MUKÉTÍMÙ 15:24-37

²⁴kɛ̀ dɛ̀ dò ndɛ̀ kpɛtɛ́nɛ̀ òmɔù kɛ̀ ditĩ̀nnì dimɔu í yɛ̃́ kɛ yetɛ́nɛ̀ ikuɔ́ mɑì, di wɛ̃nnɛ́ kɛ́wɑɑ́ ndinɑɑdɑɑ̀, kɛ́ dì nni nféútɛ́ kɛ́wɛ̃nnɛ́nɛ̀ muyuo mmùù ɑ̃̀ntɛnɛ̀ mɛkùɔ̀ nnɛ̀ mɛnɑɑ̀ kɛ́tuɔ nyikuɔ́ yɛ̃mmɛ̀. Dipɑ̃nnì ndi dìì kó kufɔ̃ɔ̃ku n nɑɑti, dí wɑɑ́nnɛ̀ dibɔdɑɑ̀ mɛyɛi ncĩ́ɛ̃́mmɛ̀ kpɛri.

²⁵Kɛ̀ ikuɔ́ nìùtìi dɔɔ̀ ditĩ̀nnì dimɔu mɛyɛi ncĩ́ɛ̃́mmɛ̀ kó ikuɔ́, kɛ̀ n di cĩ́ɛ̃́ nkɛ yɛ̃́ dɛ̀ di kpɛtɛ́nɛ̀mɛ̀mu. Kɛ̀ dí tɔní di diitì kó yɛpɑ̃rɛ̀ di yó m pɑ̃ yɛ̀ kɛ́tuɔ, kɛ́fíénɛ̀ mɛyɛi ncĩ́ɛ̃́mmɛ̀ kó iwũɔ̃ kɛ yɛ̃́ dɛ̀ di kpɛtɛ́nɛ̀mɛ̀mu.

²⁶Dɛ mɔ̀nnì n yóó di cĩ́ɛ̃́mmu di yɛi ndíndi Isidɑyɛɛribɛ nɛ̀ bɛpɔ̀ɔ̀bɛ̀ bɛ̀ɛ̀ di bonɛ̀ kɛ yɛ̃́ dɛ̀ di kpɛtɛ́nɛ̀mu dimɔu.

²⁷Kɛ̀ dɛ̀ mɛ ndò ndɛ̀ kpɛtɛ́nɛ̀ onìtì òmɑ́ɑ̀ ndi kòò dɔ̀ɔ̀ mɛyɛi nwèe wɑɑ́ ndibɔsɛrì dìì mɔ̀kɛ dibenni dìmɑ́ɑ̀ kɛ́ dì nni nféútɛ́ o yɛi ncĩ́ɛ̃́mmɛ̀ kpɛ́í.

²⁸Kɛ̀ ikuɔ́ nìùtìi ò dɔ̀ɔ̀ mɛyɛi nhũtímù kó ikuɔ́ mɛtɑummɛ̀ tou ììkɛ̀ kɛ̀ nhò cĩ̀ɛ̃́,

²⁹díndi Isidɑyɛɛribɛ kɛ̀ di kóò mɔù nwe yoo opɔ̀ɔ̀ wèè di bonɛ̀ ikuɔ́ imɑ́ɑ̀ yóó nni nyi ìì tukúnɛ̀ dɛ̀ bo kpɛtɛ́nɛ̀ wè, kòo yetɛ́nɛ̀ ikuɔ́.

³⁰Kɛ̀ wèè yie bo ncɑɑ̀ri kɛ yɛ̃́, kòò tu Isidɑyɛɛri nwe yoo ò tu opɔ̀ɔ̀ ò cɑ̀ɑ̀rɛ̀ mí ndi Yiɛ̀ nKuyie mmí nwe. Dí ò dènnɛ di cuokɛ̀.

³¹Dɛ kóo nìtì botí ò sènkɛ̀rì mí ndi Yiɛ̀ nKuyie n nɑ́ɑǹtì nti kɛ cɑɑri n kuɔ́, dí ò dɛ̀itɛ di cuokɛ̀, o yɛi mbo o yuu ĩ́nkɛ̀ nkɛ.

³²Isidɑyɛɛribɛ do bo dìì mɔ̀nnì dikpɑ́ɑ̀ miɛkɛ, diyiè mɑrì kɛ̀ bɛ̀mɑbɛ̀ɛ yɑ̀ òmɔù kòò kɑu idɛí tɛom̀pùtɛ̀ yiè

³³kɛ̀ bɛ̀ɛ ò kɔ̀tɛnɛ̀ Mɔyiisi nɛ̀ Anɔɔ nɛ̀ Isidɑyɛɛribɛ sɔmbɛ borɛ̀,

³⁴kɛ́duɔ́ nkɛ̀ bɛ̀ nhò bɑ̀ɑ kɛ yɛ̃́ ikuɔ́ mu ndo í nɑ̀kɛ́mɛ̀ bɛ̀ dò nkóò dɔ̀ɔ̀mɛ̀.

³⁵Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: Dɛ kóo nìtì dò nkɛ́kuɔ̀mu, Isidɑyɛɛribɛ dimɔu dí ò dènnɛ di kó dikɑrì kóò bùɔ́tí yɛtɑ̃́rɛ̀ kɛ́kuɔ.

³⁶Mɛm̀mɛ kɛ̀ ditĩ̀nnì dimɔuu ò dènnɛ bɛ kɑrì kɛ́ nhò buɔti yɛtɑ̃́rɛ̀ kòò yɑ̀ɑ kúnɛ̀, ti Yiɛ̀ nKuyie ndo nɑ̀kɛ́mɛ̀ Mɔyiisi kɛ nyɛ̃ ndɛ̀ ndòmmɛ̀.

³⁷Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: