MUKÉTÍMÙ 20:2-22

²Bɛ̀ í mpɛ̀tɛ́ mɛniɛ nkɛ bo yɑ̃̀ kɛ́tíí nkɛ́nkpɑnnɛ̀ Mɔyiisi nɛ̀ Anɔɔ kɛ tú:

³Kɛ̀ ti Yiɛ̀ nKuyie ndo nti wɛ̃nnɛ́nɛ̀ ti kɔbɛ bɛ̀ɛ̀ ku kɛ́potɛ́, kɛ̀ ti kú dɛ̀ í ntɔ̃ũɑ̀?

⁴Dɛ̀ yĩ́mɛ kɛ̀ di tɔní tínti ti Yiɛ̀ nKuyie nkɔbɛ kɛ kɔ̀tɛnní dikpɑ́ɑ̀ diì mmiɛkɛ kɛ̀ ti bo kú tínti nɛ̀ ti wũɔ̃?

⁵Bɑ nte kɛ̀ di ti dènnɛní Esibiti kɛ ti tɔní dibòrì yɛiri dii? Dɛ̀ í dò mbuɔtí dɛ̀mɑrɛ̀, dɛtie mbɛ̀ tu dɛ̀ fìkíè dɛ̀ í bo kɛ̀ ti nɛ́ bɑ́ɑ́ buɔ́nɛ̀ fínyĩ̀ nɛ̀ kèdènɑ́tì kpɛrɛ, mɛniɛ nketɛ́ kɛ í bo kɛ dò nyɑ̃̀.

⁶Mɛm̀mɛ Mɔyiisi nɛ̀ Anɔɔ bɛ̀ ìtɛ́mɛ̀ Isidɑyɛɛribɛ borɛ̀ kɛ́kɔtɛ mɛtɑummɛ̀ tou borìnùù kɛ́do kɛ́sĩ́nnɔ́ɔ kɛtenkɛ̀ kɛ̀ ti Yiɛ̀ nKuyie mbɛ̀ bɛnkɛ ku kpetì,

⁷kɛ́bɛ́innɛ̀ Mɔyiisi kɛ dɔ̀:

⁸Túótɛ́ ɑ pɑ̀ɑ̀ti fɔ̃́ nnɛ̀ ɑ kóo kótì Anɔɔ kɛ̀ di tíí nyIsidɑyɛɛribɛ, kɛ̀ bɛ̀ mbo kɛ wúó nkɑ̀ɑ bɛ́innɛ̀ diperì kɛ̀ mɛniɛ nyɛ̀nní, kɑ̀ɑ duɔ́ nkɛ̀ bɛ̀ɛ yɑ̃̀ bɛmbɛ nɛ̀ bɛ wũɔ̃.

⁹Kɛ̀ Mɔyiisii túótɛ́ o pɑ̀ɑ̀ti mɛtɑummɛ̀ tou miɛkɛ kɛ́ndònnɛ̀ ti Yiɛ̀ nKuyie ndo tì nhò nɑ̀kɛ́mɛ̀.

¹⁰Wenwe nɛ̀ Anɔɔ kɛ̀ bɛ̀ɛ tíí nyIsidɑyɛɛribɛ dipèrì borɛ̀, kòo bɛ̀ nɑ̀kɛ́ kɛ dɔ̀: Kéntɛ́nɛ̀ díndi itookperí yɛmbɛ̀! Ti bo dennɛní mɛniɛ ndipèrì dii mmiɛkɛ nkɛ kɛ̀ di yɑ̃̀ɑ̃̀?

¹¹Mɛm̀mɛ ò yòùtɛmɛ̀ o pɑ̀ɑ̀ti kɛ́potɛ́ dipèrì mɛ̀dɛ́mɛ̀, kɛ̀ mɛniɛ nyɛ̀nní mɛdiɛ̀. Isidɑyɛɛribɛ nɛ̀ bɛ wũɔ̃ kɛ̀ dɛ̀ɛ yɑ̃̀.

¹²Kɛ̀ ti Yiɛ̀ nKuyie nnɑ́kɛ́ Mɔyiisi nɛ̀ Anɔɔ kɛ dɔ̀: Di yɛ̀mmɛ̀ í mɛ nyiemmɛ̀ kɛ dò ndɛ̀ bo dɔɔ̀, di í mɛ ndɛ́úkùnnɛmɛ̀ n yètìrì Isidɑyɛɛribɛ ììkɛ̀, dì tɛ̃́nkɛ í yóó tɑnnɛ́ n nìtìbɛ̀ kɛtenkɛ̀ m bɛ̀ duɔ́ nkɛ̀.

