1Eme Simsoŋ e Gaza haeo rarâ sasec ŋokac moc honerâ ere ficko fewec.
2Eme Gaza hae rune jaŋe ʒiŋuc manambiŋ: Simsoŋ e ʒira warejec. Iŋuc manarâ ŋic jaŋe ŋafe ʒora fic â haere motâcko Simsoŋte ruc bahuc fombiŋ. Jaŋe ʒiŋuc muhuc ŋafeo niniŋkerâ fombiŋ: “Tomâcko hae fure taniŋkeha wahame qanʒepeneŋ.”
3Eme Simsoŋ e fohame ŋafe ʒâŋiŋkewec. Ehame ŋafe ʒâŋiŋko faharerâ haesac motâc â wâtuŋ jajahec, erâ babasanaŋ â wiac‐ticne sasawa i rohuc unuckerâ bâfeŋne ɋawe‐ticnao herâ hâpo fe Heboroŋ haeopec tiki ŋekac irec botâŋnao râewec.
4Eme irec faicnao Soreka wâneŋko ŋokac moc juwec ʒâŋene Delila erao maŋne boc domawec.
5Filisa ŋic fekicne jaŋe iŋuc honerâ ŋokactao fisirâ ʒiŋuc âzâcnembiŋ: “Mu âkeriŋ ecnehuc tâpiri sâko‐ticnere fuŋne i wena fokac â nâŋe weniŋucko e bawaharâ muczi mene qahuc bârârienaŋmu i honezemec. Eme nâŋe rusâc siliwa moneŋ 1100 garenaŋmu.”
6Iŋuc mupie Delilazi Simsoŋ âzâcnerâ muwec: “Go weniŋucko ro niŋgiŋ egarehuc bawahacguzo â tâpiri sâkoge wena fokac i nazanʒaŋ?”
7E iŋuc wiocneme Simsoŋzi ʒiŋuc âzâcnewec: “Repa ɋâricne 7 mi kereŋkekicne izi menane qaniŋmuo ine betaŋkerâ ŋic gâcne jaŋere sâc epemu.”
8Eme Filisa ŋic fekicne jaŋe repa ɋâricne 7 mi kereŋkekicne i bafisirâ ŋokac râcnembiŋ. Eme ŋokac e repa izi Simsoŋ mene qawec.
9Ehame ŋic gâcne jaŋe ficmaŋ ʒâʒâŋiŋ mocko soŋkerâ fombiŋ. Fohapie ŋonâŋ‐ticnezi Simsoŋ âzâcnerâ muwec: “Simsoŋ, Filisa ŋic jaŋe rocguzo wareŋgopieŋ.” Eme Simsoŋte meonec repa i bifuŋzi tâcneekac irec sâc tâcnewec. Eme tâpiri soŋticnere fuŋne i sifu mi bâfuambiŋ.
10Iŋuc eme Delilazi Simsoŋ ʒiŋuc âzâcnewec: “Manakic, go ʒoraŋ enarehuc eatucnumeŋ. Go weniŋucko ro niŋgiŋ egarezo i miŋecgac naza‐jâmbâŋkec.”
11E iŋuc mume Simsoŋzi ʒiŋuc âzâcnewec: “Repa ɋâricne jâmbâŋzi ro niŋgiŋ enareniŋmuo ine betaŋkerâ ŋic gâcne jaŋere sâc epemu.”
12Eme Delila e repa ɋâricne rorâ izi meticne qarâ muwec: “Simsoŋ, Filisa ŋic jaŋe rocguzo wareŋgopieŋ.” Ŋic jaŋe ficmaŋne mocko soŋkerâ fombiŋ. Ehame Simsoŋ e repa i bameŋ qâruru tinac bâtâcnewec.
13E iŋuc eme Delilazi âzâcnerâ muwec: “Ʒoraŋ â eeatuc sasawa enare warekutec miŋecgac ʒoaŋ ʒi fisikac. Go weniŋucko ro niŋgiŋ egarezo i mufua‐narec.” Iŋuc âzâcneme Simsoŋzi bâtikiecnehuc muwec: “Go qizec susuc‐nane qizecne 7 i repahec qâfiserâ kikindeŋko basanaŋketec ŋic gâcne jaŋere sâc jaha epemu.”
14Iŋuc âzâcneme Delilazi ŋowe‐ticnere qizec qickeme guŋ fowec, fohame qizec susuc‐ticne qizecne 7 i repahec qâfiserâ kikindeŋko râehuc Simsoŋ âzâcnerâ muwec: “Simsoŋ, Filisa ŋic jaŋe rocguzo wareŋgopieŋ.” Iŋuc mume Simsoŋzi guŋkonec mana ɋâɋârehuc fu herâ fahareme qizec‐ticne kikindeŋhec qâunuckewec.
15Iŋuc eme ŋonâŋ‐ticnezi âzâcnerâ muwec: “Go maŋgezi norao mi fohame, ‘Maŋzi ʒâficgukopac,’ iŋuc mutec sâckeocmu me? Go arec jahec â moc ʒoraŋ enarehuc tâpiri sâkoge wena fokac i moc mi nazameŋ.”
