MUKÉTÍMÙ 18:2-23

²A yú ɑ cicɛ nɑɑ̀mùnkù kɔbɛ Defiibɛ kɛ̀ bɛ̀ dɑ wɛ̃nnɛ́nɛ̀ kɛ́ ndɑ teénnɛ̀ mutɔ̃mmú. Fɔ̃́ nnɛ̀ ɑ bí díì níí yóó tɑ mɛtɑummɛ̀ tou kɛ́pĩ́ nyikuɔ́ tɔ̃mmú mɛtɑummɛ̀ tɔu ììkɛ̀.

³Bɛ̀ɛ̀ yó ndɑ teénnɛ̀ mɛtɑummɛ̀ tou dimɔu kó mutɔ̃mmú bɛ̀ nɛ́ bɑ́ɑ́ tɔ́ɔ́nnɛ̀ ikuɔ́ nɛntì mɑtì yoo diwũɔ̃tɔ̀nnì, kɛ̀ dɛ̀ɛ yie nkɛ̀ di bɑ́ɑ́ kú kɛ́ bɛ̀ wɛ̃nnɛ́nɛ̀.

⁴Bɛ̀ɛ̀ yó ndɑ wɛ̃nnɛ́ kɛ dɑ teennɛ̀ mɛtɑummɛ̀ tou kó mutɔ̃mmú mumɔu, wèè í tú Defii botí kou ò bɑ́ɑ́ di wɛ̃nnɛ́nɛ̀ mutɔ̃mmú.

⁵Fɔ̃́ nnɛ̀ ɑ bí díì te mɛtɑummɛ̀ tou nɛ̀ diwũɔ̃tɔ̀nnì dɛ kó mutɔ̃mmú kɛ̀ dɛ̀ɛ yie nkɛ̀ m miɛkɛ bɑ́ɑ́ do Isidɑyɛɛribɛ.

⁶Míì tɑ̃ɑ̃tɛ́ ɑ kɔbɛ Defiibɛ Isidɑyɛɛribɛ cuokɛ̀, bɛ̀ tu n kɔbɛ mbɛ kɛ̀ m bɛ̀ ndɑ duɔ́ nkɛ̀ bɛ̀ bo mpĩ́ mmɛtɑummɛ̀ tou kó mutɔ̃mmú.

⁷Fɔ̃́ nhAnɔɔ nɛ̀ ɑ bí n duɔ́ ndí mbɛ ikuɔ́ kó mutɔ̃mmú diwũɔ̃tɔ̀nnì ĩ́nkɛ̀ nɛ̀ ikuɔ́ nɛntì kó kufɑ̃́ɑ̃́ nkuyɑ̀ɑ̀kù pi kù, n duɔ́ ndí mbɛ dɛ kó mutɔ̃mmú, wèè í tú Defii botí kou kɛ dɛ̀ tɔ̀ɔ́nnɛ̀ ò kumu.

⁸Kɛ̀ ti Yiɛ̀ nKuyie nnɑ́kɛ́ Anɔɔ kɛ dɔ̀: Míì dɑ duɔ́ nkɑ̀ɑ bo ndɑkɛ Isidɑyɛɛribɛ m pɑ̃ɑ̃ nyɛ̀ɛ̀ pɑ̃rɛ̀ kpɛ́í, ɑ níí yóó dɛ ndɛitɛ dɛ̀ɛ̀ tu ɑ kpɛrɛ, n dɑ còú mmɛkùɔ̀ mmɛɛ̀ kpɛ́í nkɛ dɑ cɑ̃̀ńnɛ́ fɔ̃́ nnɛ̀ ɑ bí n tɔ̃mmú kpɛ́í, dɛ kó ikuɔ́ yó mbomu sɑ̃́ɑ̃̀ nɛ̀ ɑ yɑɑ̀bío.

⁹Ntɛ dɛ̀ɛ̀ yó ntú ɑ kpɛrɛ, bɛ̀ m pɑ̃ɑ̃ nyɛ̀ɛ̀ pɑ̃rɛ̀ miɛkɛ, kɛ́mbúútí yɛ̀ɛ̀ yóó tuɔ. Muyuo nkó yɛpɑ̃rɛ̀ nɛ̀ bɛ̀ n fìé ìì wũɔ̃ mɛyɛi ncĩ́ɛ̃́mmɛ̀ kpɛ́í nnɛ̀ mɛyɛi nhũtímù kpɛ́í. Bɛ̀ m pɑ̃ɑ̃ nyɛ̀ɛ̀ pɑ̃rɛ̀ kó dimɑ̀ɑ̀ tu ɑ kpɛyɛ nyɛ fɔ̃́ nnɛ̀ ɑ yɑɑ̀bío.

¹⁰Díì níí dɛ̀ di dɛ̀ tu n kpɛrɛ ndɛ, bɛnitidɑɑbɛ̀ bɛ̀ɛ̀ bo di cɛ̃́ĩ bɛ̀ bo nɑ kɛ́ dɛ̀ di.

¹¹Ntɛ dɛtɛrɛ̀ dɛ̀ɛ̀ níí yó ntú ɑ kpɛrɛ Isidɑyɛɛribɛ dɛ̀ìtɛ dɛ̀ɛ̀ kó dimɑ̀ɑ̀ kɛ m pɑ̃ kɛ dɛ̀ nni nyòutɛ, n dɛ̀ ndɑ duɔ́mmu fɔ̃́ nnɛ̀ ɑ yɑɑ̀bío initidɑɑì nɛ̀ initipòì. Bɛ̀ɛ̀ kó dimɑ̀ɑ̀ bo ɑ cĩ́ɛ̃̀tɛ̀ kɛ wenni bɛ̀ bo nɑ kɛ́ dɛ̀ di.