¹³Dɛɛ̀ do te kɛ̀ bɛ̀ɛ yú dɛ kó mɛniɛ nkɛ dɔ̀ Mɛdibɑ, dɛ̀ɛ̀ tu dikpɑ̀nnì, kɛ yɛ̃́ Isidɑyɛɛribɛ do dɛ̀ nwɛ̃̀ńtɛ́mɛ̀ ti Yiɛ̀ nKuyie nkɛ̀ kùu bɛ̀ bɛnkɛ kù dòmmɛ̀ pɑ́í pɑ́í.

¹⁴Kɛ̀ bɛ̀ mbo Kɑdɛɛsi kɛ̀ Mɔyiisii dɛitɛ bɛnìtìbɛ̀ kɛ́ bɛ̀ tɔ̃ nkɛ dɔ̀ bɛɛ̀ kɔtɛ kɛ́nɑ́kɛ́ Edɔmmu kóo kpɑ̀ɑ̀tì kɛ dɔ̀: Tínti ɑ tebìí tíì tu ɑ yɛ̃́mu ti tɑmɛ̀ mɛhɑ́ɑ́rìmɛ̀ miɛkɛ.

¹⁵Ti yɛmbɛ̀ bɛɛ̀ do kɔ̀tɛ Esibiti kɛ̀ ti nkɛ bo kɛ́mɔntɛ kɛ̀ Esibiti kɔbɛ ti fɛ̃́ũ tínti nɛ̀ ti yɛmbɛ̀.

¹⁶Kɛ̀ ti kuɔ́nnɛ̀ ti Yiɛ̀ nKuyie nkɛ̀ kùu keè ti dɑbònnì kɛ́duɔnní ku tɔ̃nnì kɛ̀ dì ti dènnɛní Esibiti. Kɛ̀ ti tùɔ̀kɛní diɛ nKɑdɛɛsi dihɛì dìì bo ɑ tenkɛ̀ mɑ̀nku,

¹⁷kɑ̀ɑ bo yie, nyóu kɛ̀ ti pɛ̃ɛ̃tɛ́ ɑ ɛì miɛkɛ, ti í yɛtì dɛpɑɑ mmiɛkɛ yoo fínyĩ̀ kó dɛtie mmiɛkɛ, ti í yóó yɑ̃̀ ɑ kó sibií kó mɛniɛ, ti yóó kétɛ́ kucɛ diɛkù nku kɛ́pɛ̃ɛ̃tɛ́nɛ̀ ɑ ɛì, ti í yóó dɑutɛ́ kupíkù mɑkù.

¹⁸Kɛ̀ Edɔmmu kóo kpɑ̀ɑ̀tìi bɛ̀ tɛ̃̀ńnɛ́ kɛ dɔ̀: Di í yóó pɛ̃ɛ̃tɛ́ diɛ nh ɛì. Kɛ̀ di mɛ nyetɛ n yóó bɑ́ɑ́tóomu kɛ́ di co kɛ̀ tí dokɛ́.

¹⁹Kɛ̀ Isidɑyɛɛribɛɛ ò tɛ̃̀ńnɛ́ kɛ dɔ̀: Ti yóó kétɛ́ kucɛ diɛkù mɑ́ɑ̀ ndi kɛ ti yɑ̃̀ ɑ ɛì kó mɛniɛ tínti nɛ̀ ti wũɔ̃ ti bo dɑ yietí. Dɛ̀ í tú tìmɑtì, ti yóó nɑ ɑ tenkɛ̀ mɑ́ɑ̀ ndi kɛ́pɛ̃ɛ̃tɛ́.

²⁰Kɛ̀ Edɔmmu kóo kpɑ̀ɑ̀tìi bɛ̀ tɛ̃̀ńnɛ́ kɛ dɔ̀: Di í pɛ̃nkɛ́. Kɛ̀ Edomiibɛɛ bɑ́ɑ́tí nɛ̀ bɛhɑ̃ɑ̃pɔ̀nkperíbɛ̀ pɛ́u kɛ́ bɛ̀ co.

²¹Mɛm̀mɛ Edɔmmu kóo kpɑ̀ɑ̀tì yetɛmɛ̀ Isidɑyɛɛribɛ bo pɛ̃ɛ̃tɛ́mɛ̀ o ɛì, kɛ̀ Isidɑyɛɛribɛ pɛɛ́ nkupíkù tɛkù.

²²Kɛ̀ Isidɑyɛɛribɛɛ ítɛ́ Kɑdɛɛsi kɛ́kɔtɛ ditɑ̃rì bɛ̀ tu dì Ɔdi.