16Ŋonâŋ‐ticnezi ʒoaŋne ʒoaŋne ʒoɋac boc ecnekume maŋne betaŋke‐jâmbâŋ‐kewec.
17Eme maŋticnere fuŋne mufuacne‐fârerâ ʒiŋuc âzâcnewec: “Qizec‐nane moc mi bâtâcnekicne. No neŋgoc‐nanere bumaŋkonecteaŋ Anuture biŋe qacnukicne. Irec qizec‐nane roniŋmuo ine tâpiri‐nane omaeme betaŋkerâ ŋic gâcne jaŋere sâc jaha epemu.”
18Eme Delila e ŋowe‐ticnezi maŋticnere fuŋne mufuacne‐fârewec iŋuc honerâ dâŋ ʒiŋuc râehuc Filisa ŋic fekicne hefârec‐jopawec: “Ŋoŋe miŋecgac biac wareniŋ, e maŋticnere fuŋne naza‐fârekac.” Iŋuc mume Filisa ŋic fekicne jaŋe moneŋ rorâ ŋokactao fisimbiŋ.
19Eme e Simsoŋ qickeme guŋ foha ŋic moc hefârerâ ecneme qizec susuc‐ticne qizecne 7 i bâtâcnecne‐fârewec. Eme dameŋ ira fuŋkerâ tâpiri‐ticne jâoc rome betaŋkewec.
20E iŋuc ecnerâ wiwickehuc muwec: “Simsoŋ, Filisa ŋic rocguniŋte wareŋgopieŋ.” Iŋuc mume Simsoŋ e guŋkonec ɋârerâ ʒiŋuc manasuwec: “No dameŋ gâcnao eekopac sâc iŋuc ehuc hetâtiec‐jopapemu.” E dameŋ ira Wofuŋzi behewec i moc mi mana tarawec.
21Eme Filisa ŋic jaŋe basanaŋkerâ ʒâŋe hândâŋ jahecne riporâ Gaza haeo bahumbiŋ. Bahurâ kâpâcwâru jajahec aeŋ bâbâroŋzi bakicne izi basanaŋkembiŋ. Iŋuc ecnepie Simsoŋ e kâpâcwâru fickoa jacgoŋ hândâŋne banʒaŋnehuc juwec.
22E ira juhame qizec susuc‐ticne bâtâcnembiŋ i mocwâc wefurâ ʒorawec.
23Eme Filisa ŋic fekicne jaŋe ʒeri ehuc nemu‐jeŋic Dagoŋ e taha bâzi rikecneniŋte tumaŋnembiŋ. Jaŋe ʒiŋuc hâcne mumbiŋ: “Nemu‐nâŋec e râsi‐nâŋec Simsoŋ nâŋâcne meo râewec.”
24Eme ŋic ŋokac jaŋe Simsoŋ honerâ nemu‐jeŋic mu ʒeri ecnehuc ʒiŋuc hâcne mumbiŋ: “Râsi‐nâŋec Simsoŋ e mâreŋ‐nâŋec sipirickehuc ŋic bocjaha nâpowecte nemu‐nâŋeczi menâŋecko râewec.”
25Iŋuc muhuc maŋjeŋic fie ruruckehame ʒiŋuc mumbiŋ: “Simsoŋ hefârepie warerâ mamasiri wiac eme honenʒepeneŋ.” Iŋuc murâ Simsoŋ kâpâcwaru fickonec hefârepie mai‐jeŋicko domahuc mamasiri ewec. Eme jaŋe wâtuŋ neŋgocne jajahec jahere ŋoŋondeŋko ecnepie domawec.
26Eme Simsoŋzi motec meticnao bame domawec e âzâcnerâ muwec: “Wâtuŋ neŋgocne fic ʒi derâ domakopirec i bâuarâ manahuc sâcne roweckezapo?”
27Fic i ŋic ŋokac jaŋe fuse sâqorembiŋ. Filisa ŋic fekicne sasawa jaŋe wâc ijaha ŋembiŋ. Erâ fic bupuo ŋic ŋokac 3 tauseŋ jaŋe Simsoŋzi mamasiri ehame honehuc ŋembiŋ.
28Ehame Simsoŋzi Wofuŋ wâsickehuc muwec: “O Wofuŋ Anutu, go manasu‐narehuc basanaŋnucmurâ numu‐garekopac. O Anutu, arec mocjaha ʒi sawa baficnutec ʒâŋe hândâŋ jahec‐nanere Filisa ŋic okacne bazu‐jarepemurâ numu‐garekopac.”
29Simsoŋ e iŋuc murâ wâtuŋ neŋgocne jajahec ʒâʒâŋiŋko fic derâ domapic i mefârezi moc â qanazi moc iŋuc ro basanaŋ‐jofawec.
Mumutara Ŋic 16
Mumutara Ŋic 16:1-29