lewire guruonec ŋic ere ficko fisirâ ʒoaŋ biaŋ mucnembiŋ.

¹⁶Eme Daŋte ɋâricfâc ŋic 600 jaŋe ʒikare wiac‐jeŋichec ficmotâckopec hae ʒoŋao domambiŋ.

¹⁷Taha bapa e ficmotâcko momori ŋic 600 jaŋehec domaha ŋic 5 mâreŋ hone tâcneniŋte rambiŋ jaŋe ficmaŋko raʒirâ jâczi ɋâŋ hekicne â qoqonaŋ ŋaqi, erâ metâ wiac â siliwazi ɋâŋ bakicne i rombiŋ.

¹⁸Ŋic i jaŋe Mikare ficko raʒirâ jâczi ɋâŋ hekicne qoqonaŋ ŋaqi â metâ wiac â siliwazi ɋâŋ bakicne i ropie taha bapazi wio‐jarerâ muwec: “Ŋoŋe wemo eŋgopieŋ?”

¹⁹Eme jaŋe âzâcnerâ mumbiŋ: “Go dâŋ beherâ ware bâjâpec‐nâpoc, ehuc mamac enârerâ taha bapa‐nâŋec juzemec. Go ŋic mocjahare ficko taha bapa jucmu izi sâckeocmu, me Israe guruo garikiŋ moc jaŋerao jutec sâckeocmu me?”

²⁰Iŋuc mupie taha bapa e bune biaŋkewec. Bune biaŋkeme qoqonaŋ ŋaqi â metâ wiac erâ jâczi ɋâŋ hekicne i rorâ ŋondeŋ‐jeŋicko hume rambiŋ.

²¹Eme jaŋe faharehuc ŋokac naru motec â bulimakao erâ mafa wiac‐jeŋichec ejarepie bâniembiŋ.

²²Eme jaŋe Mikare haeonec rapie mi ʒoraha Mika e ŋicfâc‐ticne hetumaŋ‐jopame Daŋte ɋâricfâc jâpec‐joparâ rambiŋ.

²³Raku bâfuac‐joparâ owacke‐jarepie jaŋe forisierâ Mika ʒiŋuc muhuc wiocnembiŋ: “Go fuŋne wemocte ŋic guru sâko keci rocjopatec wareŋgopieŋ?”

²⁴Eme Mikazi ʒiŋuc bâtikie‐jarewec. “Ŋoŋe ɋâŋnane rohuc taha bapa‐nane mâmâc jowa wisepie hapetac ekopac hâcne. Ehuc wemocte ʒiŋuc wio‐nareŋgopieŋ: ‘Go wemocte warekomec?’”