¹²N di duɔ́mmu tidiketitì kó yɛpɑ̃rɛ̀ sɑ̀ɑ̀yɛ̀ Isidɑyɛɛribɛ m pɑ̃ɑ̃ nyɛ̀: Mɛkùɔ̀ nnɛ̀ mɛnɑɑ̀ nnɛ̀ tidiitì bɛ̀ tu tì bèdéè.

¹³Bɛ ɛì kó tidiketitì bɛ̀ m pɑ̃ɑ̃ ntìì kó dimɑ̀ɑ̀, n ti n di duɔ́mmu bɛ̀ɛ̀ kó dimɑ̀ɑ̀ bo di cɛ̃́ĩ kɛ wenni bɛ̀ bo nɑ kɛ́ dɛ̀ di.

¹⁴Kɛ̀ Isidɑyɛɛribɛ níí m pɑ̃ dɛ̀ kɛ tú bɛ̀ dɛ̀ nni m pɑ̃mu sɑ̃́ɑ̃̀, díì yó ndɛ̀ te.

¹⁵Isidɑyɛɛribɛ bɛ̀ɛ̀ tu Mpo nɛ̀ bɛ wũɔ̃ ketiyì bɛ̀ m pɑ̃ɑ̃ ndɛ̀ tu di kpɛrɛ ndɛ. Bɛ̀ɛ̀ tu Mpo bɛ̀ níí bɛ̀ ndi dontɛ́nɛ̀, kɛ̀ fɛɔ̃̀fɛ̀ ketifɛ̀ mɑfɛ̀ tu bɛ̀ í n feu fɛ̀ bɛ̀ɛ fɛ̀ ndi dontɛ́nɛ̀.

¹⁶Dɛnitidɑbirɛ dɛ̀ɛ̀ mɔ̀kɛ otɑ̃̀nkù omɑ́ɑ̀ dɛ donku dò nkɛ́mbo mɛdítíbii mmɛ̀nùmmù ndi bɛ̀ kèétɛ́mɛ̀ mɛtɑummɛ̀ tou kpɛ́í, mɛ̀ɛ̀ cɛ̃̀ɛ̃́kù bo kɑ̀dɑ́ɑ̀mmù tɛpíítɛ̀.

¹⁷Kɛ̀ fɛnɑ̀ɑ̀fɛ̀ nfɛ yoo fɛpìèfɛ̀ yoo tɛbuɔtɛ̀ dɛ̀ pɛitɛ́ ìì bí idɑɑì mɛketimɛ̀, bɛ̀ ì nni nfeumu, bɛ̀ bɑ́ɑ́ wɛ̃tɛ kɛ́ ì ndi dontɛ́nɛ̀, dí ì nni nféútɛ́ kɛ́cóú mmɛyĩ̀ĩ̀ ndiwũɔ̃tɔ̀nnì, kɛ́tuɔ ndɛ̀ɛ̀ tu mɛkùɔ̀ nkpɛrɛ, dipɑ̃nnì ndi dìì kó kufɔ̃ɔ̃ku n nɑɑti.

¹⁸Imɑɑ ntu di kpɛyi nyi, kɛ́yíɛ́nɛ̀ di n yòùtɛ ì, dicĩ̀ncĩ̀nnì nɛ̀ dikpèrì youri.

¹⁹Isidɑyɛɛribɛ ɔ̃ɔ̃ dɛitɛ yɛ̀ɛ̀ pɑ̃rɛ̀ kɛ́ m pɑ̃, n yɛ̀ ndi duɔ́mmu díndi nɛ̀ di yɑɑ̀bío, initidɑɑì nɛ̀ initipòì, dɛ kó mɛtɑummɛ̀ yó mbomu, n di dɔúnnɛ̀ dìì nùù ndi sɑ̃́ɑ̃̀.

²⁰Kɛ̀ ti Yiɛ̀ nKuyie nyíɛ́ kɛ́nɑ́kɛ́ Anɔɔ kɛ dɔ̀: N duɔ́ nkɛ̀ɛ̀ tenkɛ̀ Isidɑyɛɛribɛ, kɛ miɛkɛ ɑ í yó mmɔkɛ ɑ kɔkɛ, míì yó ntú ɑ kpɛrɛ Isidɑyɛɛribɛ cuokɛ̀.

²¹Díndi Defiibɛ, kɛ̀ Isidɑyɛɛribɛ níí dɛ̀itɛ bɛ̀ mɔ̀kɛ dɛ̀ miɛkɛ dɛpííndɛ̀ kɛ m pɑ̃, n dɛ̀ ndi duɔ́mmu di pĩ́ mmùù tɔ̃mmú kpɛ́í mɛtɑummɛ̀ tou.

²²Isidɑyɛɛribɛ sɔmbɛ bɑ́ ntɔkunɛ̀ mɛtɑummɛ̀ tou bɛ̀ yɑ̀ɑ̀ bo cé mbɛmɑ́ɑ̀ mɛyɛi nkɛ́kú.

²³Díndi Defiibɛ díì mɑ́ɑ̀ yó mpĩ́ mmɛtɑummɛ̀ tou kó mutɔ̃mmú, kòò mɔù yetɛ́nɛ̀ mɛtɑummɛ̀ tou díì te dɛ kó mɛyetímɛ̀, dɛ kó ikuɔ́ yó mbomu sɑ̃́ɑ̃̀. Di í yó mmɔkɛ di kó kɛtenkɛ̀ Isidɑyɛɛribɛ tɔbɛ̀ cuokɛ̀.